Mateus 4

Sessoaton Jesus

1 Iwe Espritu a paeninoa Jesus noan desert we pwe epwe noa sessoat me reen Saetan. 2 Nge mwirin aaen Jesus aecchigipin noan faaeig raaen me faaeig pwoong, iwe a meyaefi aan pecchai. 3 Iwe, Saetan we a itto reen nge a aengaeni pwe, "Aere een Naiun Deus, wopwe aengaeniir faai kaan pwe repwe ssiuwen ngaeni fenoawa."

4 Nge Jesus a paniuwaeni pwe, "Pwapwior we e Santus e aepesa pwe, ‘Saapw fenoawa rhag minne aeremas repwe menaw reen, pwe re menaw reen oanongaen kkepas kka Deus a aepesa.’ "

5 Iwe Saetan we a paeninoa Jesus Jerusalem, aepinoamw we e santus, nge a noa aiuwtae pwiuneoi we oarosaen taegias me reen Temple we. 6 Iwe, a aengaeni pwe, "Aere een Naiun Deus, wa oatoroagotiw me igeei, pwe Pwapwior we e Santus e aepesa pwe,

‘Deus epwe akkiuneeor naiun angkenus repwe aemmwenoag.

Repwe ammwarhiug tae noan paiiur

pwe pirhemw mwo nge ete woas ngaeni faai.’ "

7 Jesus a paniuwaeni pwe, "Pwapwior we e Santus epwan aepesa pwe, ‘Wosoapw soatoni Deus na oamw Soamwoon.’ "

8 Mwirin Saetan we a pwan paenitae Jesus wooan eew rhug igin taegias nge a pwaeri ngaeni mweoiun feoniufan me oanongaen minikkena nningen. 9 Iwe, a aengaeni Jesus pwe, "Oanongaen minikkeei ipwe ngaenneog, aere wopwe foatotiw me weni mmwaei nge wa oassotupw ngaeniaei."

10 Jesus a paniuwaeni pwe, "Siunoa Saetan! Pwe Pwapwior we e Santus e aepesa pwe, ‘Wopwe oassotupw ngaeni Deus na oamw Soamwoon nge iiy rhag wopwe engaang ngaeni.’ "

11 Iwe rhag nge Saetan we a siusaengi Jesus, iwe nge angkenus ra itto tipaengi.