Mateus 2

Kyat ta rfatéglo ngó fié né rwómé réyówé kolano ta tagare ntubé njé

1 Yesusé ntub po pnuw Betlehem, po bótén Yudea. Po waktu ta néi, Herodesé ta ndadi kolano*2:1 Waktu ta né, kyat Roma ta rkawasa keé kyat Yahudi né riri bóténé. Kolano Herodesé njé nihale kyat Arab i. Ni déluté rcung agama Yahudi. Pemerinta Roma réftul i bo nkawasa keé po bótén Yudea.. Pocé reni kyat ta rfatéglo ngó fié nesté si lima bótén féspalé, rdé po ngénngané ncó sogado rwóm po kota Yerusalemé. 2 Néli, tabóngo rutné po kyaté-kyat ta si pocé né, "Kyat Yahudi né riri kolano ta tagare ntubé njé, funé góo pari tisé*2:2 Ta mulo kyaté nesté rutné kolano njé, si runé tatubé lima lesu Jou Lahatala re néjaji ta nase Daudé ntu re gbu isó bo ndadi kolano se nfasalamaté kyat Yahudi. Nabi Yeremia nlefo ta né po buk Yeremia 23:5-6.? Sababta amé re kémnawé ni tégél ngó pusó, ncópén po ngancóo. Se amé kwóm lima nte kéyówé I bo ksuba I."

3 Kolano Herodesé nlongé ta reni kolano wóbno isó tagare ntubé né, télél i bóngo wlo njé tadélé nkangelangé, fajé nóté re férimé kyat ta si po kota Yerusalemé né, si ma rlongé né wlori dolo bo kangelangé nóté. 4 Pocé tabóngo kolano Herodesé nkakémé kyaté-kyat Yahudi né riri imam ta rpélóyé né, re guru-guru agama Yahudi ta runé fié Musa ni kitab abén limé nesté se rfajólé, tabóngo nutné si, "É, ta mewé funé né, nimi Kolano ta Jou Lahatala néjaji bo nwómé njé, nase ntub po sói lo*2:4 Kyat Yahudi né réftón kolano isó ta Jou Lahatala néjaji bo nwómé nfasalamat si. Rkakmé I "Mesiasé". Si récogoma "nfasalamat si né" ni ngale bo nfaeé si re kyat Roma né, ta mulo Kolano Herodesé némtaté né. Momongo, Yesusé nwómé bo npe ta né pa, mayta bo nfayangésé kyaté róri sélsólé né bo rsalamaté.?"

5 Tabóngo si rcónglo, "I nase ntub po Betlehem po bótén Yudea. Sababta tatubé lima lesu Jou Lahatala re néceg ta bo ndadi i né, se reni nabi isó re nlefo po ni Buké wlólo, ta ni glio né tadolo faje:

6 ‘Mewé kyaté-kyat Betlehem ta po bótén Yehuda né,

masike nimi pnuwé njé némyaku, mayta nase ngósno né fié po farimé pnuw ta po Yehuda né.

Sababta po nimi pnuwé njé ni nase reni kolano isó bo nwómé nkawasa Ya niké kyaté-kyat Israelé né, tadolo kyat ta réjaga riri domba-domba né.

I nase nfaménawé niké kyat Israelé né, se nfaftulo si po yéfén ta fié lo*2:6 Nabi Mikha nlefo nubuat ta njé po buk Mik. 5:1-2, 2Sam. 5:2..’ "

7 Herodesé nlongé ta kolano njé nase ntub po Betlehemé, tabóngo nkakémé kyaté-kyat ta rfatéglo ngó fié nesté. Nkakém si né ma, npeé be panpiné, se maduga i re be si le, pocé bóngo nutné si fafié bo nuné ta ngané fisé ta si rémnaw ngó njé né. 8 Rewóré ta néi, tabóngo nané si rfan néli po pnuw Betlehemé. Se nécegé si faje, "Ffan néli po pnuw Betlehemé ro. Néli féyówé I fafié, Yomya njé. Iga re fduk I, fpóléné mew lima ffabingo ya bo ya ma kfan néli ksuba I nóté."

9 Rlongé ta kolano Herodesé néceg fajé rewóré, tabóngo rfané. Po waktu ta si re nfané né, rémnaw i nóté, ngó ta ncópén po ngénngané cóo njé. Ngó njé nfané nanéntubé, sogado kyaté nesté rwóm po géwgów ta Yomya njé ntolno lo né, tabóngo ngó njé ntébén pocé po umé njé néyao lo né. 10 Waktu ta rémnaw ngó njé né, tadélé rcéngé. 11 Se po waktu ta rcung némin po umé njé ni wlólo né, rémnaw Yomya njé I re ni neke Maria. Tabóngo rtiki buku nópé se rcuba Yomya njé. Rewóré ta néi, résólé riri haréta góo njé se rcópné haréta ta mulo pélóy ta ruté bo rpo Yomya njé né, guraci, manyané, re muré se rdo ni.*2:11 Manyan ta nte, ayé ni wóé ta ncópén lima i ayo lo se nmétuwé. Rpeé parfum pari urém, re iga rpeé riri adaté bóngo rtapén ta né. Mure né, ayé ni gétgité. Reni ta mékóté, reni ta gélpowé. Rpeé bumbu, urém pari parfum. 12 Rewóré ta néi, Jou Lahatala nfébingo kyaté-kyat ta rfatéglo fié nesté po bélisé wlólo bo ma rpólén si nmulé po Herodesé ni le na. Se ta réléy po riri bóténé lo nmulé né, rdé si yéfén nésé.

Yusufé i re Maria rówsé Yesus po bótén Mesiré

13 Po waktu kyaté-kyat ta rfatéglo ngó fié nesté re réléy si né, Jou Lahatala ni nénan isó i yama soroga nwómo Yusuf po bélisé wlólo. Se nécegé i faje, "Yusufé, mpangén óro! Mut Yomya njé I re ni neke bo fówés po bótén Mesiré. Ftoléné ntéli óro sogado Ya kfabingo aw ngané fisé fpóléné mew lima nmulé ga fpóléné mewé, sababta kolano Herodesé nase néyówé Yomya njé bo npuné keé I."

14 Rewóré ta néi, tabóngo Yusufé npangéné. Se po dorém ta néi óro, nuté keé Yomya njé i re ni neke se rówés po bótén Mesiré. 15 Si rtoléné ntéli po Mesiré né sogado kolano Herodesé nmóté. Farimé ta re ndadi i né, sababta tatubé lima né Jou Lahatala re nfébingé po nabi isó tadolo faje, "Ya kkakémé Ntigé njé bo ncópén po bótén Mesiré." *2:15 Nubuat ta njé nabi Hosea nlefo i po buk Hosea 11:1. Nete taga ndadi i.

Kolano Herodesé nané bo rpuné keé yomya-yomya món ta rémyaku lesu né

16 Po waktu ta kolano Herodesé nuné, kyaté-kyat ta rfatéglo ngó fié nesté réléyé ga rtilé i pa né, tabóngo tadélé ncawané. Pocé tabóngo nétén po waktu ta si rfabingo i ta rémnaw ngó njé né, ni mnuo nihalé re taun nuén luwé se lima. Tabóngo nané ni kyaté nesté rfan po pnuw Betlehem re po pnuwé-pnuw ta nérakén pocé né, bo rpuné keé farimé yomya món ta riri umur taun nuén luwé se nópé. 17 Waktu ta rpuné keé yomya-yomya né, sói ta tatubé lima Jou Lahatala nfébingé po nabi Yeremia ni né re ndadi i tadolo faje,

18 "Po pnuw Rama rlongé tangtangés re dodora sababta wlori né tadélé kangelangé.

Pégelé Rahelé wlo kangelangé se ntangésé,

sababta nlolémé ni ntu nesté se isó pa ta néfené bo nfamémuf i,

sababta ntu nesté re rmót si ndimé.*2:18 Nubuate nje tatubé lima Nabi Yeremia re nlefo po buk Yeremia 31:15. Nete ta ga ndadi i. Ta nlefo "Pégelé Rahelé" né, ni ngale, pégelé Rahel pa, mayta ntu re gbu mépin farimé po kyat Israelé né, si ta rtangésé, Herodesé nfamóté nturi né se."

Yusufé i re Maria re nturi njé réléy po bótén Israelé

19 Po waktu ta kolano Herodesé re nmóté né, Yusufé i re ni pégelé re nturi njé si po bótén Mesiré lesu. Se Jou Lahatala ni nénan isó yama soroga nwómo i po bélisé wlólo, se nécegé i faje, 20 "Yusufé, mpangén óro. Muté ntimé njé I re ni neke bo féléy néli po bótén Israelé, sababta kolano Herodesé i re kyaté-kyat ta bo rpuné keé Yomya njé né re rmót si ndimé."

21 Yusufé nlongé ta néi, tabóngo npangéné se nut Yomya njé I re ni neke bo réléy po bótén Israelé. 22 Mayta rwóm néli pafule, Yusufé nlongé Arkelausé re niwéné ni moke Herodesé se ndadi kolano po bótén Yudea, tabóngo némtaté bo néléy néli. Tabóngo po bélisé wlólo, Jou Lahatala nfébingo i bo ma nfan po bótén Yudea le na, mayta nfan po bótén Galilea. 23 Pocé re rwóm po bótén Galilea, tabóngo rtolén si po kota isó ta ngósno Nazaret. Sogado ntolén pocé né, sababta po tatubé lima lesu Jou Lahatala re nfébingo ni nabi njé pua ta Yesusé I re ni déluté nesté bo rtolno né, ga nlefo po ni Buké wlólo né, ni glio faje,

"I ta njéi kyaté né nase rkakmé, kyat Nazaret I."