شّمّ شَ مَسٍنيِ فِنّ بّ

1 «ﭑ شَنُنتٍنيِ، عِ تٌقَن، عِ تٌقَن.

عِ يَيٍ رَيَبُ عَلْ فَنبّ،

عٍ نْشُنشِ مَقٍلٍنيِ كُي.

عِ شُنسّشّ فبٌ.

عٍ لُشِ نّ عَلْ سِ فْورّ نَشَن فٌرٌ مَ فَلَدِ فٍيَ قَرِ.

2 عِ حِنيِ قِيشّ عَلْ يّشّي فْورّ نَشَن شَبٍ مَشَبَشِ،

عٍ كٍلِشِ مَشَدٍ.

عِ حِنيِ كٍرٍن مُ بَشِ،

عٍ بِرِن نَ عٍ بٌورٍ سّيتِ مَ.

3 عِ دّ تٌقَن،

عِ دّ كِرِ لُشِ نّ عَلْ لُوتِ فبٍيلِ.

عِ شّرّ تٌقَن عَلْ مَنفٌي نَشَن عِشَبَشِ عَ تَفِ.

عٍ مَكٌتٌشِ عِ شَ مَقٍلٍنيِ كُي.

4 عِ كْنيِ قِلِنشِ،

عَ لُشِ عَلْ دَوُدَ شَ يِرٍ مَكَنتَشِ عِتٍشِ.

عِ شَ كْنمَفٌرٍ مَنِيَشِ سْورِيٍ شَ مَكَنتَسٍيٍ نَن نَ،

نَشٍيٍ فبَكُشِ سْورِ بَنشِ كَنكٍ.

5 عِ شِحّ قِرِنيِ لُشِ نّ عَلْ بٌلٍ شَ فُلِيٍ،

نَشٍيٍ عٍ دّ مَدٌنمَ سَنسِيٍ تٌقَنيِ تَفِ.

6 سٌفٍ نَ فٌرٌ، كْي نَشَ سٌ،

ﭑ تٍمَ نّ لَبُندّ نُن سُرَيِ نَ دّننَشّ.

7 ﭑ شَنُنتٍنيِ، عِ تٌقَن،

سٍسٍ مُ لُشِ عِ شَ تٌقَنيِ رَ.

8 ﭑ مَ فِنّ، وٌن شَ كٍلِ لِبَن،

وٌن شَ كٍلِ لِبَن عَمَنَ فٍيَ قَرِ،

سٍنِرِ نُن شٍرِ مٌن فٍيَيٍ قَرِ،

يّتّيٍ نُن بَرَتّيٍ نَ دّننَشّ.

9 ﭑ مَ فِنّ، عِ ﭑ سٌندٌنيِ رَ سّيوَ مَ.

ﭑ شُنيَ، عِ نَ عِ يَ تِ ﭑ نَ، ﭑ بْحّ حّلّشِنمَ نّ.

عِ شَ كْنمَفٌرٍ تٌقٍ رَقَن ﭑ مَ.

10 ﭑ مَ فِنّ، عِ شَ شَنُنتٍيَ حْشُن ﭑ بّ،

دَنفِقٍ وّنِ رَ.

عَ شِرِ قَن دَنفِقٍ لَبُندّ رَ.

11 ﭑ مَ فِنّ، عِ دّ كِرِ حْشُن كُمِ بّ،

عِ نّنيِ حْشُن دَنفِ كُمِ نُن شِحّ رَ.

عِ شَ دُفِ شِرِ لُشِ نّ عَلْ لِبَن شِرِ قَنيِ.»

12 «ﭑ مَ فِنّ، عِ قِندِشِ ﭑ فبٍ نَن نَ،

عَلْ سَنسِ يِرٍ تّتّ رَبِلِنشِ نَشَن نَ.

ﭑ شُنيَ، عِ لُشِ نّ عَلْ ﭑ مَ كْلْنيِ،

نَشَن بَلَنشِ، مِشِ فبّتّ مُ نْمَ يٍ بَدٍ نَا.

13 عِ قَن عَلْ سَنسِ يِرٍ سَنسِ مْولِ بِرِن نَ دّننَشّ،

عَلْ مَنفٌي، لَالِ، سَنسِ شِرِ قَنيِ،

14 سَنسِ قُفٍ نٍرٍقُنيِ،

وُرِ بِلِ نَشَن قُحِ حْشُن،

وُرِ بِلِ نَشَن شِرِ قَن،

سُرَيِ مْولِ بِرِن كٍلِشِ نَشٍيٍ مَ.

15 عِ لُشِ نّ عَلْ يٍ نَشَن مِنِمَ بْشِ مَ،

نَشَن عَ نِيَمَ لِبَن سَنسِ بِرِن شَ قَن.»

فِنّ شَ مَسٍنيِ شّمّ بّ

16 «قٌيٍ قَنيِ شَ قَ كٍلِقٍ كْولَ مَ،

كٍلِقٍ يِرٍ قَنيِ مَ،

عَلَكٌ ﭑ مَ سَنسِ شِرِ شَ تٍ.

ﭑ شَنُنتٍنيِ شَ قَ ﭑ يِرٍ،

عَ شَ سَنسِ بٌفِ قَنيِ دٌن نَشٍيٍ قِندِشِ عَ فبٍ رَ.»