1 Waktu ta tómémóné i lesu né, imam ta rpélóyé nesté, agama Yahudi riri kyat tuté né, guru-guru agama ta runé fié Musa ni kitab abén lima né, re farimé ta si po Mahkamah Agama né rfasogaro si, wlori be pusó se rpiténé keé Yesusé ga rut I néli po Pilatus ni, bo nhukum I sogado nmóté. 2 Néli bóngo Pilatusé nutné Yesusé, "Fatuwé, Awé nte kyat Yahudi né riri Kolano Awé?"

Yesusé ncónglo i, "Necé ta dolo awé re mécegé né."

3 Imam ta rpélóyé né réfétno Pilatusé, cogo Yesusé re npe sól nuén fis néli ro. 4 Se pocé bóngo Pilatusé nutné Yesusé nóté, "Mlóngé pa? Ta réfétén nam sélsól po ya ni né re félé, ga msóngél pa?"

5 Mayta Yesusé nfaténténgén I le, sogado Pilatusé wlo njé nfatuténé, "Ah, ga Kyaté nje npe sói se ncóngél pa né?"

6 Étné ngénngan ta pélóy ta ngósno Paska né re nwómo i, Pilatusé mare nfasópén kyat faisó ta i po bui wlólo né, kyat pai le sababta ndéréré kyat ta félé né wlori. 7 Po waktu ta néi, reni kyat isó ncung bui ngósno Barabasé. Sababta i re ni dél séfis néli re rpuné keé kyat ta po pemerintah Roma ta rkawasa po bótén Israelé né. 8 Pocé bóngo kyat félé rwómé réror po Pilatus ni, bo nfasópén kyat faisó ta i po bui wlólo ta dolo i re nénpe né.

9 Pocé bóngo Pilatusé nutné si, "Fawa, mewé wlomi bo kfasópéné keé kyat Yahudi né riri Kolano njé?" 10 Sogado Pilatusé néceg fajé né, i re nuné ta imam ta rpélóyé né rkélak Yesusé né sababta rtélengén I.*15:10 Pilatusé nécogo ma kyat ta félé né nase bo rané i nfasópén Yesusé, bukan ta Barabas pa.

11 Mayta imam ta rpélóyé nesté rfalalólé keé kyat ta félé né, bo si ma rané Pilatusé bo nfasópéné keé Barabasé le.

12 Bóngo Pilatusé nutné si nóté, "Pana fajé, kyat ta mewé fécegé cogo kyat Yahudi né riri Kolano njé bo kpe I fawa?"

13 Rlongé ta Pilatusé néceg fajé né bóngo rgélayé nóté, "Tcalibé keé I ro!"

14 Pocé bóngo Pilatusé nutné si nóté, "Ga npe sélsól sói se?"

Mayta si rbóng ta rgélayé rfakwat si, "Tcalibé keé!"

15 Bóngo Pilatusé ndéréré kyat ta félé né wlori, se nfasópéné keé Barabasé, ga nané kyaté né raswako Yesusé nó wólé isó ta wómo mdalémé né, bóngo npo keé Yesus néli po si ni bo rcalibé keé I.

16 Tentara Roma nesté rut Yesus néli po gubernuré njé ni kadatongé ni kintalé lo né, bóngo tentara né rkakémé riri dél ta pocé né se rfajólo si ndimé. 17 Pocé ga rfapaké Yesus re juba ungu isó tadolo Kolano si rénpake né, tabóngo si ma ryóném wólé ta reni gémgaméné, se rpe i tadolo dailok isó ga rduo i nóp Yesus béboko lo né. 18 Rewóré ta néi, rfalalólé se récegé I faje, "Ksuba Awé, kyat Yahudi né riri Kolano!" 19 Pocé bóngo ryó taton isó se rpes nóp béboko lo, rfatitfo I, bóngo rfamiamia I se rlólo ta rcuba I. 20 Rfamiamia I rewóré, ga résólé keé juba ungu ta rfapake I njé, bóngo réngalno re ni kabaya né nmulé. Rewóré ta néi, ga rcópné Yesusé se rut I néli po géwgów ta bo rcalibé keé I lo né.

21 Waktu ta rut Yesusé se rcópén tóma Yerusalemé né, rdipén kyat isó ngósno Simoné. Simoné njé kyat Kirené i, Aleksanderé i re Rufusé riri moke i. Tagare nwóm pocé kota njé ni. Pocé bóngo tentara né rkakém i lima se rané i npó Yesusé ni salibé njé.

22 Waktu ta néi, rut Yesus néya po géwgów esó ta ngósno Golgota, (ta i ni ngale né gagegéy góo). 23 Re rwóm pocé, bóngo tentara né rdo Yesusé nó anggur ta re rbóngo urém diréncó ngósno muré, mayta Yesusé wlo niném pa. 24 Pocé bóngo rcalibé keé. Rewóré ta néi, tentara né répatén undi bo runé pai ta nase bo nduk Yesusé ni kabaya. 25 Ta si rcalibé keé Yesusé né tómémóné lesu, halé taga tok nuén popété.

26 Po salibé lo né, reni fófén wóm ta rpaku néli, bóngo rlefo pocé fóféné lo né, glio né faje, "Neje kyat Yahudi né riri Kolano I."

27 Pocé ma rcalib kyat léo séluwé nóté, isó po Yesusé ni féspal wónéyé, isó po ni féspal balété. 28 [Ta si rpe fajé né, necé nabi Yesaya re néféténé ntubé, ta ni glio né fanfaje, "Si rpe I né, tadolo kyat léo I."]

29 Kyat ta rwetco pocé né, régiwé babokori, re rfakcegé I réceg faje, "Eh, Awé re mécegé cogo bo mégéné keé ité rir Um Sambayang ta npélóyé njé né, ngané telé re mfawoslé i nmulé to? 30 Pana fajé, wóré mtebé yama salibé lo né bo mfasalamaté nim diri se!"

31 Fajé nóté, imam ta rpélóyé nesté si re guru agama né rfamiamia I se réceg faje, "Kyat ta rpisé bo rmóté ma nfafié si, mayta I ni diri ga bisa nfasalamat pa né?" 32 Bóngo récegé I faje, "Iga fatuw ta Awé Mesiasé, kyat Israelé né riri Kolano njé, coba mtebé yama bo amé ma kémnawé bo kdéréré Awé se." Fajé nóté kyat séluw ta rcalib si re Yesusé nesté ma, rfamiamia keé I nóté.

33 Waktu ta tok yófésó re nuén luwé né, bóténé njé ndérorémé ndimé, sogado tok nuén telé. 34 Fajé-fajé Yesusé n’gélay re gli ta pélóyé, "Eloi, Eloi, lama sabakhtani?" Ta ni ngale né, ‘Jou Lahatala, Ya nik Jou Awé. Pe sói se mfatoléné keé Ya né?’

35 Kyat séfis néli ta rénosél pocé né rlongé ta Yesusé néceg fajé né, bóngo réceg faje, "Eh, flongé, ta nkakém nabi Elia njé." 36 Pocé bóngo kyat isó nbable néyó gémuné diréncó ta ncilét wóé fié né, se ncowlé i po anggur ta ménilé lo né, bóngo natépsé néli ayé lo ga natulké néya Yesus sumo lo bo naflépé. Pocé bóngo kyaté njé fajé néceg faje, "Coba taftóné bo témnawé, nabi Elia nwómé bo ntebo I pari tisé." 37 Pocé Yesusé n’gélayé né ta délé nfakwat I, néga télél be nmóté.

38 Ta re nmóté né, ngalép ta résóbéyé bo rfaket Jou Lahatala góo po agama Yahudi né riri Um Sambayang ta npélóyé njé ni wlólo né, mgawés abén luwé, po ya sogado ga nópé.

39 Pocé fajé ma reni tentara Roma né riri kapala isó, nosél négbóno Yesusé ni salibé lo né, se némnaw ta Yesusé nmót tadolo fajé né, ta bóngo néceg faje, "Fatuwé, Kyat ta nje Jou Lahatala ni Ntu I!"

40 Pocé fajé ma reni mépin séfis néli ta rémnaw Yesusé nmóté né, mayta rfataw si lów cuci. Mépiné nesté, isó ngósno Maria kyat Magdala i, isó Maria, Yakobus ta téwyóy i re Yosesé riri neke i, re isó nóté ngósno Salome. 41 Waktu ta Yesusé I po bótén Galilea lesu né, mépin ta nesté ta rdéréré re rleleyan I né. Pocé ma reni mépin iglé nóté ta si re Yesusé rfadéréré sogado rwóm po Yerusalemé né.

42,43 Pocé reni kyat isó ngósno Yusufé. Yusufé njé kyat Arimatea i. I kyat ta pélóy po Mahkamah Agama Yahudi né, re kyat félé ma rféyal re rlongé i fié. Tatubé lima lesu i ma nanéftón ngénngan ta Jou Lahatala bo nkawasa po ni kyaté-kyaté né. Ni tómémóné né ngénngan Sabaté. Se ta ngénngan jumaté né, kyat Yahudi né rfasadia róri mnómé, re sói néli ta si bo ró re rinémé né, sababta ngénngan ta i móné né bisa rpe yabé pa. Pocé re nfano i mérimé né, Yusufé nfakwaté wlo njé se nfané négbono Pilatusé. Bóngo nécegé i faje, "Ya nte kéroré bo ktebo Yesusé ni mayaté njé, bo kleleyan I. Sababta ngénngan ta i móné né ngénngan Sabaté, se nase amé bisa kpe yabé pa." 44 Pilatusé nlongé ta Yesusé re nmóté né, ndéngó. Pocé, bóngo nkakém tentara kompi né riri kapala isó lima se nutné i, "Fatuw ta Yesusé re nmóté?"

45 Tentara né riri kapala njé ncónglo i, "Iya, re nmóté." Tabóngo Pilatusé nécegé Yusufé, "Pana fajé, mayó I óro."

46 Pocé bóngo Yusufé nfané ntukél ngalépé mfus ta fié né, ga nfané se ntebo Yesusé ni mayaté njé nópé. Ntebo I rewóré, néyémo I re ngalépé mfus ta nuté né, bóngo re nut I néli po kubur legé myaku isó ta kyaté né rédoké i njé, se nfabóyé keé Yesusé ni mayaté njé némin po kubur legé lo né. Nfabóy I rewóré, nfalilés lóy ta pélóy pusó néli, se nfaketé keé legé ni kbono njé.

47 Pocé fajé, Maria kyat Magdala njé, i re Maria (Yosesé ni neke) rfaménawé ta Yusufé nfépel Yesusé ni mayaté njé po góo lo né.