1 «ﭑ يِ قٍ بِرِن مَسٍنشِ نّ وٌ بّ، عَلَكٌ وٌ نَشَ قَ بِرَ تَنتَنيِ كُي. 2 عٍ قَمَ نّ تْنيِ دْشْدٍ وٌ مَ، سٌقٍ رَ سَلِدٍيٍ كُي. وَشَتِ حَن قَقٍ، نَشَن نَ وٌ قَشَ، عَ نَ قَشّ مَحْشُنمَ كّوَلِ قَنيِ نَن نَ عَلَ بّ. 3 عٍ نَ قٍيٍ رَبَمَ نّ، بَرِ مَ عٍ مُ بَبَ عَلَ كٌلٌن، عٍ مُ ﭑ قَن كٌلٌن. 4 كْنْ ﭑ يِ قٍيٍ بِرِن مَسٍنشِ نّ وٌ بّ، عَلَكٌ عٍ وَشَتِ نَ عَ لِ، وٌ شَ رَتُ، عَ ﭑ عٍ شَ قٍ قَلَ نّ وٌ بّ.»

«ﭑ مُ يِ قٍ بِرِن مَسٍن وٌ بّ عَ قْلّ رَ، بَرِ مَ ﭑ نُ نَ وٌ قّ مَ. 5 كْنْ يَكْسِ، ﭑ قَ سِفَقٍ ﭑ شّيمَ يِرٍ، وٌ مُ ﭑ مَشْرِنمَ، ‹عِ نَ سِفَقٍ مِندٍن؟› 6 ﭑ تٌ يِ قٍيٍ مَسٍنشِ وٌ بّ، نَ نَن وٌ بْحّ سُننُنشِ. 7 كْنْ ﭑ شَ عَ قَلَ وٌ بّ عَ نْندِ كِ مَ، ﭑ مَ سِفّ نَن مُنَقَنيِ فبٌ وٌ بّ، بَرِ مَ شَ ﭑ مُ سِفَ، سَابُي قَنيِ مُ قَمَ وٌ مَ. كْنْ شَ ﭑ سِفَ، ﭑ عَ شّيمَ نّ وٌ مَ. 8 عَ نَ قَ، عَ مِشِيٍ رَكٌلٌنمَ نّ يُنُبِ شَ قٍ رَ، تِنشِنيِ شَ قٍ رَ، نُن كِيتِ شَ قٍ رَ. 9 عَ عٍ رَكٌلٌنمَ نّ يُنُبِ شَ قٍ رَ، بَرِ مَ عٍ مُ دَنشَنِيَشِ ﭑ مَ. 10 عَ عٍ رَكٌلٌنمَ نّ تِنشِنيِ شَ قٍ رَ، بَرِ مَ ﭑ نَ سِفَقٍ بَبَ عَلَ يِرٍ، وٌ مُ ﭑ تٌمَ قَ. 11 عَ عٍ رَكٌلٌنمَ نّ كِيتِ شَ قٍ رَ، بَرِ مَ يِ دُنِحَ نَ نْلَ كٌبِ نَشَن يِ رَ، عَ حَن بَرَ مَكِيتِ.»

12 «مَسٍنيِ فبّتّيٍ مَن نَ، كْنْ وٌ مُ نْمَ عٍ بِرِن قَهَامُدٍ يَكْسِ. 13 عَلَ شَشِلِ نَ قَ وٌ مَ، عَ نَ نْندِ بِرِن يَ مَبْو مَ وٌ بّ. عَ شَ مَسٍنيِ مُ قَتَنشِ عَ يّتّ كَن نَ. عَ نَشَن مّمَ ﭑ بَبَ رَ، عَ نَ نَن مَسٍنمَ وٌ بّ. قٍ نَشٍيٍ قَمَ رَبَدٍ، عَ نٍيٍ نَن مَسٍنمَ وٌ بّ. 14 عَ قَمَ ﭑ مَ شُننَكٍلِ مَكّنّندٍ، بَرِ مَ عَ نَشَن سْتْمَ ﭑ تَن نَ، عَ نَ نَن كَوَندِ مَ وٌ بّ. 15 نَشَن بِرِن نَ بَبَ عَلَ يِ، عَ قِندِشِ ﭑ قَن فبٍ نَن نَ. ﭑ عَ قَلَ نَ نَن مَ، ‹عَ نَشَن سْتْمَ ﭑ تَن نَ، عَ نَ نَن كَوَندِ مَ وٌ بّ.›»

16 عِسَ مَن نَشَ عَ قَلَ عٍ بّ، «وَشَتِ دِ نَن لُشِ بٍينُن ﭑ شَ لْي وٌ مَ، كْنْ وَشَتِ دِ مَن نَ دَنفِ، وٌ مَن ﭑ تٌمَ نّ.» 17 عَ قْشِرَبِرّيٍ نَشَ عٍ بٌرٍ مَشْرِن، «عِسَ وَ مَ مُنسٍ قَلَقٍ يِ كِ، ‹عَ فبٍ مُ لُشِ ﭑ شَ لْي وٌ مَ دٌندٌرٌنتِ، كْنْ وٌ مَن قَمَ ﭑ تٌدٍ.› عَ شَ وْيّنيِ نَ دِ عَ تٌ عَ قَلَشِ، ‹ﭑ نَ سِفَقٍ بَبَ عَلَ يِرٍ؟›» 18 عٍ مَن نُ عٍ بٌرٍ مَشْرِنقٍ، «عَ مُنسٍ مَ، عَ ‹وَشَتِ دِ›؟ وٌن تَن مُ عَ كٌلٌن عَ سٍسٍ قَلَقٍ يِ كِ.»

19 عِسَ تٌ عَ كٌلٌن عَ عٍ نُ وَ مَ عَ مَشْرِنقٍ، عَ نَشَ عَ مَسٍن عٍ بّ، «ﭑ تٌ عَ قَلَشِ، ‹وَشَتِ دِ نَن لُشِ بٍينُن ﭑ شَ لْي وٌ مَ، كْنْ وَشَتِ دِ مَن نَ دَنفِ، وٌ مَن ﭑ تٌمَ نّ،› وٌ وٌ بٌرٍ مَشْرِنقٍ نَ نَن مَ؟ 20 ﭑ شَ عَ قَلَ وٌ بّ عَ نْندِ كِ مَ، وٌ وَ مَ نّ، وٌ فبٍلٍفبٍلٍ، كْنْ دُنِحَ تَن حّلّشِنمَ نّ. وٌ سُننُنمَ نّ نَ قٍ مَ، كْنْ وٌ شَ سُننُنيِ قَمَ مَسَرَدٍ سّيوّ رَ. 21 فِنّ نَشَن نَ دِتِنيِ رَ، عَ تْورْ مَ نّ كِ قَنيِ عَ شَ وَشَتِ تٌ بَرَ عَ لِ. كْنْ شَ عَ فّ دِ بَرِدٍ، عَ حَن مُ رَتُمَ نَ تْورّ مَ، عَ تٌ سّيوَشِ دِ نّينّ بَرِقٍ رَ دُنِحَ. 22 نَ كُي، وٌ قَن نَ سُننُنيِ نَن كُي يِ وَشَتِ مَ. كْنْ ﭑ فبِلٍنمَ نّ وٌ تٌ رَ، وٌ بْحّ سّيوَ، مِشِ يٌ مُ نَ سّيوّ بَمَ وٌ يِ. 23 نَ لْشْي نَ عَ لِ، وٌ مُ ﭑ مَشْرِنمَ سٍسٍ مَ سْنْن. ﭑ شَ عَ قَلَ وٌ بّ عَ نْندِ كِ مَ، وٌ نَ بَبَ عَلَ مَشَندِ قٍقٍ مَ ﭑ شِلِ رَ، عَ عَ سٌمَ نّ وٌ يِ. 24 هَن يَ، وٌ سِنفٍ مُ نُ عَلَ مَشَندِ قٍقٍ مَ ﭑ تَن شِلِ رَ. وٌ مَشَندِ تِ. وٌ عَ سْتْمَ نّ، عَلَكٌ وٌ شَ سّيوَ عَ كَمَلِشِ رَ.»

25 «ﭑ يِ قٍ بِرِن مَسٍنشِ وٌ بّ تَالِ وْيّنيِ نَن نَ، كْنْ وَشَتِ نَ قَقٍ، ﭑ مُ وْيّنمَ وٌ بّ تَالِ وْيّنيِ رَ سْنْن، ﭑ بَبَ عَلَ شَ قٍ مَسٍن وٌ بّ عَ قِيشّ رَ. 26 نَ وَشَتِ مَ، وٌ بَبَ عَلَ مَشَندِ مَ ﭑ شِلِ نَن نَ. ﭑ مُ عَ قَلَقٍ شّ دٍ، عَ ﭑ تَن نَن بَبَ عَلَ مَشَندِ مَ وٌ بّ، 27 بَرِ مَ بَبَ عَلَ يّتّ يَتِ وٌ شَنُشِ نّ. عَ وٌ شَنُشِ نّ ﭑ تٌ رَقَن وٌ مَ، وٌ مَن تٌ لَشِ عَ رَ عَ ﭑ كٍلِشِ عَ تَن عَلَ نَن مَ. 28 ﭑ كٍلِشِ بَبَ عَلَ نَن مَ، ﭑ قَ دُنِحَ مَ. ﭑ مَن قَ كٍلِقٍ نّ دُنِحَ مَ، سِفَقٍ رَ بَبَ عَلَ يِرٍ.»

29 عِسَ قْشِرَبِرّيٍ نَشَ عَ قَلَ عَ بّ، «عَ مَتٌ، عِ مُ وْيّنقٍ تَالِ وْيّنيِ شَ رَ سْنْن، عِ قَ نَ وْيّنقٍ عَ قِيشّ نَن نَ! 30 مُشُ بَرَ عَ كٌلٌن قَ، عَ عِ قٍ بِرِن كٌلٌن، هَلِ مِشِ يٌ مُ عِ مَشْرِن. نَ كُي، مُشُ لَشِ عَ رَ عَ عِ كٍلِشِ عَلَ نَن مَ.» 31 عِسَ نَشَ عٍ يَابِ، «وٌ بَرَ دَنشَنِيَ يَكْسِ؟ 32 وَشَتِ نَ قَقٍ، عَ حَن بَرَ عَ لِ، وٌ يٍنسٍنمَ نّ، وٌ قَ ﭑ نَبٌلٌ. كْنْ بَبَ عَلَ تَن مُ ﭑ نَبٌلٌمَ. عَ لُمَ نّ ﭑ سّيتِ مَ. 33 ﭑ يِ قٍ بِرِن مَسٍنشِ نّ وٌ بّ، عَلَكٌ بْحّسَ شَ لُ وٌ يِ رَ ﭑ سَابُي رَ. وٌ مَنتْورْلِ سْتْمَ نّ دُنِحَ مَ، كْنْ وٌ شَ لِمَنِيَ، ﭑ تَن بَرَ نْ دُنِحَ رَ.»