Mateus 23

Guru agama re kyat Farisi ta réyówé ngósnori né, ma ftalko si na

1 Rewóré ta néi, Yesusé néceg po kyat ta félé né, re po ni motemote nesté ni, 2 "Guru-guru agama Yahudi ta runé fié Musa ni kitab abén limé né, re po kyaté-kyat Yahudi ta rdéréré dodoto Farisi nesté, riri yabé né tadolo nabi Musa tatubé lima se ntebo aturan-aturan ta po ni kitab abén limé ni wlólo né. 3 Se mewé mare flongé bo fdéréré óro férimé ta rfasodoto mewé né. Mayta ma ftalko ta si rpe né na, sababta masike si ta rfasodoto mewé, mayta ta récegé né rpe pa. 4 Si rpe aturan agama né félé re tadélé météwé, ga rané kyat ta félé né rdéréré, mayta si rdéréré facuci le ma tisé aturan ta néi.

5 Férimé ta si rpe né, maduga rpe fajé bo kyaté né rémnawé le. Necé tadolo riri pétpitén ta rlefo Jou ni Méitén po bébokori re po faori lo né rfamsóyé-msóyé. Riri juba ni lawe-lawe né ma rfamlóngé bo kyaté né runé si ta cogo rdéréré Jou fié. 6 Iga rcung po rameang re po um sambayangé lo né, wlori ncuka rtolén si po karapesa ta mare kyat ta rpélóyé né réntolno lo né, po géwgów ta po tó po kyat ta félé né rakbono lo né. 7 Si ma wlori ncuka bo kyaté né horomat si bo kyat ta félé né rkakmé si, ‘Guru’.

8 Mayta mewé, ma wlomi na bo kyaté né rhoromaté mew sogado rkakmé mew, ‘Guru’! Sababta nimi Guru né maduga isó le, se férimé mewé faftén re farémóné. 9 Re ma fkakmé kyat nésé ‘moke’ na, sababta nimi Moke né maduga isó le, I ta njéi Moke ta I po soroga lo njé. 10 Bóngo ma sogado kyaté né rhoromaté mewé bo récegé mewé fdadi kyat tut po si ni na, sababta nimi Kyat tuté njé, maduga isó le. I ta njé i, Mesiasé, Kolano ta Jou Lahatala néjaji nwómé bo nfasalamaté kyaté njé. 11 Kyat pai ta npélóy po mew ni, njé mare ndadi dolo nimi béyak i bo nléléyané mewé. 12 Sababta, kyat pai ta nfamógé wlo njé, Jou Lahatala nase ntebo i se tadolo kyat ta reni ngale gélesó pa né. Mayta pai ta nfamya wlo njé, Jou nase nélóngé i se ndadi kyat ta pélóy i."

13 Yesusé nécegé nóté, "É, fkangelang óro mewé, guru-guru agama Yahudi ta funé fié Musa ni kitab abén limé né, re kyat Yahudi mew ta fdéréré dodoto Farisi né! Mew férimé né fmalólé, sababta fpe nimi diri dolo fdéréré Jou Lahatala fié, momongo fdéréré ta fatuw pa. Mewé wlomi pa fdadi Jou Lahatala ni kyaté mewé né, se Jou nkawasa keé wlomi né pa, sogado mewé ma ffaketé keé kyat nésé bo rpo wlori néli bo rdadi Jou ni kyat si nóté. Se mew re si ma fdéréré Jou pa sogado fdadi I ni kyaté mew pa.

[14 Guru-guru agama re kyat Farisi ta mewé, fkangelang óro. Mewé fmalólé! Mewé re flólé keé mépin-mépin balo né bo fyó keé riri umé né, bóngo iga bo fméiténé fdé Jou Lahatala né famlóngé bo kyaté né runé ta kyat féyfio mewé bo rtailé mewé, momongo be flólé. Se mewé nase bo fduk sélsól ta délé météwé.]*23:14 Alkitab iglé rpaké ayat ta nje pa, sababta po naskah-naskah kuno, igle pa rpaké pa, ta mulo kpe ni tanda kurung.

15 Guru-guru agama Yahudi ta funé fié Musa ni kitab abén limé né, re kyaté-kyat Yahudi ta fdéréré dodoto Farisi né! Fmalólé ndimé. Sababta, fsobél po wolété lo re féjel po bótén néli re lima né maduga bo féyówé kyat faisó bo ndéréré nimi dodoto né. Se iga re ndéréré mewé, mewé fpe i né bo ndadi kyat léo sogado nliwé keé mewé bo ncung naraka.

16 Se fkangelang óro kyat tut-kyat tut ta mewé! Mew ta néi, tadolo kyat ta rébyafé se rtuda ta rébyafé nóté! Sababta mewé ffasodoto kyaté-kyaté né, tadolo faje, ‘Kyat pai ta ncasi re Um Sambayang ta npélóyé njé, sasi ta njé i nase mgo i pa. Mayta bo ncasi po guraci ta po Um Sambayang ta npélóyé njé ni, sasi ta njé i nase mgo i.’ 17 Mew ta ntei funé nimi gélesó pa! Sababta Um Sambayang ta npélóyé njé i re guraci njé, guraci njé ta reni ngale pa. Sababta Um Sambayang ta npélóyé njé ta npe sogado, guraci ta po ni wlólo njé ma reni ngale ta fié. 18 Dodoto esó nóté ta ffasodoto si né, ta dolo faje, ‘Pai ta ncasi po sadaka góo lo né, sasi ta njéi nase mgo i pa. Mayta bo ncasi po haiwan ta rtapén po sadaka góo lo né, sasi ta njéi ta nase mgo i.’ 19 E, mewé nte kyaté-kyat ta rébyafé né se funé nimi gélesó pa. Sababta haiwan ta tpeé sadaka re ni géwgów ta réntapén sadaka né, haiwané njé ta reni ngale pa. Mayta sadaka góo njé tadélé reni ngale ta fié, se necé tamulo haiwané njé ma reni ngale ta fié nóté. 20 Ta mulo né, bo kyat pai le ncasi po sadaka góo njé ni, necé ncasi po góo njé ni le pa, mayta re ncasi po farimé sadaka re ni góo njé ni ndimé. 21 Fajé nóté bo kyat pai le ta ncasi po Um Sambayang ta npélóyé njé ni, necé ncasi po Um Sambayangé njé ni le pa, mayta re ncasi po Jou Lahatala ta ntolén pocé njé nóté. 22 Fajé nóté bo kyat pai le ta ncasi re soroga, necé ncasi re soroga le pa, mayta re ncasi po Jou Lahatala ta nkawasa po góo lo njé nóté.

23 Eh, guru-guru agama Yahudi ta funé fié Musa ni kitab abén limé, re kyat Yahudi ta fdéréré dodoto Farisi né fkangelang óro! Mewé nte fmalólé ndimé. Sababta, fafénpo nimi perpuluhané, sogado nómi rampa-rampa ta délé myaku né ma fpe ta dolo né. Momongo, Jou ni Méitén iglé ta lébé pélóy po Musa ni kitab abén limé né ga fdéréré pa. Ta pélóy po Jou ni Méiténé né ta dolo faje: fpe be ta métegél po kyaté, ffaftulo nimi mésié po kyaté, re iga fécegé bo fpe sói néli né, fpe óro. Se necé ta mare fpe né ma fpe be ta iglé né na, sogado fpe nimi perpuluhané nóté. 24 Kyat tut-kyat tut ta mewé né, kfatailo dolo kyat ta nébyafé, se ntuda ta nébyafé njé né! Sababta dodoto ta myaku-myaku né mewé fpe i ni fié, mayta dodoto ta pélóy ta Jou Lahatala nané mewé fpe né tadélé fpe pa. Kfatailo tadolo bobéi ta po nómi wóé lo né, féftaké keé ga finémé nómi. Mayta unta pun lóy ta i po nómi wóé lo né ga ftolmé nómi.

25 Eh, guru-guru agama Yahudi ta funé fié Musa ni kitab abén limé né, re kyat Yahudi ta fdéréré dodoto Farisi né! Mew ta néi fmalólé ndimé. Sababta iga bo tangóto po tó néliké né tacogo ma kyat féyfio mewé, momongo po wlomi wlólo né fmalalim re nimi nafsu pélóyé. Kfatailo mewé né dolo kyat ta réusé róri galas re gówé né se po tó njé nberési, po miné njé ga nkakoné ndimé. 26 Kyat Yahudi ta fdéréré dodoto Farisi né, mew ta néi dolo kyat ta rébyafé né! Se ffaberési wlomi wlólo ta lé né su, bo sói ta fpe re ta fécegé né fié ndimé, tadolo tfaberési galas re gówé ni ta po miné né, bo ta po tó néliké né ma nberési.

27 Fkangelang óro mewé, guru-guru agama Yahudi ta funé fié Musa ni kitab abén lime né, re kyat Yahudi ta fdéréré dodoto Farisi né! Fmalólé ndimé. Kfatailo mewé nte dolo kuburé ni po tó ta ttésao re yafé se téngóto né fié re birahi, mayta ta po miné ni wlólo né nbékbako be kyat ta rmóté né riri momé se re nlé ndimé. 28 Necé tadolo mewé se téngóto po tó né dolo wlomi né fmétegél po Jou ni, momongo po wlomi wlólo né, tadélé fmalól re flé ndimé.

29 Fkangelang óro mewé, guru-guru agama Yahudi ta funé fié Musa ni kitab abén limé né, re kyat Yahudi mew ta fdéréré dodoto Farisi né! Mew ta néi fmalólé ndimé. Sababta re fakéwelo keé nabi-nabi tatubé lima nesté riri kuburé né se fié ndimé. Re kyat ta wlori métegélé né ma mewé re ffafié keé riri kuburé ni béboko né nóté. 30 Bóngo féceg faje, ‘Iga amé kdótlé mam gele re gae tatubé lima ta rpuné keé Jou Lahatala ni nabi nesté né, amé nase kdéréré si pa.’ 31 Mayta ta féceg fajé né, necé mewé re fmangaku ta fatuwé, po kyaté-kyat ta rpuné keé Jou ni nabi tatubé lima nesté, si nturi re gburi ta mew ta ntei óro, se mgó mewé nóté. 32 Se ta fié né fpe be ta sólé né le, bo ftalko nimi gele re gaé tatubé lima nesté wlori ta lé se rpe be sélsólé né!

33 Ceh! Mew ta néi kyat léo mewé. Tadolo guw ta nbisa i né. Mew ta néi, kyat léo né riri nturi re gburi mewé, dolo guw ta nbisa i né nturi re gburi né. Se Jou Lahatala nase nwóté keé mew némin po naraka wlólo, se bisa fówés pa na. 34 Bóngo flongé fafié. Ya nase bo kané nabi-nabi, kyat ta runé félé né, re guru-guru agama Yahudi ta runé fié Musa ni kitab abén limé nesté, bóngo reni kyat séfis néli ta nase mewé bo fpuné keé si né. Reni iglé nóté ta bo fsalibé keé si, ta iglé né ga si po nimi um sambayangé lo bo réswako róri wólé ta ni wómo mdalémé né, bóngo reni iglé nóté ta fféjalé si bo rfakangelangé keé si po kota faisó ga rfan po kota ta iglé nóté. 35 Se Jou Lahatala nase bo nfasólé keé mewé, sababta nimi gele re gaé tatubé lima nesté re rpuné kyat félé po dunia njé ni wlólo nte. Po faiwóbno né mewé fpuné keé Habel ta wlo métegél po Jou ni njé, ntébéné ga fpun félé nóté sogado Barekha ni ntu nabi Zakharia, mewé fpuné i né po Um Sambayang ta npélóyé njé ni wlólo, po géwgów ta raréntapén haiwan ta rpeé riri sadaka re po géwgów ta Jou nénwómo ni kyaté né ni fapéluné. 36 Flongé fafié ta Ya kécegé nte. Mewé kyaté-kyat ta isémé nte Jou Lahatala nase nfasólé mewé, sababta fpe be ta lé ndimé."

Yesusé wlo kangelangé sababta kyat Yerusalemé né rlongé I pa

37 Rewóré ta néi, Yesusé nécegé nóté, "Sené mewé, kyaté-kyat Yerusalemé né! Sababta Jou Lahatala nané ni nabi tatubé lima nesté rfawómo ni faftóté po mew ni, mayta ftéo róri lóy sogado ffamóté keé si. Masike fajé ma re nuén fis néli ro, bo kfajólo mewé bo férakén Ya, tadolo mané pégelo ta nfajólo ni ntu né lima se nobo si po nó naék pópo lo né. Mayta mewé wlomi pa. 38 Se ftarukira fafié, sababta Jou Lahatala nase nfatoléné keé *23:38 Géwgówe nje, Méitén Yunani oikos, ni ngale né ‘umé’. Po ayat ta nje, Yesusé I po min Um Sambayang ta Npélóyé nje ni, se ahli Alkitab félé be récegé oikos ni ngale né Um Sambayang ta Npélóyé njé ni. Mayta, nece ma bisa ni ngale ‘Yerusalemé’ né le. nimi Um Sambayang ta npélóyé njé nase béklingéné. 39 Bóngo flongé fafié é, po ngénngan ta ntei óro, mewé nase fémnaw Ya pafule, sogado ni po waktu ta re kwómé nmulé né gatare nase féceg faje, ‘Tsuba re ttail I, ta Jou Lahatala re nané I nwóm lima nje.’ "