Marcos 12

Adeade kyat ta réjaga bété

1 Pocé Yesusé nméiténé ndé imam-imam kapala, re guru-guru agama Yahudi ta runé fié Musa ni kitab abén limé né, re kyat tut Yahudi né, bóngo npeo si adeade né néceg faje, "Reni kyat isó npe nó bété. Bété njé ntónmo i re angguré, bóngo néjelo i re pagaré. Angguré né pyono pafule, re nóléyé mdóké bo npe góo ntubé. Bo iga angguré né re pyono ga ringété, ni géo né bisa rpe pocé. Bóngo npe umé mlóngé isó po nó bété lo né, se nané kyat ta bo réjaga nó bété njé rtolén pocé. Rewóré ta néi, ga nfané se ntolén i po pnuw ta lówé. 2 Sogado angguré né pyoné se re nwómo ni waktu ta bo ringét óro, bóngo nané ni kyat yabé isó nfan néli po kyat ta réjaga nó bété njé ni, bo néyó nó téné né. 3 Mayta nfan néli né, kyat ta réjaga bété nesté régbi i se rfaspésé i ga rané i néléyé né nut gélesó pa. 4 Rewóré ta néi, légaé ta nó bété njé nané ni kyat yabé isó nóté nfan néli. Mayta néli né i ma rpun i sogado baboko njé ma nyóbété ndimé, bóngo rfaméimóyé keé i. 5 Tabóngo légaé njé nané isó nóté nfan néli. Néli né, rpun i sogado rfamót keé i. Pocé, nané kyat félé nóté ta rfan néli né, mayta si ma rduk pénpun sogado iglé né rmóté. 6 Nete góli be kyat isó, kyat ta njéi légaé njé ni ntu tadélé nmésié i njé. Bóngo nané ni ntu njé npe néli nóté. Sababta nénuta, ‘Iga ya ntigé njé npe néli ga rfayal i, nase rmésié bóngo rpo i ya nak téné né.’

7 Mayta kyaté-kyat ta réjaga bété nesté rémnaw i tabóngo rfalécego faje, ‘Ta npe lima nje, légaé ta nó bété njé ntu i. Yomya ta njéi, iga légaé njé nmóté, i ta nase bo nyó bété nje né. Se ta fié né tpun i bo tfamóté keé i, bo téyó keé nó bété nje.’ 8 Tabóngo régbi keé ni ntu njé, se rpun i sogado rfamóté keé i, bóngo rwóté keé I nétó npo bété njé ni lapo lo né."

9 Pocé Yesusé néfétno si adeade njé re wóré, tabóngo nutné si, "Se nte, légaé ta nó bété njé nase bo npe si fawa? I nase npe néli bo npuné keé si, tagare nyó keé bété njé nmulé, bo npo keé kyat nésé bo réjaga i nóté.

10 Mewé ma re funé ta rlefo po Jou Lahatala ni buké wlólo né. Pocé rfatailo Ya dolo lóyé, mayta fsae pa. Ta rlefo né faje,

‘Reni lóy pusó, kyat ta rpe umé né réngóto i dolo reni ngale pa se rpake i pa, ga rwóté keé i.

Lóy ta njéi óro ta Jou Lahatala nyó i ga npake i bo nfamdié umé njé ni fandasi né bo kuaté.

11 Jou Lahatala npe fajé né, sogado témnawé ma tadélé fié.’ "

12 Pocé kyat tut Yahudi rlongé adeade ta péséwé njé né, tabóngo ryó ni ngale, sababta runé ta Yesusé nfatailo si dolo kyat ta réjaga bété nesté. Pocé bóngo rcawané se réyówé yéféné bo rgó I, mayta rémtaté kyat ta félé né se rfan si.

Kyat tut Yahudi né bo réyówé Yesusé nó sélsólé se rutné I bo tpólés pajak pari tisé

13 Rewóré ta néi, kyat ta rkawasa po agama Yahudi nesté rané kyat séfis néli ta rdéréré dodoto Farisi né re kyat ta rdéréré kolano Herodesé né, rfané rutné Yesusé bo réyówé nó sélsólé. 14 Si néli po Yesus ni ga rutné I faje, "Guru, amé kuné Awé kyat ta mmétegélé. Iga mfasodoto kyaté né, nim méiténé né ma manpalté pa. Sababta po Aw ni, kyat ta rpélóy pari kyat ta rémya pari, nfamgo ndimé. Ta mécegé né, lima Jou Lahatala ni ndimé. Se am lima nte bo kutné Awé. Kolano Roma ta nkawasa po ité rir bóténé lo nte, nané ité tpólés pajak po i ni. Bo tdéréré aturan ta po Musa ni Kitab abén limé né, necé mare tpólés pari tisé?"

15 Mayta Yesusé nuné keé wlori wlólo né se nécegé si faje, "Ce, pe sói se ga féyówé nak sélsólé? Coba fpo nimi pipis ta fénpólso pajaké né fapusó lima bo kémnaw i."

16 Pocé bóngo rpo pipis pusó néli po Yesus ni, bóngo Yesusé nutné si, "Gambar re ngósén ta nte, pai ta ni?"

Si rcónglo I, "Kolano Roma ta npélóyé njé ni."

17 Tabóngo Yesusé nécegé si, "Sói ta kolano njé ni, fpo néli po kolano njé ni. Sói ta Jou Lahatala ni, fpo néli po Jou Lahatala ni!" Rlongé ta Yesusé néceg fajé né, kyat ta rutné I né tadélé rdéngó.

Yesusé nfasodoto si kyat ta rmóté nase rpangéné nmulé

18 Reni kyat agama Yahudi iglé ta rdéréré dodoto Saduki rwóm po Yesus ni. Dodoto Saduki né, iga re tmóté né nase tpangén pana. Se néli rutné Yesusé faje, 19 "Guru, tatubé lima nabi Musa nfasodoto amé né, iga món pai le ta re néfsówé ga nmóté se re ntu pa, mare ni fténo faisó nafsóo ni balo njé, bo fténo ta nmóté njé ma nduké ntu re gbu nóté. 20 Mayta reni ta re ndadi tadolo fajé né: Reni món faftén si dórén fité, bóngo ta nténlóyé njé nafsóo mépin isó, mayta re nturi pafule móné njé nmót i. 21 Bóngo ni fténo ta i pópo njé nafsóo ni balo nje, mayta i ma re ntu pafule nmót i nóté. Ni fténo isó nóté nafsóo balo njé se nmóté nóté, mayta re ntu pafule. 22 Sogado món faftén si dóren fité né rafsóo i ndimé, mayta re nturi pafule, re rmót si ndimé. Ni wóré nópé, mépiné njé ma nmót i. 23 Se nte amé bo kutné, iga dunia njé nkiamaté ga kyat ta rmóté né rpangéné nmulé, món ta i pua ta mépiné njé ni légaé i, sababta si dórén fité né re rafsóo i ndimé?"

24 Tabóngo Yesusé nécegé si faje, "Mewé nte ta délé re fsólé, sababta fsae pa Jou Lahatala ni méiténé né. Re funé pa Jou Lahatala ni kawasa né. 25 Sababta iga Jou Lahatala nfapangéné nmulé kyat ta rmóté né, nase rafsów pana, se isó ta ni pégelé i pa. Nase riri hidupé né tadolo Jou Lahatala ni nénan ta si po soroga lo né.

26 Se kyat ta rmóté ga rpangéné nmulé né, mewé re fwaca to? Maitén ta rlefo po nabi Musa ni kitabé wlólo né. Waktu ta i po gamuné gamgamén ta nbablobé njé ni lapo lo né, Jou Lahatala nécegé nabi Musa faje, ‘Ya ta nte I óro, Jou Lahatala ta Abraham, Ishak re Yakobé rancuba Ya né.’ 27 Waktu ta néi, Abrahamé, Ishak re Yakobé re rmóté, mayta si re rpangéné se rhidup re Jou Lahatala nmulé. Se mewé kyat Saduki né, nimi dodoto né ta délé sólé. Sababta Jou Lahatala njé, kyat ta rmóté né riri Jou I pa, mayta kyat ta rhidupé né riri Jou I."

Jou Lahatala nané ité tmésié I, re tmésié kyaté nóté

(Mat. 22:34-40, Luk. 10:25-28)

28 Waktu ta néi, reni guru agama isó ta nuné fié Musa ni kitab abén limé né nwómé. I ma nlongé ta Yesusé I re kyaté-kyat ta rdéréré dodoto Saduki né, rfatutén péséwé né. Pocé i re nuné ta Yesusé ncóngélé né, fatuwé. Tabóngo i ma nfarakné i néli po Yesus ni se nutné I, "Farimé ta Jou Lahatala nané ité tpe né, ta i pua ta lebe npenting po farimé ta I nané ité né?"

29 Bóngo Yesusé néceg faje, "Dodoto ta npenting po farimé ta I nané ité né fanfaje: Kyaté-kyat Israel ta mewé, flongé fafié. Jou Lahatala njé ité rir Jou I, maduga Isó ta njéi óro. 30 Se mewé mare fatuw-fatuwé fmasié Jou Lahatala, sababta mewé nimi Jou I. Se mewé mare tadélé fmasié I né lebe pélóy po farimé ta mewé fmasié si né, iga fmasié I mare flolém I ngénngan néya, re mare ffakwaté mewé bo fpe ta Jou nané ité tpe né. 31 Reni dodoto ta esó nóté né tadolo faje, ‘Mewé mare fmasié kyaté né tadolo fmasié nimi diri né nóté.’ Po farimé ta Jou Lahatala nané ité né, reni pana ta lebe npenting tadolo abén luw ta né i."

32 Rewóré ta néi, guru agama njé nécegé Yesus faje, "Ta délé fatuwé Guru, ta Awé mécegé né. Sababta Jou Lahatala njé maduga isó le, reni ta nésé pana, maduga ta njé I ro. 33 Se ité mare fatuw-fatuwé tmasié Jou Lahatala, sababta ite rir Jou I. Ité mare tlolém I ngénngan néya, bóngo tfakwaté ité bo tpe ta Jou nané ité tpe né, re ité mare tmasié kyat iglé nóté ta dolo tmasié ité rir diri óro. Bo tdéréré dodoto abén luw ta néi, ta délé fié. Masike tpeé rir Sadaka re haiwan sói nóté, mayta nfamgo pa re dodoto ta lebe npenting po farimé abén luw ta néi."

34 Pocé Yesusé nlongé ta ncóngélé né fié, bóngo Yesusé nécegé i faje, "Awé nte re bo mdadi Jou Lahatala ni kyat ta bo nkawasa dolo Kolano po nim hidupé wlólo."

Rewóré ta néi, reni isó pana ta bo nutné po Jou Yesus ni nóté.

Mesiasé nje kolano Daudé ni ntu re gbu I, bóngo i ni Jou I nóté

35 Waktu ta Yesusé nfasodoto kyat po agama Yahudi né riri Um Sambayang ta npélóyé njé ni kintalé lo né, nécegé si faje, "Guru-guru agama Yahudi ta runé fié Musa ni kitab abén limé, iga si rfasodoto mewé né, récegé cogo Mesias ta Jou Lahatala néjaji bo nwómé njé, kolano Daudé ni ntu re gbu I. Necé fatuwé, Mesiasé njé maduga kolano Daudé le ta ni ntu re gbu I?" 36 Momongo waktu Jou ni roh njé nkawasa keé kolano Daudé se nfébingé né, néceg faje,

"Jou Lahatala nécegé nik Jou njé ni né, tadolo faje,

‘Mtolno óro géwgów ta fié po nik faspal wónéyé né.

Kyat ta riri lé Awé né,

nase kpe sogado rlongé Awé.’

37 Se iga kolano Daudé nécegé Mesiasé njé i ni Jou I, pe sói se ité bo técegé Mesiasé njé maduga kolano Daudé ntu re gbu I?" Pocé kyat ta félé né wlori ncuka rlongé ta Yesusé nécegé né.

Ma ttalko guru agama Yahudi re kyat Farisi riri tabeaté né na

38 Pocé tabóngo Yesusé nfébingo si nóté, "Mewé mare fpe mew fafié po guru-guru agama Yahudi ta runé fié Musa ni kitab abén limé nesté ni. Sababta si ta né i, iga rfané wlori ncuka rpake juba ta mlóngé, bo réyówé be ngósnori po kyat ta félé né usnori lo. 39 Se iga rcung po um sambayang re po rameangé wlólo né, wlori ncuka réyówé be géwgów ta fié bo kyaté né rtail si. 40 Si ta néi ma wlori ncuka rfalélólé mépin balo né se ryó keé riri umé né. Bóngo iga rméiténé rdé Jou né rfamlóngé, momongo maduga bo rfatailongo be kyaté. Se si ta néi, nase bo rduk sélsól ta délé météwé."

Mépin balo ta reni renó pa njé ni sadaka

41 Rewóré ta néi, Yesusé ntoléné négbono kébya ta réfrao i sadaka njé bóngo ntarukira kyaté-kyat ta rpawélé riri sadaka né. I némnawé kyat ta reriri reróri né ma, rpawél riri sadaka né félé. 42 Pocé bóngo I némnawé reni mépin balo isó njé, reni rénó pa. I ma nwómé se npawél ni sadaka né pocé, mayta i ni sadaka né maduga pipis tambaga paluwé le.

43 Tabóngo Yesusé nkakémé ni motemote nesté, se nécegé si faje, "Flongé fafié é. Mépin balo ta reni renó pa njé, iga témnawé ni sadaka né maduga cuci le, mayta po Jou Lahatala ni usno lo né, i ni sadaka né lebe pélóy po farimé kyat ta rpawélé riri sadaka né. 44 Sababta, kyat ta reriri reróri né, masike rpawél félé, mayta riri pipisé né félé lesu ta riséné né. Mayta mépin balo njé renó gélesó pana, i ni pipisé né maduga ta néi óro, ta re npe ni sadaka né."