Mateus 26

يَنقَنتٍيَ عِسَ بّ

1 عِسَ تٌ فّ يِ قٍ بِرِن مَسٍندٍ، عَ نَشَ عَ قَلَ عَ قْشِرَبِرّيٍ بّ، 2 «وٌ عَ كٌلٌن، شِ قِرِن نَن لُشِ سَيَمَلٍكّ دَنفِ سَلِ شَ عَ لِ. نَ تّمُي، عَدَ مَ شَ دِ سَمَ نّ مِشِيٍ بّلّشّ عٍ شَ عَ بَنبَن وُرِ مَفَلَنبُشِ مَ.»

3 نَ وَشَتِ، سّرّشّدُبّ كُنتِفِيٍ نُن يُوِقِيٍ شَ قٌرِيٍ نُ مَلَنشِ كَيَقَ شْنيِ، سّرّشّدُبّ كُنتِفِيٍ شُنيِ. 4 عٍ نَشَ لَن عَ مَ عٍ شَ عِسَ سُشُ يَنقَنتٍيَ سَابُي رَ، عٍ شَ عَ قَشَ. 5 كْنْ عٍ نَشَ عَ قَلَ، «وٌن نَشَ عَ سُشُ سَلِ لْشْي، شَ نَ مُ عَ رَ حَمَ عَ شُنيِ عِكٍلِمَ نّ.»

فِنّ ندٍ قٍ قَنيِ رَبَقٍ عِسَ بّ

6 عِسَ تٌ نُ نَ بٍتَنِ، سِمْن كُنّ كَنيِ شْنيِ، 7 فِنّ ندٍ نَشَ قَ عَ يِرٍ. لَبُندّ تُرٍ نُ نَ عَ يِ رَ، نَشَن سَرٍ شْرْشْ كِ قَنيِ. عَ نُ سَشِ عَ بِتِرّ تٌقَنيِ كُي نَشَن نُ رَقَلَشِ عَلَبَتِرَ فّمّ رَ. عِسَ نُ نَ تٍيبِلِ رَ تّمُي نَشّ، فِنّ نَشَ قَ، عَ نَ لَبُندّ تُرٍ عِقِلِ عِسَ شُنيِ مَ. 8 عِسَ قْشِرَبِرّيٍ تٌ نَ تٌ، عٍ نَشَ شْنْ، عٍ عَ قَلَ، «يِ بِرِن مَكَنَشِ مُنقٍ رَ؟ 9 شَ يِ لَبُندّ تُرٍ سَ مَتِ نُ، كْبِرِ فبٍفبٍ نَن سْتْمَ نُ عَ شَ قٍ رَ، نَ قَن نْ قِدٍ سٍتَرٍيٍ مَ.»

10 عِسَ تٌ نُ عَ كٌلٌن عٍ نَشَن قَلَقٍ عٍ بٌرٍ بّ، عَ نَشَ عَ مَسٍن عٍ بّ، «وٌ نَ يِ فِنّ تْورْقٍ مُنقٍ رَ؟ كّوَلِ قَنيِ نَن يِ كِ، عَ نَشَن نَبَشِ ﭑ بّ. 11 سٍتَرٍيٍ لُمَ نّ وٌ يَ مَ تّمُي بِرِن، كْنْ ﭑ تَن مُ لُمَ وٌ يِ رَ بٍ عَبَدَن شّ. 12 يِ فِنّ تٌ لَبُندّ تُرٍ سَشِ ﭑ قَتٍ مَ، عَ عَ رَبَشِ ﭑ قُرٍ رَفَتَقٍ نَن شَ قٍ مَ. 13 ﭑ شَ نْندِ قَلَ وٌ بّ، عَلَ شَ شِبَارُ قَنيِ سَ كَوَندِ مَ دّدّ دُنِحَ بِرِن كُي، يِ فِنّ شَ كّوَلِ شَ قٍ قَن قَلَمَ نّ، مِشِيٍ شَ عٍ رَتُ عَ شَ قٍ مَ.»

يُدَ سِ شَ يَنقَنتٍيَ

14 نَ تّمُي، يُدَ سِ عِسِكَرِيٌتِ، نَشَن نُ نَ عِسَ قْشِرَبِرّ قُ نُن قِرِنيِيٍ يَ مَ، عَ نَشَ سِفَ سّرّشّدُبّ كُنتِفِيٍ شْن مَ، 15 عَ عٍ مَشْرِن، «وٌ مُنسٍ سٌمَ ﭑ يِ ﭑ شَ عِسَ سَ وٌ بّلّشّ؟» عٍ قَن نَشَ فبٍتِ كٌلٍ تٌنفٌ سَشَن سٌ عَ يِ. 16 كٍلِ نَ تّمُي مَ، عَ نَشَ سٌ وَشَتِ قٍنقٍ عَ نْمَ عِسَ سٌدٍ عٍ يِ رَ تّمُي نَشّ.

سَيَمَلٍكّ دَنفِ سَلِ

17 تَامِ لّبِنِتَرٍ سَلِ تٌ عَ لِ، عَ لْشْي سِنفٍ مَ، عِسَ قْشِرَبِرّيٍ نَشَ سَ عَ مَشْرِن، «عِ وَ مَ مُشُ شَ سَيَمَلٍكّ دَنفِ سَلِ دٌنيِ رَقَلَ عِ بّ مِندٍن؟» 18 عَ نَشَ عٍ يَابِ، «وٌ سِفَ تَا كُي شّمّ ندٍ شْن، وٌ عَ قَلَ عَ بّ، ‹كَرَ مْشْ نَشّ عَ عَ شَ وَشَتِ بَرَ مَكْرّ. عَ وَ مَ سَيَمَلٍكّ دَنفِ سَلِ رَبَقٍ عِ شْنيِ، عَ نُن عَ قْشِرَبِرّيٍ.›» 19 عِسَ قْشِرَبِرّيٍ نَشَ عَ رَبَ عَلْ عِسَ عٍ يَمَرِ كِ نَشّ، عٍ سَيَمَلٍكّ دَنفِ سَلِ دٌنيِ رَقَلَ.

20 نُنمَرٍ تٌ سٌ، عِسَ نُن عَ قْشِرَبِرّ قُ نُن قِرِنيِيٍ نُ نَ تٍيبِلِ رَ. 21 عٍ نُ عٍ دّفٍقٍ تّمُي نَشّ، عَ نَشَ عَ مَسٍن، «ﭑ شَ نْندِ قَلَ وٌ بّ، مِشِ كٍرٍن نَ وٌ يَ مَ نَشَن قَمَ ﭑ يَنقَدٍ.» 22 نَ نَشَ عٍ سُننُن كِ قَنيِ، كَنكَن نَشَ عَ مَشْرِن، «كْنْ ﭑ مَرِفِ، ﭑ تَن مُ عَ رَ دٍ، كَ؟» 23 عَ نَشَ عٍ يَابِ، «ﭑ نُن نَشَن بَرَ بّلّشّ رَفٌرٌ ثَانِ كٍرٍن كُي، نَ كَنيِ نَن ﭑ يَنقَمَ. 24 عَدَ مَ شَ دِ سِفَمَ نّ عَلْ عَ شَ قٍ سّبّشِ كِ نَشّ، كْنْ فبَلٌي نَن نَ عَدَ مَ شَ دِ يَنقَمَ بّ. عَ قِسَ نَ كَنيِ بّ هَلِ عَ مُ بَرِ نُ.» 25 يُدَ سِ نَشَن نُ قَقٍ عَ يَنقَدٍ، عَ نَشَ عِسَ مَشْرِن، «كَرَ مْشْ، ﭑ تَن مُ عَ رَ دٍ، كَ؟» عِسَ نَشَ عَ يَابِ، «عِ تَن نَن عَ قَلَشِ.»

مَرِفِ شَ سّرّشّ تْنشُمَ

26 عٍ تٌ نُ عٍ دّفٍقٍ، عِسَ نَشَ تَامِ تٌنفٌ. عَ تٌ تَنتُي رَ سِفَ عَلَ مَ، عَ نَشَ تَامِ عِفِرَ، عَ عَ سٌ عَ قْشِرَبِرّيٍ يِ رَ، عَ عَ مَسٍن عٍ بّ، عَ نَشّ، «وٌ ﭑ كٌ، وٌ عَ دٌن. يِ قِندِشِ ﭑ قَتٍ نَن نَ.» 27 نَ دَنفِ شَنبِ، عِسَ نَشَ تْنبِلِ قَن تٌنفٌ. عَ مَن تٌ تَنتُي رَ سِفَ عَلَ مَ، عَ نَشَ تْنبِلِ سٌ عٍ يِ رَ، عَ عَ قَلَ عٍ بّ، «وٌ بِرِن شَ عَ مِن. 28 يِ قِندِشِ ﭑ وُلِ نَن نَ، سَاتّ وُلِ نَشَن بَشِ مِشِ فبٍفبٍ بّ عٍ شَ يُنُبِيٍ شَقَرِقٍ رَ.