1 نَ دَنفِ شَنبِ، يُوِقِيٍ شَ سَلِ ندٍ تٌ عَ لِ، عِسَ نَشَ تٍ دَرِ سَلَمُ. 2 يٍ يِرٍ ندٍ نُ نَ دَرِ سَلَمُ، نَشَن شِلِ بٍتٍسٍدَ عٍبُرُ شُي. عَ نُ نَ تَا نَادّ شُنفبٍ نَن قّ مَ، نَشَن شِلِ شُرُ سٍيٍ نَادّ. لٍيلٍ سُولِ نَن نُ نَ نَ يٍ يِرٍ. 3,4 قُرٍ مَ وُيَشِ نُ سَشِ نَ لٍيلٍيٍ بُن مَ، عَلْ دْنشُييٍ، نَمَتّيٍ، نُن نَشٍيٍ سَلٌنيِيٍ بِرِن تُوشِ عَ مَ. 5 شّمّ ندٍ نُ نَ نَا، نَشَن نُ نَمَتَشِ كَبِ حّ تٌنفٌ سَشَن نُن سٌلٌمَسَشَن. 6 عِسَ تٌ نُ عَ كٌلٌن عَ يِ شّمّ نُ بَرَ بُ عَ نَمَتَشِ رَ، عَ تٌ عَ سَشِ تٌ، عَ نَشَ عَ مَشْرِن، «عِ وَ مَ عَ شْن عِ شَ يَلَن؟» 7 نَمَتّ نَشَ عَ يَابِ، «مَرِفِ، يٍ نَ عِمَشَ، مِشِ يٌ مُ نَ نَشَن ﭑ نَفٌرٌ مَ عَ شْورَ. بٍينُن ﭑ تَن شَ يٍ يِرٍ لِ، مِشِ فبّتّ بَرَ فٌرٌ عَ شْورَ.» 8 عِسَ نَشَ عَ قَلَ عَ بّ، «كٍلِ، عِ عِ شَ دَفِ تٌنفٌ، عِ عِ حّرّ.» 9 عَ نَشَ يَلَن كٍرٍن نَ. عَ نَشَ عَ شَ دَفِ تٌنفٌ، عَ عَ حّرّ.

نَ لْشْي تٌ نُ قِندِشِ مَلَبُ لْشْي نَن نَ، 10 يُوِقِ كُنتِفِيٍ نَشَ عَ قَلَ نَ شّمّ رَيَلَنشِ بّ، «مَلَبُ لْشْي نَن تٌ، عَ مُ لَنمَ عِ شَ عِ شَ دَفِ شَنِن عِ شُن.» 11 كْنْ عَ تَن نَشَ عٍ يَابِ، «شّمّ نَشَن ﭑ نَيَلَنشِ، نَ نَن عَ قَلَ ﭑ بّ، ‹عِ عِ شَ دَفِ تٌنفٌ، عِ عِ حّرّ.›» 12 عٍ نَشَ عَ مَشْرِن، «ندٍ نَ قَلَشِ عِ بّ؟» 13 كْنْ شّمّ مُ نُ عَ كٌلٌن نَشَن عَ رَيَلَنشِ، بَرِ مَ عِسَ نُ بَرَ لْي عَ مَ حَمَ يَ مَ. 14 نَ دَنفِ شَنبِ، عِسَ مَن نَشَ نَ شّمّ لِ هْرْ مْبَنشِ، عَ نَشَ عَ قَلَ عَ بّ، «يَكْسِ عِ بَرَ يَلَن، كْنْ عَ لَنمَ عِ شَ فبِلٍن يُنُبِ قْشْ رَ عَلَكٌ قٍ فبّتّ نَشَ عِ سْتْ نَشَن دَنفِ نَ قُرٍ سِنفٍ رَ.» 15 شّمّ نَشَ سِفَ عَ سَ عَ قَلَ يُوِقِ كُنتِفِيٍ بّ، عَ عِسَ نَن عَ رَيَلَنشِ.

16 عِسَ تٌ نَ قٍ رَبَ مَلَبُ لْشْي نّ، يُوِقِ كُنتِفِيٍ نَشَ سٌ عِسَ فٍرٍقٍ. 17 عِسَ نَشَ عَ قَلَ عٍ بّ، «هَن تٌ ﭑ بَبَ نَ وَلِقٍ، ﭑ قَن نَ وَلِقٍ.» 18 نَ تّمُي، يُوِقِيٍ نَشَ قٍ بِرِن نَبَ عَلَكٌ عٍ شَ عَ قَشَ، بَرِ مَ عَ نُ مَلَبُ لْشْي سّرِيّ كَنَمَ، عَ مَن نُ عَ قَلَمَ عَ عَلَ نَن عَ بَبَ رَ. نَ نَ عَ رَ عٍ بِرِن تِدٍ لَنشِ.

19 نَ كُي، عِسَ نَشَ عَ مَسٍن عٍ بّ، «ﭑ شَ نْندِ يَتِ قَلَ وٌ بّ، عَلَ شَ دِ مُ نْمَ قٍقٍ رَبَدٍ عَ يّتّ رَ، قٌ عَ نَ نَشَن تٌ عَ بَبَ عَلَ رَ. عَلَ شَ دِ، عَ بَبَ عَلَ نَن قْشِ رَبَمَ. 20 بَرِ مَ بَبَ عَلَ عَ شَ دِ شَنُشِ نّ، عَ مَن قٍ نَشَن بِرِن نَبَمَ، عَ عَ مَسٍنمَ عَ شَ دِ بّ. عَ حَن قَمَ قٍيٍ مَسٍندٍ عَ بّ نَشٍيٍ مَكَابَ دَنفِ يٍيٍ رَ، عَلَكٌ وٌ دّ شَ عِشَرَ. 21 بَبَ عَلَ مِشِيٍ رَكٍلِمَ قَشّ مَ كِ نَشّ، عَ عٍ رَكِسِ، عَلَ شَ دِ قَن كِسِ قِمَ عَ نَ وَ عَ قِقٍ نَشٍيٍ مَ. 22 بَبَ عَلَ حَن مُ مِشِ يٌ مَكِيتِمَ، عَ مِشِ مَكِيتِقٍ بِرِن لُشِ عَ شَ دِ نَن مَ، 23 عَلَكٌ بِرِن شَ عَلَ شَ دِ بِنيَ عَلْ عٍ بَبَ عَلَ بِنيَمَ كِ نَشّ. نَشَن يٌ مُ عَلَ شَ دِ بِنيَ، عَ مُ بَبَ عَلَ قَن بِنيَشِ نَشَن عَ شَ دِ شّيشِ دُنِحَ.»

24 «ﭑ شَ نْندِ قَلَ وٌ بّ، نَشَن عَ تُلِ مَتِمَ ﭑ نَ، عَ قَ لَ ﭑ شّيمَ رَ، نَ كَنيِ بَرَ كِسِ عَبَدَن. نَ كَنيِ مُ كِيتِ شْرْشْي سْتْمَ، عَ بَرَ فّ رَتَنفَدٍ يَهَننَمَ مَ، عَ بَرَ كِسِ سْتْ. 25 ﭑ شَ عَ قَلَ وٌ بّ عَ نْندِ كِ مَ، وَشَتِ قَقٍ عَ لِدٍ، عَ حَن بَرَ عَ لِ، قَشَمِشِيٍ عَلَ شَ دِ شُي مّمَ نّ. نَشٍيٍ نَ عَ شُي مّ، نٍيٍ كِسِمَ نّ. 26 بَبَ عَلَ تٌ قِندِشِ كِسِ كَنيِ رَ كِسِ سْتْمَ نَشَن نَ، عَ بَرَ عَ شَ دِ قَن قِندِ كِسِ كَنيِ رَ كِسِ سْتْمَ نَشَن نَ. 27 عَ مَن بَرَ نْي سٌ عَ يِ رَ عَدَ مَدِيٍ مَكِيتِقٍ مَ، بَرِ مَ عَدَ مَ شَ دِ نَن عَ رَ. 28 وٌ نَشَ كَابَ يِ قٍ مَ، بَرِ مَ وَشَتِ قَقٍ عَ لِدٍ، نَشٍيٍ نَ فَبُرِ كُي، عٍ بِرِن عَ شُي مّمَ نّ، 29 عٍ مِنِ عٍ شَ فَبُرِيٍ كُي. نَشٍيٍ قِندِ قٍ قَنيِ رَبَيٍ رَ، نٍيٍ نَ كٍلِ، عٍ كِسِ نَن سْتْمَ. كْنْ نَشٍيٍ قِندِ قٍ كٌبِ رَبَيٍ رَ، نٍيٍ تَن نَ كٍلِ، عٍ فبَلٌي نَن سْتْمَ.»

30 «ﭑ تَن مُ نْمَ قٍقٍ رَبَدٍ ﭑ يّتّ رَ. ﭑ عَ مّمَ بَبَ عَلَ رَ كِ نَشّ، ﭑ تَن كِيتِ سَمَ نَ كِ نّ. نَ كُي، ﭑ مَ كِيتِ تِنشِن، بَرِ مَ ﭑ مُ بِرَ مَ ﭑ يّتّ وَشْنقٍ شَ قْشْ رَ، ﭑ بِرَشِ ﭑ شّيمَ نَن وَشْنقٍ قْشْ رَ.»

31 «شَ ﭑ سَ سٍيدٍ بَ ﭑ يّتّ بّ، عَ مُ لَنمَ. 32 بَبَ عَلَ نَن سٍيدٍ بَمَ ﭑ بّ. ﭑ قَن عَ كٌلٌن عَ تَن سٍيدٍحْشْيَ نَشَن بَمَ ﭑ مَ قٍ رَ، عَ قِندِشِ نْندِ نَن نَ. 33 وٌ تَن يَتِ بَرَ مِشِيٍ شّي يَيَ شْن، عَ قَن نَشَ سٍيدٍحْشْيَ بَ نْندِ شَ قٍ رَ. 34 ﭑ هَيِ مُ نَ عَدَ مَ تَن شَ سٍيدٍحْشْيَ مَ، كْنْ ﭑ يِ قٍيٍ مَسٍنشِ نّ وٌ بّ عَلَكٌ وٌ شَ كِسِ. 35 يَيَ نُ لُشِ نّ عَلْ لَنثُي رَدّشّشِ نَشَن يَنبَمَ. وٌ بَرَ سّيوَ نَ نَءِيَلَنيِ رَ وَشَتِ ندٍ بُن مَ.»

36 «كْنْ سٍيدٍحْشْيَ ندٍ نَ ﭑ بّ نَشَن دَنفِ يَيَ فبٍ رَ. ﭑ قٍيٍ نَشٍيٍ رَبَمَ، بَبَ عَلَ بَرَ نَشٍيٍ سٌ ﭑ يِ ﭑ شَ عٍ رَبَ، نٍيٍ نَن قِندِشِ سٍيدٍحْشْيَ رَ ﭑ مَ قٍ رَ، عَ بَبَ عَلَ نَن ﭑ شّيشِ. 37 بَبَ عَلَ نَشَن ﭑ شّيشِ، عَ قَن يَتِ بَرَ سٍيدٍ بَ ﭑ مَ قٍ رَ. وٌ سِنفٍ مُ نُ عَ شُي مّ، وٌ مُ نُ عَ يَتَفِ تٌ، 38 عَ شَ مَسٍنيِ مَن مُ سَبَتِشِ وٌ بْحّ مَ، بَرِ مَ وٌ مُ لَشِ عَ شَ شّيرَ رَ. 39 وٌ لُمَ كِتَابُييٍ مَتٌ رَ، بَرِ مَ وٌ حْشْ عَ مَ، عَ وٌ عَبَدَن كِسِ سْتْمَ عٍ تَن نَن سَابُي رَ. عَ قَ لِ، نَ كِتَابُييٍ يَتِ نَن ﭑ مَ قٍ سٍيدٍ بَمَ، 40 كْنْ وٌ تٌندِشِ قَدٍ ﭑ مَ وٌ شَ كِسِ سْتْ.»

41 «ﭑ مُ وَ مَ عَدَ مَدِيٍ شَ مَتْشْي شْن. 42 ﭑ وٌ كٌلٌن. عَلَ شَ شَنُنتٍيَ مُ نَ وٌ بْحّ كُي. 43 ﭑ قَشِ ﭑ بَبَ نَن شِلِ رَ، كْنْ وٌ مُ ﭑ نَسّنّشِ. شَ مِشِ فبّتّ سَ قَ عَ يّتّ كَن نَن شِلِ رَ، وٌ مُ تٌندِ مَ نَ تَن نَسّنّدٍ. 44 وٌ تٌ وَ مَ وٌ شَ مَتْشْي سْتْ وٌ بٌرٍ رَ، كْنْ وٌ مُ مَتْشْي قٍنمَ نَشَن قَتَنشِ عَلَ كٍرٍنيِ تَن نَ، وٌ قَ دَنشَنِيَمَ دِ؟»

45 «وٌ نَشَ عَ مَحْشُن دٍ عَ ﭑ تَن نَن وٌ كَلَمُمَ بَبَ عَلَ شْن. عَننَبِ مُنسَ، وٌ شَشِلِ تِشِ نَشَن نَ، نَ نَن وٌ كَلَمُمَ. 46 شَ وٌ سَ لَشِ مُنسَ رَ نُ، وٌ لَمَ نّ ﭑ قَن نَ نُ، بَرِ مَ مُنسَ ﭑ تَن نَن مَ قٍ سّبّ. 47 كْنْ شَ وٌ مُ لَشِ عَ شَ كِتَابُي رَ، وٌ قَ لَمَ ﭑ تَن مَ مَسٍنيِ رَ دِ؟»