1 نَ تّمُي عَلَتَلَ نَشَ يِ مَسٍنيِ تِ؛ 2 «ﭑ تَن عَلَتَلَ نَن وٌ مَرِفِ عَلَ رَ، نَشَن وٌ رَ مِنِ مِسِرَ كٌنيِيَ كُي.»

3 «وٌ نَشَ عَلَ فبّتّيٍ بَتُ بَقٍ ﭑ تَن نَ.»

4 «وٌ نَشَ كُيٍ يٌ يَءِلَن نَشَن مِسَالِشِ سٍ ندٍ رَ، نَشَن تٌمَ كٌورٍ نُن بْشِ مَ، شَ نَ مُ نَشَن لُمَ يٍ نُن بْشِ بُن مَ. 5 وٌ نَشَ وٌ مَقٍلٍن نَ سٍ مْولِيٍ بّ، وٌ نَشَ عٍ بَتُ، بَرِ مَ ﭑ تَن وٌ مَرِفِ عَلَتَلَ، ﭑ مُ وَ مَ ﭑ قِرِن ندٍ شْن. نَشٍيٍ ﭑ شْنمَ، ﭑ نٍيٍ بْنسْي رَتْنمَ نّ هَن عٍ تٌلٌنتٌلٌنيِيٍ، شَ نَ مُ عَ رَ عٍ تٌلٌبِتّيٍ شَ دِيٍ. 6 كْنْ مِشِ نَشٍيٍ ﭑ شَنُمَ، عٍ بِرَ ﭑ مَ سّرِيّ قْشْ رَ، ﭑ هِننّمَ عٍ رَ شَنُنتٍيَ كُي عَبَدَن.»

7 «وٌ نَشَ ﭑ شِلِ يٍلٍقُ، بَرِ مَ ﭑ تَن عَلَتَلَ مُ دِحّمَ مِشِيٍ مَ، نَشٍيٍ نَ قٍ مْولِ رَبَمَ.»

8 «وٌ شَ رَتُ مَلَبُي لْشْي مَ، وٌ شَ عَ بِنيَ. 9 وٌ نْمَ وَلِ بِرِن نَبَدٍ شِ سٍننِ بُن مَ، 10 كْنْ نَ شِ سٌلٌقٍرٍ ندٍ قِندِ مَ مَلَبُي لْشْي رَ وٌ مَرِفِ عَلَتَلَ شَ بِنيّ بُن مَ. وٌ نَشَ وَلِ يٌ رَبَ نَ لْشْي، وٌ تَن، وٌ شَ دِيٍ، وٌ شَ كٌنيِيٍ، وٌ شَ شُرُ سٍيٍ، نُن وٌ شَ شْحّيٍ. 11 عَلَتَلَ دُنِحَ نُن سٍ بِرِن دَا شِ سٍننِ نَن بُن مَ. عَ تٌ فّ نَ رَ عَ نَشَ عَ مَلَبُ عَ شِ سٌلٌقٍرٍ ندٍ. نَ نَن عَ شّيشِ، عَلَتَلَ نَشَ بَرَكّ سَ نَ مَلَبُي لْشْي مَ، عَ قِندِ لْشْي سّنِيّنشِ رَ.»

12 «وٌ شَ وٌ بَبَ نُن وٌ نفَ بِنيَ. نَ كُي وٌ شَ سِمَيَ شْن كُيَمَ نّ بْشِ مَ، وٌ مَرِفِ عَلَتَلَ نَشَن قِمَ وٌ مَ.»

13 «وٌ نَشَ مِشِ قَشَ.»

14 «وٌ نَشَ يّنّ رَبَ.»

15 «وٌ نَشَ مُحّ تِ.»

16 «وٌ نَشَ وٌ بٌورٍ تْوحّفّ.»

17 «وٌ نَشَ مِلَ وٌ بٌورٍ شَ هَرِفٍ مَ، عَلْ عَ شَ بَنشِ، عَ شَ فِنّ، عَ شَ كٌنيِيٍ، عَ شَ نِنفٍ، شَ نَ مُ عَ شَ سٌقَلٍ.»

18 حَمَ تٌ نَ فَلَنيِ، سٍيَمَكْنيِ، نُن تُورِ تٌ فٍيَ قَرِ، عٍ قَ سَرَ شُي مّ، عٍ نَشَ سّرّن فَاشُي رَ. عٍ نَشَ مَكُيَ مّننِ رَ، 19 عٍ قَ عَ قَلَ مُنسَ بّ، «عِ تَن شَ وْيّن مُشُ رَ، عَلَتَلَ شُي وٌن قَشَمَ نّ.» 20 مُنسَ نَشَ عَ قَلَ حَمَ بّ، «هَلِ وٌ مُ فَاشُ. عَلَ نَ وٌ مَتٌقٍ، عَلَكٌ وٌ شَ فَاشُ عَ يَ رَ، وٌ شَ يُنُبِ لُ نَ.» 21 حَمَ نَشَ لُ يِرٍ مَكُيٍ، كْنْ مُنسَ تَن نَشَ سِفَ نَ نُشُي قْورْشِ يِرٍ عَلَتَلَ نُ نَ دّننَشّ.

22 عَلَتَلَ نَشَ عَ مَسٍن مُنسَ بّ، «عِ شَ يِ مَسٍنيِ تِ عِسِرَيِلَكَيٍ بّ، ‹وٌ بَرَ عَ تٌ، ﭑ بَرَ وْيّن وٌ رَ كٍلِقٍ كٌورٍ مَ. 23 وٌ نَشَ كُيٍ يٌ يَءِلَن فبٍتِ نُن شّيمَ رَ نَشَن لُمَ ﭑ سّيتِ مَ. 24 وٌ شَ سّرّشّبَدٍ يَءِلَن ﭑ بّ بّندّ رَ. وٌ شَ شُرُ سٍيٍ بَ سّرّشّ فَن دَاشِ نُن شَنُنتٍيَ سّرّشّ رَ. وٌ نَ ﭑ شِلِ بِنيَ، ﭑ بَرَكّ سَمَ نّ وٌ مَ. 25 شَ وٌ سَ سّرّشّبَدٍ تِمَ ﭑ بّ فّمّ رَ، وٌ نَشَ عَ تِ فّمّ مَسٌلِشِيٍ رَ، بَرِ مَ نَ عَ نِيَمَ نّ عَ شَ قِندِ سٍ سّنِيّنتَرٍ رَ. 26 وٌ نَشَ ﭑ مَ سّرّشّبَدٍ عِتٍ، شَ نَ مُ عَ رَ سّرّشّدُبّ شَ دٌنمَ كُيٍ بُنيِ مَبَمَ نّ.›»