1 Rewóré ta néi, Yesusé nkakémé kyat yóféfit po kyaté-kyat ta rdéréré I né. Se nané si rfané né rfadéréré faséluw-séluwé, bo rtubé po kota re géwgów ta nase I bo nfano lo né. 2 Pocé tabóngo nécegé si faje, "Kyaté-kyat ta wlori ncuka bo rdéréré Ya né, tadélé rfélé. Ya kfatailo si né tadolo gandum ta po bété lo se re ncimo i né, mayta kyaté-kyat ta bo rfalingété né maduga cuci le. Se mewé mare féror néya po Jou Lahatala ta I nó bét gandumé njé, bo nbóngé ni kyaté-kyat ta bo rfalingété nóté.

3 Nete ffané ro, mayta ffatélolmo mew fafié, sababta ta Ya kané mewé ffano né félé be kyaté-kyat léo, se kfatailo mewé né ta dolo domba ni ntu ta nfan po yaw banga né riri fapéluné. 4 Re iga ffané, ndél pa bo fut pipisé, sandalé, re ndél pa bo fméitén félé po kyat pai le, bo ffané le.

5 Iga fsung po kyaté ni umé féceg faje, ‘Tabea, kéroré bo Jou ni féyfié né pélóy po mew ta po umé wlólo nte bo wlomi né nténgéné.’ 6 Pocé iga kyat ta po umé wlólo né ga wlori fié se ruté mew fié, Jou ni barakat ta féroré né nase tadélé pélóy po si ni. Mayta iga wlori le se ruté mew lé, Jou ni barakat ta féroré né nase rduk pa. 7 Tabóngo iga reni kyat ta ruté mew fié, ftolén pocé óro, ndél pa bo flué mew néli re lima nóté. Fó re finémé le, sói ta rdo mewé né. Sababta pai ta npe yabé, i ma mare nduké ni palpólese. 8 Se iga fsung po pnuw faisó, ga kyat ta si pocé né ga ruté mew fié, fó le sói ta rdo mewé né. 9 Bóngo ffafié kyat ta rpisé pocé né, re fébingo si, ‘Re mnuw pa na, Jou Lahatala nase nkawasa dolo Kolano po ni kyaté-kyat ta rdélé I né.’ 10 Mayta iga ffan po pnuw faisó, ga ni kyaté ta pocé né ruté mew lé, ffan po yéfén ta pélóyé lo né, bo fécegé né ffakwaté mewé, 11 ‘Mewé wlomi pa bo flongé Habar ta Fié lima Jou Lahatala ni, se amé bo kfatoléné keé pnuw ta njei óro, bóngo pnuwé njé ni péplaé ta natéf po sóomamé lo nte nase kfaptibé am pote, bo funé ta mewé re fsól po Jou Lahatala ni. Mayta fatélolmo mew fafié: sababta nte óro Jou Lahatala bo nkawasa dolo Kolano po ni kyaté-kyat ta rdélé I né, mayta mewé wlomi pa.’ "

12 Tabóngo Yesusé nécegé nóté po ni motemote nesté ni, "Ffatélolmo mew fafié, sababta pote se néli dunia nje nase bo nkiamaté. Po ngénngan ta néi, Jou Lahatala nase nfasólo keé kyaté-kyat ta rtolén po kota njé se rétófé mewé né, hukuman ta si rduké né nase lebe météw po ta kota Sodomé nduké né."

13 Yesusé nécegé nóté, "Sené mewé, kyaté-kyat Khorazim re Betsaida né! Mewé nase fkangelangé! Sababta re fémnaw mujizat félé ta kpe po nimi pnuwé lo né, mayta fngali mew pa, bóngo fdélé Ya pa. Mujizat ta néi, iga kpe po kyaté-kyat ta si po kota Tirus re Sidoné né, masike rdéréré Jou pafule mayta nase rngali si se rfapelé keé paplaé né po bobokori lo. Bóngo, réngalno si re kabaya né karongé. Necé ni ngale né, rfatélolmo róri sélsólé né se rtangésé. 14 Pote se néli Jou nase bo nadili férimé kyaté, mayta kyat Tirus re Sidoné né, nase róri sélsólé né lebe manóné po mew ni. 15 Re mew ta ftolén po kota Kapernaumé né, mewé facogoma Jou bo nélóngé mew néya po soroga wlólo? Tisé! Mayta nase nwóté keé mew po naraka njé ni wlólo."

16 Rewóré ta néi, Yesusé nécegé kyaté-kyat ta rdéréré I né, "Kyaté ta rlongé mewé né, necé ta dolo rlongé Ya. Mayta ta rétófé mewé né, necé ta dolo rétóf Ya nóté. Se kyat pai ta nétóf Ya, nejé ta dolo nétóf Jou Lahatala ta nané Ya kwómé njé."

17 Kyat yóféfit ta Yesusé nané si né, re rpólén si nmulé re séngséngé bóto si. Tabóngo récegé Yesus faje, "Jou, setan-setané né ma rlongé amé, sababta ta amé kféungé si né, amé kéceg Awé ngósnomé."

18 Tabóngo Yesusé nécegé si faje, "Iya, fatuwé. Ya re kémnaw setané né riri kolano njé némnap yama langété né, ta dolo lémlém i. 19 Se fatélolmo mew fafié, ta kécego mewé nte. Kawasa ta re kpo mewé né, masike ffateglo guw bisa pari, bébyatéf pari, fféungé setané né riri kolano njé pari, nase réfené mew pa. Sababta kawasa ta njé i, nase isó ta bisa nfakangelangé mewé pa. 20 Se masike faje, ma fséngé na ta setané né rlongé nimi parenta né, mayta ta fséngé né ta ngósnomi né re rlefo po soroga wlólo né."

21 Po waktu ta néi óro, Jou Lahatala ni Rohé njé nkawasa keé Yesusé ni wlo njé se tadélé ncéngé. Bóngo nméiténé ndé Jou Lahatala né, néceg faje, "Moke, Ya kéceg syukur fapélóy po Aw ni né. Awé ta mkawasa po langét re po dunia wlólo nte. Kéceg syukur sababta Anim faftóté ta kfawómo kyaté né, mépino keé kyaté-kyat ta rpélóy ta cogo runé félé né. Mayta kyaté-kyat ta mya ta runé gélesó pa né ga mpe sogado rcae se rdéréré sói ta Awé mécegé né. Moke, nece ta mpe né sogado tadélé mgó wlemé.

22 Se férimé ta po nik Moke ni né, re npo keé Ya ndimé. Ya nte Intu Ya, mayta isó pa ta nuné Ya, maduga nik Moke I ta nuné Ya. Fajé nóté re nik moke, isó ta nuné I pa, maduga Intu Ya le re kyaté-kyat ta re kéftul si né ta kuné I."

23 Rewóré ta néi, Yesusé néngóto ni motemote nesté se nécegé si faje, "Mewé nte mare fséngé, sababta sói ta Ya re kpe né, férimé re fémnawé. 24 Tatubé lima né, reni nabi re kolano félé ta wlori ncuka bo rlongé re rémnawé sói ta mewé re flongé re fémnawé nte, mayta rdótlé pa sababta re rmót si ndimé."

25 Nuéncó, reni guru agama isó ta nuné fié Musa ni kitab abén limé né, bo néyówé Yesusé nó sélsólé. Se nosélé bóngo nutné, "Guru, ya mare kpe fanfawa bo kduk ta fié sogado fajé néli le?"

26 Tabóngo Yesusé nutné i nmulé, "Aturan sói ta rlefo po Musa ni kitab abén limé lo né? Sói ta awé re mbaca pocé né?"

27 Tabóngo i ncónglo, "Ta rlefo pocé né, ni glio faje, ‘Mewé mare fmésié Jou Lahatala re férimé ta po nimi diri wlólo né, sababta I ro ta mewé nimi Jou I. Bo fmésié I né, mare nimi mésié né tadélé pélóy po férimé ta fmésié si né, fmésié I né ffakwaté mewé bo fpe ta I nané mewé né, re flolém I né ma ftébné na. Bóngo fmésié kyaté-kyaté né, ta dolo fmésié mew nimi diri nóté.’ "

28 Yesusé nécegé kyat Yahudi né riri guru agama njé faje, "Fatuwé, ta awé mécegé né! Se iga mpe fajé, nase bo mduk ta fié né sogado fajé néli le."

29 Mayta guru agama njé, wlo ncuka bo kyaté-kyaté né runé ta i re nmétegélé, bóngo nutné Yesusé nóté, "Se kyaté-kyat ta ya bo kmésié si né, pai?"

30 Tabóngo Yesusé ncóngélé né, npe adeade isó njé ni glio faje, "Reni món isó nje, kyat Yahudi i. Ntebé yama kota Yerusalemé, bo nfan po kota Yerikho. Pocé po yéfén fapéluno né, nfapdipén re kyat léo, se rpun i sogado rebo nmóté. Tabóngo ni gina ta nuté né ma ryó keé ndimé, ga rfatoléné keé i pocé.

31 Mnuw pa, télél be reni kyat Yahudi né riri imam isó, ndélo yéfén ta njéi se némnawé kyat ta rpun i njé, mayta npalété se ndé i po yéfén lapo lo ga nfalów i le. 32 Fajé nóté re kyat Yahudi isó nóté, i lima suku Lewi*. I ma ndélo yéfén ta njéi, mayta némnaw i né, npalété se nfalów i nóté.

33 Mnuw pa, reni kyat isó nóté nwóm lima bótén Samaria, ta nélówé géwgów ta néi. Se re nwóm pocé, némnaw kyat ta rpun i njé tabóngo nmésié i. 34 Pocé nfarakné i néli se nfaberési ni yóbété né ga néuso re angguré, bóngo nurémé keé re yégété se nbólété. Rewóré ta néi ga ncaplé i néya po ni keledai njé ni papo lo se nut i po penginapan ta i bo nyénfo i lo njé. Pocé ga nléléyan i fafié. 35 Ni tamémóné né, npo pipis salaka péluw po kyat ta ni penginapané njé, bóngo nécegé i faje, ‘Moke, mgali bo mléléyané kyaté nje fafié, ni pipisé nte. Iga nbung pa, kpólén ya lima nmulé ga kbóngé nóté.’ " Kyat Samaria ta wlo fié po kyat nésé

36 Rewóré ta néi, Yesusé nutné guru agama njé faje, "Se iga mewé, po kyat sételé nesté pai ta nfaftulo ni mésié po kyat ta rpun i njé ni?"

37 Tabóngo guru agama njé ncónglo, "Kyat ta re nfaftulo ni mésié se n’gali i njé."

Tabóngo nécegé guru agama njé faje, "Fatuwé, ta awé msóngélé né! Se nte óro, mfané bo mpe ta dolo fajé nóté."

38 Waktu ta Yesusé I re ni motemote nesté bo rfan po kota Yerusalemé né, rtilé si po pnuw isó ni. Pocé, reni mépin isó ngósno Marta. Nkakém Yesusé bo nfan po ni umé lo. 39 Marta njé reni fténo isó, ngósno Maria. Ta Yesusé I po Maria i re Marta riri umé lo né, Maria ntolén re Yesusé bo nlongé ni dodoto. 40 Marta ga maduga i po dapuré lo se npe mnómé. Tabóngo nosél po Yesusé lapo, bóngo néceg faje, "Jou, mpe sói se mfaténténgén Awé? Ya nte kpe yabé né kkumél ya. Se mané fténogé njé bo n’gali ya su!"

41 Mayta Jou Yesusé nécegé i faje, "Marta, awé nte ménuta be yabé ta félé né sogado wlemé njé nkangelangé. 42 Padahalé, ta fié né maduga esó le, nete ta Maria re ntoléné se nlongé nik dodoto nte. Se nase reni kyat isó pa ta bisa néyó keé sói ta i re nlongé né."