عِسَ سٌقٍ دَرِ سَلَمُ
28 عِسَ تٌ فّ نَ مَسٍنيِ رَ، عَ نَشَ سِفَ يَرٍ، سِفَقٍ رَ دَرِ سَلَمُ. 29 عَ تٌ مَكْرّ بٍتِقَفٍ نُن بٍتَنِ تَايٍ رَ، عٌلِوِ فٍيَ قّ مَ، عَ نَشَ عَ قْشِرَبِرّيٍ مِشِ قِرِن شّي، 30 عَ عَ قَلَ عٍ بّ، «وٌ شَ سٌ تَا كُي نَشَن نَ يَرٍ. وٌ نّقّ سٌ نَا، وٌ سٌقَلٍ لَنمَ لِمَ عَ شِرِشِ نَا، مِشِ مُ نُ دْشْ نَشَن قَرِ. وٌ شَ عَ قُلُن، وٌ قَ عَ رَ بٍ. 31 شَ مِشِ ندٍ قَ وٌ مَشْرِن، ‹وٌ عَ قُلُنقٍ مُنقٍ رَ› وٌ شَ عَ يَابِ، ‹مَرِفِ نَن هَيِ نَ عَ مَ.›»
32 عٍ تٌ سِفَ شّيرَيَ رَبَدٍ، عٍ نَشَ قٍ بِرِن لِ عَلْ عِسَ عَ قَلَ عٍ بّ كِ نَشّ. 33 عٍ نُ نَ سٌقَلٍ لَنمَ قُلُنقٍ تّمُي نَشّ، عَ كَنيِيٍ نَشَ عٍ مَشْرِن، «وٌ يِ سٌقَلٍ قُلُنقٍ مُنقٍ رَ؟» 34 عٍ نَشَ عَ مَسٍن، «مَرِفِ نَن هَيِ نَ عَ مَ.» 35 عٍ تٌ سٌقَلٍ شَنِن عِسَ شْن، عٍ نَشَ عٍ شَ دٌنمَيٍ سَ عَ قَرِ، عٍ قَ عِسَ مَلِ عَ شَ عَ مَفٌرٌ عَ مَ. 36 عَ تٌ نُ سِفَمَ، مِشِيٍ نُ عٍ شَ دٌنمَيٍ عِتَلَمَ كِرَ شْن مَ، عِسَ بِنيَقٍ رَ.
37 عَ تٌ نُ مَكْرّقٍ دَرِ سَلَمُ رَ، عَ فٌرٌقٍ عٌلِوِ فٍيَ رَ، عَ قْشِرَبِرّ فَلِ بِرِن نَشَ سّيوَ، عٍ سٌ عَلَ مَتْشْقٍ عٍ شُي عِتٍشِ رَ كَابَنَكٌ بِرِن شَ قٍ رَ عٍ نُ بَرَ نَشٍيٍ تٌ. 38 عٍ نُ عَ قَلَقٍ نّ،
«بَرَكَ نَ مَنفّ بّ نَشَن قَقٍ مَرِفِ شِلِ رَ!
بْحّسَ نَ عَرِيَننَ،
مَتْشْي نَ عَلَ بّ هَن كٌورٍ مَ!»
39 قَرِ سّنِ ندٍ نَشٍيٍ نُ نَ حَمَ تَفِ، عٍ نَشَ عَ قَلَ عِسَ بّ، «كَرَ مْشْ، وْيّن عِ قْشِرَبِرّيٍ بّ!» 40 عِسَ نَشَ عٍ يَابِ، «ﭑ شَ عَ قَلَ وٌ بّ، شَ عٍ تَن عٍ سَبَرِ، فّمّيٍ يَتِ قَمَ نّ عٍ شُي رَ مِنِدٍ.»
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)