Daniel 1

عَننَبِ دَنِيّلِ سِفَقٍ بَبِلْن بْشِ مَ

1 يُدَيَ مَنفّ يٍهٌيَكِمِ شَ مَنفّيَ حّ سَشَن ندٍ رَ، بَبِلْن مَنفّ نٍبُكَدَنسَرِ نَشَ سِفَ دَرِ سَلَمُ فٍرٍدٍ، عَ شَ سْورِيٍ قَ مّننِ رَبِلِن فٍرٍ كِ مَ. 2 مَرِفِ نَشَ يُدَيَ مَنفّ يٍهٌيَكِمِ سَ عٍ بّلّشّ، عَ نُن عَلَ شَ هْرْ مْبَنشِ يِرَبَسٍ سّنِيّنشِ ندٍيٍ. مَنفّ نٍبُكَدَنسَرِ نَشَ نٍيٍ شَنِن بَبِلْن بْشِ مَ عَ شَ عَلَ شَ بَنشِ كُي، نَاقُلِ رَفَتَمَ دّننَشّ.

3 مَنفّ نَشَ عَ قَلَ عَسِثٍنَسِ بّ، عَ شَ وَلِكّيٍ شَ مَنفّ، عَ شَ عِسِرَيِلَ قٌنِكٍ ندٍيٍ سُفَندِ مَنفّ شَبِلّ يَ مَ، شَ نَ مُ كُنتِفِ دٍنبَيَيٍ يَ مَ. 4 عَ شَ شَشِلِمَ شَرَنشِيٍ سُفَندِ نَشٍيٍ قَتٍ يَلَنشِ، نَشٍيٍ تٌقَن، عَلَكٌ عٍ شَ نْ وَلِدٍ مَنفّ شَ بَنشِ كُي، عٍ مَن شَ بَبِلْن شُي نُن عَ سّبّلِ شْرِ شَرَن. 5 مَنفّ نَشَ دٌنسٍ نُن وّنِ عِتَشُن عٍ مَ، عٍ بَلٌمَ نَشَن نَ حّ سَشَن بُن مَ. نَ دَنفِ شَنبِ، عٍ شَ سٌ وَلِقٍ مَنفّ بّ. 6 يُدَيَكَ نَشٍيٍ نُ نَ عٍ يَ مَ، نٍيٍ نَن يَ؛ دَنِيّلِ، شَنَنِيَ، مِكَيٍلِ، نُن عَسَرَيَ.