رْ مَ 13

عَلَ وَشْنقٍ

1 بِرِن شَ عَ يّتّ مَفٌرٌ عَ شَ مَنفّيٍ بّ، بَرِ مَ مَنفّيَ بِرِن كٍلِمَ عَلَ نَن مَ، عَ نَ عَ رَفِرِ نَشَن مَ. 2 نَ نَن عَ رَ، مِشِ نَشَن نَ مَنفّ مَتَندِ، نَ كَنيِ عَلَ نَن شَ يَامَرِ مَتَندِشِ. عَ قَمَ نّ عَ شَ نَ وَلِ كٌبِ سَرٍ سْتْدٍ. 3 وَلِ قَنيِ رَبَيٍ مُ فَاشُمَ مَنفّيٍ يَ رَ، وَلِ كٌبِ رَبَيٍ نَن فَاشُمَ عٍ يَ رَ. شَ عِ مُ وَ مَ عِ شَ فَاشُ مَنفّ يَ رَ، عِ شَ لُ كِرَ قَنيِ نَن شْن مَ. نَ كُي، مَنفّ قَمَ نّ عِ مَتْشْدٍ، 4 بَرِ مَ مَنفّ وَلِمَ عَلَ نَن بّ وٌ شَ مُنَقَنيِ شَ قٍ رَ. كْنْ شَ عِ قٍ كٌبِ رَبَ، عَ لَنمَ عِ شَ فَاشُ، بَرِ مَ سَنتِدّفّمَ مُ نَ مَنفّ يِ قُقَقُ شَ رَ. عَ تٌ نَ عَلَ شَ وَلِ نَن نَ، عَ عَلَ شَ شْنّ نَن مَسٍنمَ قٍ كٌبِ رَبَيٍ شِلِ مَ. 5 نَ نَن عَ تٌشِ، قٌ وٌ شَ وٌ يّتّ مَفٌرٌ نّ مَنفّيٍ بّ. وٌ نَ رَبَمَ نَ حَشَنكَتّ شَ قٍ فَاشُي مَ، عَ نُن مَن وٌ بْحّ نَن يَتِ وَ مَ وٌ شَ عَ رَبَ نَ كِ.

6 وٌ لَن وٌ شَ دُوتِ قِ نَ نَن مَ، بَرِ مَ دُوتِ مَشِلِيٍ قَن نَ عَلَ شَ يَامَرِ نَن نَ. 7 وٌ كَنكَن فبٍ سٌ عَ يِ، عَ لَن عَ شَ نَشَن سْتْ. وٌ دُوتِ سٌ دُوتِ مَشِلِيٍ يِ، وٌ وٌ مَفٌرٌ مِشِيٍ بّ وٌ لَنمَ وٌ شَ وٌ مَفٌرٌ نَشٍيٍ بّ، وٌ مِشِيٍ بِنيَ وٌ لَن وٌ شَ نَشٍيٍ بِنيَ.