34 Tabóngo Yesusé nkakémé ni motemote nesté, re kyat ta félé né se nécegé si faje, "Kyat pai ta bo ndéréré Ya, mare ma ndéréré ni wlo njé na. Sababta mare nfasadia i bo nduk kangélang sogado nmóté. Ni mdio maduga ndéréré be Ya le, necé tadolo re npó ni salibé njé bo ndéréré Ya. 35 Sababta kyat pai ta nfatubé be i ni diri né le, i ta njéi nase nmóté né nduk ta fié pa sogado fajé néli le. Mayta kyat pai ta npo ni hidupé bo ndéréré Ya, re nfafan Ya nik yabé* né le, i ta njéi nmóté né nase nduk ta fié sogado fajé néli le. 36 Sababta masike kyat faisó haréta ta po dunia wlólo nte i nó ndimé, mayta reni ngale gélesó pa, sababta nmóté né nase nduk ta fié pa sogado fajé néli le. 37 Se reni pana ta i bo npo néli po Jou ni bo nduk ta fié sogado fajé néli le.

38 Kyaté-kyat ta isémé nte, rdéréré Jou ta fatuw pa. Si wlori ncuka rpe be ta lé. Iga reni kyat ta rdéréré Ya, bóngo re rdéréré Ya nik dodoto né ga rmóé si, Kyaté Ntu ta Ya I yama soroga né, iga kwómé nmulé re nik Moke Jou Lahatala ni kawasa re ni nénan ta si yama soroga né, pocé Ya ma nase kécegé kmóé Ya bo kféyal si né."