1 Moke Teofilus ta ya khoromat awé.

Kyat félé re rlefo sói ta waktu it re Yesusé se Yesusé re npe né. 2 Si rlefo férimé ta si rlongé po kyaté-kyat ta rfadéréré re Yesusé né. Si ta néi ta rlongé re rémnaw férimé ta Yesusé npe né, se rewóré ga réfétén férimé ta néi po kyat iglé nóté. 3 Ya ma re kéflengén fafié férimé ta réfétén re ta rlefo po faiwóbno ta Yesusé nfamdié ni yabé né. Se rewóré ta néi, ta fié né ya ma klefo férimé ta re ndadi i né, po faiwóbno sogado rewóré ndimé, bo kfanaté keé po Moke Teofilus ni. 4 Se ya klefo ta Yesus re npe né bo muné sói ta kyaté-kyaté né re rfasodoto awé né fatuwé ndimé.

5 Po waktu ta Herodesé ndadi kolano po bótén Yudea né, pocé reni agama Yahudi né riri imam isó ngósno Zakharia. I lima imam-imam ta rfangósno Abia né. Ni pégelé njé ngósno Elisabeté. Si dórén luwé né imam Haruné ni ntu re gbu si. 6 Tadélé rmétegél po Jou Lahatala usno lo. Si rdéréré ndimé sói le ta Jou Lahatala nécegé né, se nase reni kyat isó pa ta bisa nfasól si. 7 Bóngo si dórén luwé né re rlégaé re rpégelé, se re bisa rduké nturi pana.

8 Nuéncó, imam Abia riri kelompoké né rduk yabé po Um Sambayang ta npélóyé njé ni. Pocé Zakharia nduk yabé po géwgów ta Jou Lahatala nénénwómo i nje bo nléleyan Jou Lahatala pocé. 9 Sogado i nduk yabé pocé né, sababta waktu ta néi, imam-imam agama Yahudi né répatén undi bo runé pai ta ngósno ncópéné, kyat ta njé i ta bo ntapén ay ta papu mnó po géwgów ta Jou nanénwómo i po min Um Sambayang ta npélóyé njé ni wlólo njé. Se répatén undi njé néya faje, Zakharia ta ngósno ncópéné. 10 Tabóngo ncung némin se ntapén ay ta papu mnó njé pocé. Po tó néliké né ma, reni kyat félé nóté ta rfajólé se rméiténé rdé Jou Lahatala.

11 Pocé télél be Jou Lahatala ni nénan isó yama soroga, nfaftulo i néli po Zakharia ni. Se nosél po géwgów ta ntapén ay ta papu mnó lo né ni féspal wónéyé. 12 Pocé Zakharia némnaw i se ntélélé bóngo tadélé némtaté. 13 Mayta Jou ni nénané njé nécegé i faje, "Zakharia, ma mémtat na! Sababta Jou Lahatala re nlongé ta awé méróré né. Se nim pégelé Elisabeté nase nmawyói yomya món isó. Yomya ta njéi, awé mare mfangósno i Yohanesé. 14 Awé nase tadélé mséngé i, bóngo iga ntubé kyaté-kyaté né ma nase tadélé séngséngé bóto si, 15 sababta nase bo ndadi kyat ta pélóy po Jou Lahatala usno lo. Bóngo ta nhidupé lesu né, nase niném anggur pa re nase nmaféiném pa. Yomya ta njéi, ta i po ni neke ni sno wlólo lesu, Jou ni Roh njé re nkawasa keé i. 16 Se nase n’gali kyat Israel félé rpólén si nmulé bo rdéréré Jou Lahatala, sababta si riri Jou ta rcuba I njé. 17 Yomya ta njé i nase ni kawasa né pélóy, tadolo tatubé lima se nabi Elia né. Se ta Jou nwóm pafule né, i re nwómé ntubé. Bóngo nase npe sogado kyat tut móné né wlori bo rfaifio si re nturi né, re kyat ta rlongé Jou Lahatala ni parenta pa né, nase npe si sogado rngali si se rpe be sói néli ta métegél po Jou Lahatala ni. Sababta i npe fajé bo kyaté-kyaté né rfasadia si bo rdadi Jou Lahatala ni kyat si."

18 Mayta Zakharia nutné Jou ni nénan ta i yama soroga njé, "Fanfawa bo sogado kuné ta ya re nik pégelé bo kduké ntumamé nóté? Sababta am dórén luwé nte re klégaé re kpégelé."

19 Tabóngo Jou ni nénané njé nécegé i faje, "Ya nte Gabriel. Ya kakénpe sói ta Jou Lahatala nané ya né. Se nte I nané ya kfébingé habar ta nfié nje po aw ni. 20 Se ta ya kécego awé nte bo ndadi i po waktu ta Jou Lahatala re nécegé né. Mayta awé mdélé pa ta ya kécegé nte, se nete óro, awé nase mmamewé, sogado férimé ta kécegé nte re ndadi i ndimé."

21 Kyat félé ta rméiténé rdé Jou Lahatala po tó néliké né ma, raréftón be Zakharia le. Pocé rherané, sababta Zakharia tadélé némnuw po miné, se rarénutné po wlori wlólo né réceg faje, "Pe sói se némnuwé?" 22 Pocé télél be Zakharia ncópén tóma né re bisa nméitén pana sababta re nmamewé. Se nméiténé né maduga néftul be néli re lima. Se kyaté-kyat ta réftón i po tó néliké né, si re runé óro Jou Lahatala re nfaftulo i sói néli po min Um Sambayang ta npélóyé njé ni wlólo né.

23 Pocé Zakharia re nfawóré ni yabé né ndimé, tabóngo néléy po ni umé lo. 24 Mnuw pa, ni pégelé Elisabeté npe lapo. Se ni mnuo sni sélimé né re nfanfané i pana, se i be po umé wlólo le. 25 Pocé tabóngo néceg faje, "Jou re nfaftulo ni féyfié né po ya ni. I re n’gali ya, sogado ya nte re kpe lapogé, se kmóé ya pana po férimé kyaté."

26 Elisabeté npe lapo ni mnuo sni séwonémé, tabóngo Jou Lahatala nané ni nénan Gabriel ta i yama soroga njé nfan po kota isó, po bótén Galilea ta ngósno Nazaret. 27 Po mépiné mya isó, ngósno Maria. Maria njé nuné món pafule, mayta i re món isó ngósno Yusufé, si dórén luwé né re rfajaji ta bo réfsówé. Yusufé njé kolano Daudé ni ntu re gbu i. 28 Pocé tabóngo Jou ni nénané njé nwómo Maria se nécegé i faje, "Tabea, mépiné mya ta awé! Jou bo nfaftulo ni féyfié né po aw ni. I nase ndéréré awé le."

29 Pocé Maria nlongé ta nécegé né, télél i. Se nanénutné po wlo wlólo, ‘Jou ni nénané njé ni maksud sói?’ 30 Tabóngo Jou ni nénané njé nécegé i faje, "Maria, ma mémtat na, sababta Jou Lahatala bo nfaftulo ni féyfié né po aw ni. 31 Re mnuw pana awé nase mpe lapomé, se nase mawyói yomya món isó. Yomya ta njé i, mare mfangósno I, ‘Yesusé’. 32 I bo ndadi kyat ta pélóy I. Se kyaté né nase rkakmé I, Jou Lahatala ta nkawasa nje ni ntu I. Bóngo bo npo I nkawasa ta dolo ni délut tatubé lima se kolano Daudé né. 33 I nase ndadi Kolano po férimé kyat Israelé né riri nturi re gburi né, bóngo nkawasa po si ni sogado fajé néli le."

34 Maria nlongé ta néceg faje né, tabóngo nécegé i faje, "Fanfawa necé nase bo ndadi i? Sababta ya nte mépiné mya ya lesu, kuné món pafule."

35 Tabóngo Jou ni nénané njé nécegé i faje, "Jou ni Rohé njé nase bo nwómo awé, bóngo ni kawasa né nase nkawasa keé awé. Se yomya ta bo mfantuné I njé nase tadélé nfié re nbirahi, bóngo férimé kyaté nase rkakmé I Jou Lahatala ni ntu I. 36 Necé le pa ta bo kfabingo awé né, fténom Elisabeté ma masike re npégelé se kyaté-kyaté né récegé nase re nduké ntu pana, mayta nte re npe lapo óro, reni sni sawónémé, yomya món i. 37 Férimé né bisa ndadi i, sababta sói le Jou Lahatala bisa npe ndimé."

38 Pocé tabóngo Maria nécegé i faje, "Ya nte kyat ta maduga kpe be sói néli ta Jou Lahatala nané ya né. Mayta ta mécegé né faje bo ndadi i po ya ni óro." Rewóré ta néi, Jou ni nénané njé nfatoléné keé Maria.

39 Pocé se néli mnuw pa, tabóngo Maria nbablé se nfan po kota isó, po géwgów ta nmamétét i lo né po bótén Yudea, 40 bo nfan po Zakharia ni umé lo. Se re nwómé ntéli, tabóngo ncung néminé se néceg tabea po Elisabet ni.

41 Pocé Elisabeté nlongé ta néceg tabea né, tabóngo yomya ta i po ni sno wlólo njé nméyawén néli re lima, pocé bóngo Jou ni Roh njé ma nkawasa keé Elisabeté. 42 Bóngo Elisabeté néceg re gli ta pélóyé, "Maria! Jou Lahatala re nfaftulo ni féyfié po aw ni né, lebe pélóy po férimé mépiné! Ni féyfié né nase npo po yomya ta bo ntubé njé ni. 43 Ya nte tadélé kséngé, sababta masike renik ngale gélesó pa ma, Jou ni neke nje re nwómo ya lima. 44 Péséwé klongé glim ta méceg tabea né, ntig ta i po snogé wlólo nje ncéngé se nméyawén néli re lima. 45 Awé tadélé mséngé óro, sababta re mdélé sói ta Jou nécegé né nase bo ndadi i."

46 Tabóngo Maria néceg faje,

"Ya ktail Jou Lahatala.

47 Ya wlegé njé tadélé séngséngé bóto i,

sababta Jou Lahatala ta nfasalamat ya.

48 Sababta, I re nmésié ya, masike ya renik ngale gélesó pa.

Ya nte maduga kpe be sói ta Jou Lahatala nané ya né.

Pote se néli, férimé kyaté bo récegé ya nte ta tadélé kséngé.

49 Sababta Jou Lahatala ta nkawasa njé re npo ta fié po ya ni. I óro ta nfie re nbirahi né.

50 Jou Lahatala re nfaftulo ni mésié po kyaté-kyat ta rdélé I né,

po nturi re gburi, sogado wes re félbawé.

51 I ni kawasa né tadélé pélóyé, se sói le ta I npe né fié re birahi ndimé.

Bóngo kyat ta rfaséngé si né, nfarwaé keé si se naita msakori.

52 Re nésólé keé kolano-kolano né,

se nélóngé keé kyaté-kyat ta re riri ngale gélesó pa né.

53 Tabóngo npo sói ta fié po kyaté-kyat ta reriri reróri pa né sogado nbung si,

mayta kyaté-kyat ta rkayangé né ga nané si rfané né rut gélesó pa.

54 Jou Lahatala n’gali kyaté-kyat Israel ta I re npili si né, bo rpe sói ta I nané si né.

I n’gali si, sababta nfatalolmo ni jaji ta nase bo nfaftulo ni mésié né po si ni.

55 I nfaftulo ni mésié po ité rir délut tatubé lima nesté, Abrahamé i re ni ntu re gbu sogado wes re falbawé.

Jou ni jaji ta néi, re néceg po tatubé lima lesu, se necé nase bo ndadi i sogado fajé néli le."

56 Pocé tabóngo Maria ntolno Elisabeté né nihalé sni sételé, ga néléy po ni umé lo.

57 Pocé Elisabeté npe lapo sogado re nwómo ni waktu ta bo nmawyóyé ro, se nmawyóyé, ni ntu nje món i. 58 Pocé, kyaté-kyat ta rtolén néli re lima po Elisabeté ni um lapo lo né, bóngo fténo re ramo né, rlongé ta Jou re nfaftulo ni mésié po i ni né, tabóngo férimé si rwómé se rfangséngo si.

59 Po waktu ta yomya njé reni ngané walé né mare rcunat i, rdéréré agama Yahudi ni aturané. Se kyaté-kyat ta rtolén néli re lima po Elisabeté ni um lapo bóngo fténo re ramo né rwómé rfajól pocé nóté. Bo rfangósno yomya njé Zakharia, nfamgo re ni moke njé ni ngósno né. 60 Mayta ni neke njé wlo pa. Se nécegé si faje, "Matiné! Mare tfangósno i Yohanesé."

61 Tabóngo kyaté-kyat ta si pocé né récegé i faje, "Mayta po férimé faftén re farémóné mewé né, reni isó pa ta ngósno Yohanesé." 62 Pocé tabóngo rutné Zakharia né rfaftulo re faori, ta ni ngale né, "Ntimé nje bo mfangósno i pai?"

63 Tabóngo Zakharia néror lóy ta rpaké rlefo né, nfaftulo re fao se rpo i. Bóngo nlefo né ni glio faje, "I ni ngósno né Yohanesé." Se férimé kyat ta pocé né rherané.

64 Tabóngo po waktu ta néi óro, Zakharia re bisa nméiténé nmulé, pocé ga ntail Jou Lahatala. 65 Se férimé kyat ta rtoléné se rérakén pocé né rherané bóngo rémtaté, sababta rémnaw sói ta re ndadi i né. Tabóngo réféténé keé néli re lima, sogado po pnuw re pnuw po bótén Yudea ta po métét papo lo né. 66 Se férimé kyat ta si pocé se rlongé né, rarénutné po wlori wlólo, "Yomya ta njé i, sogado npélóyé, nase bo ndadi i sói?" Si rarénuta fajé né, sababta si re runé Jou re npo ni kawasa né po yomya njé ni.

67 Rewóré ta néi, Jou ni Roh njé nkawasa keé Yohanesé ni moke Zakharia. Se nfébingé sói ta Jou Lahatala nécego i né, ni glio faje,

68 "Lima bo ttail Jou Lahatala, kyat Israelé né riri Jou I!

Sababta I re nwómé n’gali ni kyaté-kyat Israelé né se nfabebasé keé si.

69 I re nélóngé kyat isó ta ni kawasa né tadélé pélóyé, bo nfasalamaté keé ité.

Kyat ta njéi kolano Daudé ni ntu re gbu I.

Kolano Daudé njé kyat ta nanénpe be sói néli ta Jou Lahatala nané i né.

70 Jou Lahatala re néjaji ta néi po tatubé lima lesu, se I ni nabi-nabi nesté rfébingé I ni jaji né ta dolo faje:

71 Jou bo nfabebasé keé it po rir réwé-réwé, re po kyaté-kyat ta riri lé keé ité né, bo ma rkawasa ité le na.

72 I bo npe fajé né, sababta nfatélolmo ta I re néjaji po rir délut tatubé lima nesté.

I nfatélolmo ni jaji ta fié re birahi,

se nfaftulo ni mésié né po si ni.

73 Jaji ta Jou Lahatala nécegé né re ncasi po Abraham ni, ité rir délut tatubé lima njé,

74 I néjaji bo nfabebas it po rir réwé-réwé nesté ni,

re bo n’gali ité bo tcuba I né ma témtat na.

75 Se ta thidup po dunia wlólo lesu né, mare tpe be sói néli ta Jou Lahatala wlo ncuka né,

re tpe be sói néli ta métegél po Jou Lahatala usno lo."

76 Rewóré ta néi, Zakharia nécegé Yohanes faje,

"Se awé nte ya ntig awé.

Pote se néli kyaté né nase récegé awé nabi isó ta I lima Jou Lahatala ta nkawasa njé ni, ta nanénfawómo Jou ni faftóté po kyaté-kyaté njé.

Si réceg fajé né, sababta ta Jou nwóm pafule né, awé re mwómé ntubé bo mfasadia kyaté-kyaté né wlori bo rtarima I.

77 Awé bo mfébingo Jou Lahatala ni kyaté-kyaté né bo runé ta I bo nfayangésé keé róri sélsólé né bo rduk salamaté.

78 Ité rir Jou Lahatala njé tadélé nmésié ité se bo nfasalamaté keé ité.

Se ta I nwóm yama soroga wlólo né,

ni manano né nase tadolo tamémóné se ngénngané njé ncó néya né.

79 Sababta I nwómé né bo nfamanano ni kyaté-kyat ta rhidup po dérorémé wlólo né,

ta riri hidup be maduga rémtaté le né.

Se nwóm po it ni, bo tuné yéfén ta nfié njé bo wloré né nténgéné."

80 Zakharia ni ntu Yohanesé ngénngan néya nbóng ta lebe npélóyé, bóngo Jou nbóng ta nfakwat ni wlo njé. Se re npélóyé, tabóngo ntolén i po géwgów esó ta sésé bóto i bóngo nélówé pnuwé, sogado bo nfafané ni yabé po kyaté-kyat Israelé né, ga tagare nfatoléné keé géwgów ta néi.