1 Mbǝmǝnǝ ɗyemnaa mo, ɗe wen wal nwun. Wen fes nrǝɓet wun, ɗe kǝn kat retnyit a shi wun, kǝ ghan kǝn cìn roop a shi wun zak. Wu ɗar ɓalɓal nɗǝǝn Daa. 2 Wen kǝn satpwoo Yudiya, mo kǝ Sintiki nǝ. Nǝ ret kǝ mo tongryang kǝ shak, mbǝɗe mo jir vǝl mo a nɗǝǝn Kristi. 3 Wen ɗang pee waa ɗyemnǝǝn fen, ɗe muu cìn ɗak ashak, kussuk a ɓam mat ɗesǝ mo. Mbǝɗi mat ɗesǝ nǝ moo cìn ɗak ashak kǝ an nɗǝǝn satpwoo ɗeret nǝ, ashak kǝ Kelemen kǝ koor des ɗe muu cìn ɗak ashak kǝ mo jir. Nen ɗe sǝm mo a ɗerǝran nɗǝǝn ɓǝǝt haal mǝ seen.

4 Wu cìn retnyit nɗǝǝn Daa shidaar-shidaar. Wen baa nsat a nǝ ɗe nwun zak nǝ, wu cìn retnyit. 5 Wu yit kǝ gurum mo jir, mo naa gung fuu. Mbǝɗǝ baaji Daa nǝ wul kus. 6 Taji wu yit kǝ mee mbii daampee nwun kas, ɗangɓe nɗǝǝn mbii mo jir, ɓe wu sat mbii, ɗe wuu rǝɓet mon nNaan, nɗǝǝn ɗangnaan kǝ plang. 7 Tongriyang nNaan ɗe nǝ met man mo jir, nǝ tap kǝ pǝtuup fuu mo kǝ pan fuu mo, nɗǝǝn Kristi Jesu.

8 Ɗyemnaa mo, peekyes nǝ, ɓe jir mbii ɗe nǝ azeen, ɗe nǝ mak shin ɗeɗes, ɗe nǝ a ɗe ndǝre, ɗe nǝ a ɗeɓang, jir a ɗe nǝ a nwal, kǝ jir mbee ɗe nǝ rit naa, jir katɗang nii mee mbii ɗeret met jir ɗe, jir ɗe nǝ mee mbii ɗe nǝ ret plang ɗe, ɓe wu cìn pan nkaa mbii ɗesǝ mo jir. 9 Wu cin ɗak kǝ mbii ɗe gyet wuu ten wu kám mo, kǝ mbii ɗe gyet wuu ten wu lap mo, kǝ mbii ɗe gyet wuu ten wu naa mo, kǝ mbii ɗe gyet wuu ten wu kǝlǝng mo pee an ɗi. Naan ɗewur shin tongryang mmun, wur ntong ashak kǝ wun.

10 Wen kat retnyit nɗǝǝn Daa hakyeng, mbǝɗe gyet wuu ɗoom mundǝr nwen, ɗangɓe yaksǝ wuu pan ghan. Azeen-nzeen, gyet wuu pan an, ɗangɓe baa gyet wu kat a pee mbǝ ɓam an kas. 11 Baa nǝ, a mee mbii jee nwen kas, mbǝɗe gyet wen kǝn ten kám ar mǝ gung nɗǝǝn jir mbii ɗe ghan kǝ nǝ. Jir ɗe nǝ ɗes, kǝ jir ɗe nǝ a lee, ɓe wen kǝn tong a shi retnyit. 12 Wen man mbii ɗe an cin, katɗang baa ghan kǝ mee mbii kas, kǝzak, mman mbii ɗe ghan ncìn katɗang ghan kǝ mbii mo ɗes. nƊǝǝn mbii mo jir, ɓe ghan kǝn kám mbii ɗesǝsok ɗesǝ, mbǝkǝ nghan katpee ɗar ɗe ɓalɓal, jir a nɗǝǝn ghǝɓǝl kǝ an nɗǝǝn neen. 13 Wen mak cìn mbii mo jir, a nɗǝǝn ɓal ɗe Kristi wur shìn nwen shidaar-shidaar.

14 Wen plang wun, mbǝɗe dǝ wu ɓam an nɗǝǝn jeel fen. 15 Wun nen Filipi mo, wu man shikáa fuu nǝ, gyet nshee mǝ pwoo ɗeret nǝ, kaaɗi gyet an yool yit yil mMasidoniya, ɓe baa mee Ekǝlisya ɗe nǝ shínkáa war ashak kǝ an mbǝ shin zuum mo, kǝ lap zuum mo kas, ɗang a wun ɓejee ɗak. 16 ɗang kaaɗi gyet nghan nɗǝǝn nyil nTasoloni, ɓe wuu lep ɓam shindǝm nwen nkaashak-nkaashak, baa a yit mǝndong kǝ vǝl ɓejee kas. 17 Baa nǝ, a mbǝɗe an kǝn tang a mee zuum pee wun ɗi kas, ɗangɓe kǝn rǝɓet kǝ nwun wu kat lǝɓet ɗe nkaa kwat fuu mo. 18 Wuu ten wu kwat ghan kǝndǝng, mbǝɗe kǝn kat mbii ɗe kǝn rǝɓet nǝ, ɗang nǝ ɗes met mbii ɗe dǝ ghan kǝn rǝɓet nǝ. Mbǝɗe nghan kǝn la zuum ɗe wu lep shinji nwen nsar nEpafradaitus. Mbiizuum fuu ɗesǝ nǝ mo, moo toos shang shang a kaa zuum ɗe gurum moo shin nNaan sǝ. Mbiizuum ɗe Naan lap ɗe mo shang nyit nNaan hakyeng. 19 Kǝzak Naan fen wur shin jir mbii ɗe nǝ ret kǝ nwun kat ɗi nciit-nciit kǝ ɗeɗes mǝ long wur nɗǝǝn Jesu Kristi. 20 Ɗeɗes nǝ ɗee a mǝ Naan puun fun mbǝ ngaa-ngaa, Nǝ aasǝ.

21 Wu tok kǝ nen Naan ɗe mo a mǝ Kristi Jesu jir. Ɗyemnaa ɗe mo ashak kǝ an, moo tok kǝ wun. 22 Nen Naan mo jir moo tok kǝ wun. Met jir, a nen Naan ɗe mon ntul mishkoom ɗeɗes Siza.

23 Ɗeret kǝ Daa fun Jesu Kristi nǝ tong ashak kǝ riin fuu mo jir. Nee aasǝ.