1 Pocé Yesusé nméiténé ndé si né npe adeade nóté se néceg faje, 2 "Jou Lahatala nkawasa dolo Kolano po ni kyaté-kyaté né, tadolo adeade nje: reni kolano isó ta bo rfafsówé nturi móné njé se bo rpe rameangé. 3 Pocé re rfasadia ndimé, tabóngo nané ni kyat yabé né rfané rkakémé kyaté-kyat ta re nfabingo si né bo rwóm lima po ntu njé ni fafsówé lo né. Nópé ga kyaté né wlori rwóm pa.

4 Tabóngo kolano njé nané ni kyat yabé iglé nóté, bo rwómo kyat ta re nkakém si nesté, bo récego si faje, ‘Nik sapi món re sapi wóbno ta rbékboké né re kéwetésé keé se re kfamósé, se re rfasadia ndimé, se fwóm lima óro.’

5 Mayta kyaté-kyat ta rkakém si né rfapida si se rwóm pa. Reni ta rfan po róri bété lo, iglé né rfané rfalwagé. 6 Ta iglé né ga rgó keé kolano njé ni kyat ta rfakakémé nesté, se rfaspésé si re rpuné keé si. 7 Kolano njé nlongé ta néi, tadélé ncawané. Pocé bóngo nané ni tentara né néli rpuné keé kyat ta rpuné ni kyaté nesté, bóngo réslayé keé riri kota njé.

8 Rewóré ta néi, bóngo nané ni kyat iglé né nóté, se néceg faje, ‘Fafsówé njé ni mnómé né re rfasadia ndimé. Mayta kyat ta re kkakém si né rwóm pa, se wóré si, mgo wleg si pana bo rdéréré rameangé nje né. 9 Se kané mewé ffan po yéfén-yéfén ta pélóyé lo né bo fdipén kyat pai le, fkakém si lima bo rdéréré nik rameangé nje.’ 10 Rlongé ta néi, tabóngo kyaté nesté rfané nóté. Si néli yéfén-yéféné lo né, rduké kyat pai le, rkakém si. Kyat fio re kyat léo ma, rfajólo si se rut si néli ndimé sogado rfamot géwgów ta po um rameangé njé ni wlólo né.

11 Mayta waktu ta kolano njé ncung némin rameangé lo né, bo nfapdipén re kyat ta re rwómé né. Pocé ga némnawé kyat isó npake ni kabaya ta ngénngan néya nénpake né. 12 Bóngo nutné i, ‘Deko, pe sói se msung pote rameangé lo ga méngalén aw fafié pa né?’ Kyaté njé nuné ta ncólé, se nfaténténgén i le.

13 Bóngo kolano njé nécegé ni kyaté né faje, ‘Fpitén sóo re fao né, bo ftéo keé i nétó po dérorémé lo né. Po géwgów ta njé, reni kyaté-kyat ta bo rtangés sogado rfakékikté ngangori, sababta rkangelangé.’ "

14 Yesusé néfétén adeade njé rewóré, tabóngo néceg faje, "Jou Lahatala nkakémé kyat félé bo rdadi ni kyat si, mayta maduga cuci le ta I npili si né."

15 Rewóré ta néi, kyaté-kyat Yahudi ta rdéréré dodoto Farisi nesté rfasogaro si rfané rutné Yesusé bo réyówé nó sélsólé. 16 Pocé bóngo rané riri motemote né si re kyat séfis néli ta rénfadéréré re kolano Herodesé né rfan néli po Yesus ni bo récegé I faje, "Guru, amé kuné, Awé kyat isó ta métegélé. Awé mfasodoto kyaté bo rpe be sói néli ta Jou Lahatala mgo wlo né mémtat pa, sababta méyówé ngósnom pa. 17 Se ta mulo am lima nte, bo kutné Awé, iga tdéréré ité rir aturan agama, bisa pari tisé tpólés pajak po kolano Roma ta nkawasa po ité rir bóténé lo né?"*

18 Mayta Yesusé re nuné keé wlori ta lé né. Se nécegé si faje, "Ce, mewé nte kyat ta fmalólé, fpe sói se bo féyówé nak sélsólé? 19 Coba fpo fapusó lima, pipis ta rénpólso pajaké né, bo kémnaw i!" Bóngo rpo I pipis perak pusó néli. 20 Se Yesusé nutné si, "Gambar re ngósén ta nte, pai ta ni?"

21 Si rcónglo I, "Kolano Roma ta npélóyé njé ni."

Bóngo Yesusé nécego si faje, "Pana fajé, pua ta kolano Roma njé ni fpo kolano njé, pua ta Jou Lahatala ni, fpo Jou Lahatala."

22 Rlongé ta Yesusé néceg fajé né télél si, se re runé akal pana bo réyówé nó sélsólé né, tabóngo rfané se rfatoléné keé Yesus pocé.

23 Po ngénngan ta néi óro, reni kyat agama Yahudi ta rdéréré dodoto Saduki né si dórén fis néli rwóm po Yesus ni. Po riri dodoto ta néi, iga re tmóté né nase tpangén pana. Se rutné Yesus faje, 24 "Guru, tatubé lima né nabi Musa re nfasodoto amé né faje, ‘Món pai le, iga re néfsówé ga nmóté se re ntu pa, ni fténo njé mare néfsów ni balo njé, bo si nturi né rdadi fténo ta nmóté njé ni ntu si, se masike re nmóté ma ngósno né myangés pa.’ 25 Mayta, ta ngané fisé né reni wyóy faftén si dórén fité rtolén pote faje. Se ta nténlóyé njé néfsóo mépin isó, mayta re nturi pafule móné njé nmóté. Bóngo fténo ta i pópo i njé néfsóo ni balo njé, 26 nópé ga i ma re ntu pafule re nmóté nóté. Ni fténo ta i pópo isó nóté néfsóo balo njé se nmóté nóté, mayta re ntu pa nóté. Sogado món faftén si dórén fité nesté réfsów i ndimé, mayta re nturi pafule, re rmót si ndimé. 27 Ni wóré nópé né, mépiné njé ma nmóté nóté. 28 Se nte amé bo ffabingo mewé ta funé pafule né, iga dunia nje nkiamaté ga fatuwé kyat ta rmóté né rpangéné nmulé, móné nesté nase rfafalaé mépiné njé se ffakotale! Sababta si dórén fité né re réfsówo i ndimé!"

29 Pocé bóngo Yesusé nécegé si faje, "Mewé re fsólé, sababta fsae pa ta re rlefo po Jou ni Buké wlólo né, bóngo funé pa nóté Jou Lahatala ni kawasa né. 30 Sababta iga dunia njé nkiamaté ga kyat ta rmóté né rpangéné nmulé, nase reni ta réfsów pana se isó ta ni pégelé i pa, mayta rhidup tadolo Jou Lahatala ni nénan ta po soroga lo né. 31 Se iga kyat ta re rmóté ga rpangéné nmulé né, mewé nihalé re fbaca ta po Jou ni Buké wlólo ta ni glio né tadolo faje,

32 ‘Ya óro Jou Lahatala, ta Abrahamé, Ishaké, re Yakobé réncuba I njé!’*

Se waktu ta Jou néceg fajé né, Abrahamé, Ishaké re Yakobé re rmóté, mayta re rpangéné nmulé se rhidup re Jou Lahatala. Se Jou Lahatala njé bukan ta bo kyat ta re rmóté né riri Jou I pa, mayta kyat ta rhidupé né riri Jou I."

33 Waktu kyat félé ta pocé né rlongé ta Yesusé néceg fajé né, rherané se rfawgiwé bébokori, sababta wlori ncuka rlongé ni dodoto né.

34 Waktu ta néi, kyat Yahudi ta rdéréré dodoto Saduki nesté runé rcóngél pana se rfaténténgén si le. Pocé fajé kyat Yahudi ta rdéréré dodoto Farisi nesté rlongé ta Yesusé ncónglo si né, tabóngo rfajólo si. 35 Pocé riri guru agama isó ta nuné fié Musa ni kitab abén limé njé, bo néyówé Yesusé nó sélsólé se néceg faje, 36 "Guru, farimé ta po Musa ni kitab abén limé né, dodoto tai pua ta mare tpe i ntubé njé?"

37 Bóngo Yesusé nécegé i faje, "Mewé mare fmésié Jou Lahatala re férimé ta po nimi diri wlólo né, sababta I ro ta mewé nimi Jou I. Bo fmésié I né, mare nimi mésié né lebe pélóy po férimé ta fmésié si né, re farimé ta po wlomi wlólo né maduga ffapélóy be Jou Lahatala le. 38 Po farimé dodoto ta Jou nané ité tdéréré né, mare tfatubé ta néi. 39 Mayta reni esó nóté ta re bo nfamgo re ta néi, ni glio né faje, ‘Mewé ma mare fmésié kyaté né ta dolo fmésié menimi diri né nóté.’ 40 Dodoto abén luw ta néi ta mgó ndimé ta po nabi Musa ni kitab abén limé né, re po nabi-nabi ta iglé riri kitabé lo né."*

41 Waktu kyat Yahudi ta rdéréré dodoto Farisi nesté rfajólo si pocé lesu né, Yesusé nutné si, 42 "Coba ffabingo Ya. Kolano ta Jou Lahatala néjaji nwómé bo nfasalamaté kyaté njé, pai ta ni ntu re gbu I?"

Bóngo si rcónglo I, "I ta njé I kolano Daudé ni ntu re gbu I."

43 Pocé bóngo Yesusé nécego si nóté, "Pana fajé, pe sói se tatubé lima ta Jou Lahatala ni Rohé njé nkawasa Daud, sogado Daudé nécegé cogo Mesiasé njé I ni Jou I? Po waktu ta néi kolano Daudé néceg faje,

44 ‘Jou Lahatala néceg po nik Jou njé ni:

Mtolén po nik faspal wónéy óro, sogado kyat ta riri lé Awé né, nase kpe sogado rlongé Awé.’ *

45 Se faje: iga kolano Daudé ma nécegé Mesiasé njé i ni Jou I, pe sói se ité ma técegé Mesiasé njé kolano Daudé ni ntu re gbu I?"

46 Férimé kyat ta pocé né rlongé ta néi, tabóngo runé rcóngél pana se rfaténténgén si ndimé. Se po waktu ta néi óro reni kyat isó pa ta bo nutné sói néli po Yesus ni nóté.