18 حَمَ تٌ نَ فَلَنيِ، سٍيَمَكْنيِ، نُن تُورِ تٌ فٍيَ قَرِ، عٍ قَ سَرَ شُي مّ، عٍ نَشَ سّرّن فَاشُي رَ. عٍ نَشَ مَكُيَ مّننِ رَ، 19 عٍ قَ عَ قَلَ مُنسَ بّ، «عِ تَن شَ وْيّن مُشُ رَ، عَلَتَلَ شُي وٌن قَشَمَ نّ.» 20 مُنسَ نَشَ عَ قَلَ حَمَ بّ، «هَلِ وٌ مُ فَاشُ. عَلَ نَ وٌ مَتٌقٍ، عَلَكٌ وٌ شَ فَاشُ عَ يَ رَ، وٌ شَ يُنُبِ لُ نَ.» 21 حَمَ نَشَ لُ يِرٍ مَكُيٍ، كْنْ مُنسَ تَن نَشَ سِفَ نَ نُشُي قْورْشِ يِرٍ عَلَتَلَ نُ نَ دّننَشّ.
22 عَلَتَلَ نَشَ عَ مَسٍن مُنسَ بّ، «عِ شَ يِ مَسٍنيِ تِ عِسِرَيِلَكَيٍ بّ، ‹وٌ بَرَ عَ تٌ، ﭑ بَرَ وْيّن وٌ رَ كٍلِقٍ كٌورٍ مَ. 23 وٌ نَشَ كُيٍ يٌ يَءِلَن فبٍتِ نُن شّيمَ رَ نَشَن لُمَ ﭑ سّيتِ مَ. 24 وٌ شَ سّرّشّبَدٍ يَءِلَن ﭑ بّ بّندّ رَ. وٌ شَ شُرُ سٍيٍ بَ سّرّشّ فَن دَاشِ نُن شَنُنتٍيَ سّرّشّ رَ. وٌ نَ ﭑ شِلِ بِنيَ، ﭑ بَرَكّ سَمَ نّ وٌ مَ. 25 شَ وٌ سَ سّرّشّبَدٍ تِمَ ﭑ بّ فّمّ رَ، وٌ نَشَ عَ تِ فّمّ مَسٌلِشِيٍ رَ، بَرِ مَ نَ عَ نِيَمَ نّ عَ شَ قِندِ سٍ سّنِيّنتَرٍ رَ. 26 وٌ نَشَ ﭑ مَ سّرّشّبَدٍ عِتٍ، شَ نَ مُ عَ رَ سّرّشّدُبّ شَ دٌنمَ كُيٍ بُنيِ مَبَمَ نّ.›»