1 Rewóré ta néi, Yesusé ncópén tóma Agama Yahudi né riri Um Sambayang ta Npélóyé njé ni. Waktu ta néi, ni motemote nesté rfarakné si néli po I ni, se rfaftulo I bangunan-bangunan ta fié-fié po min Um Sambayang ta Npélóyé njé ni wlólo né. 2 Bóngo Yesusé nécegé si faje, "Se re fémnaw bangunan-bangunan ta fié-fié nte? Flongé fafié é ta Ya kécego mewé nte, pote se néli nase reni kyat ta bo rfagégné keé ndimé. Se ni lóyé né nase fapusó le ma tisé ta bo terétewlé po góo lo nóté."

3 Rewóré ta néi, Yesusé nfan I néli po métét Zaituné, se néntolén I pocé. Bóngo ni motemote nesté rférakné si néli po Yesus ni bo maduga si re I le ta rméiténé né. Pocé bóngo récegé I faje, "Guru, péséw ta mécegé cogo bo régéné keé Um Sambayang ta npélóyé njé né, nase ngané fisé ga bo ndadi i? Mfébingo amé bo kuné, bóngo ni faféyalé né sói iga Awé bo mwómé nmulé né, re iga dunia njé nkiamaté né ni faféyalé né fanfawa?"

4 Bóngo Yesusé ncónglo si, "Fpe mew fafié é, ma sogado reni kyat ta rlólé mew na! 5 Sababta nase reni kyat félé ta rwómé rut Ya ngósnogé, se réceg faje, ‘Ya nte I ro, Kolano ta Jou Lahatala néjaji kwómé bo kfasalamaté kyaté njé!’ Mayta si ta néi, maduga bo rlólé keé kyat ta félé né bo rdéréré si. 6 Mewé nase flongé ta récegé cogo bo rfaparang po bótén esó pari po géwgów nésé né. Mayta ma fémtat na. Sababta férimé ta néi mare ndadi i, mayta ta dunia nje bo nkiamaté né nwómo i ni waktu pafule. 7 Sababta nase reni kyaté-kyat ta si po bótén esó rfaparang re kyaté-kyat ta si po bótén nésé, bóngo kolano isó i re ni kyaté-kyaté né nase rfaparang re kolano isó nóté i re ni kyaté-kyaté né. Se nase kyaté né nfatélóto i, bóngo reni suyé po géwgów pua le. 8 Mayta férimé kangelang ta néi, tagare ni faiwóbno ta dunia nje nkiamat pafule né.

9 Se po waktu ta néi, kyaté-kyat ta rdélé pa né nase rgó mewé ga rfakangelang sogado rpuné keé mewé nóté. Bóngo férimé kyat po suku bangsa po géwgów pua le nase riri lé keé mewé, sababta mewé fdéréré Ya. 10 Bóngo kyat félé ta rdélé Ya né, nase rdélé Ya pa na. Sababta si nase rfatut lé, bóngo rpo keé riri délé né néli bo rfakangelangé keé si nóté. 11 Pocé nase reni kyat félé ta rwómé, se récegé cogo si nabi ta bo rfawómo Jou Lahatala ni faftóté nesté. Momongo rlólé, si maduga bo rlólé keé kyat ta félé né bo ma rdélé Ya le na. 12 Se néli re lima né, nase kyat félé rbóngé rpe be ta lé se re rfamésié isó re isó pana. 13 Mayta kyat pai ta ndéréré Ya sogado fajé néli le, Jou Lahatala nase nfasalamaté keé i. 14 Se Habar ta Nfié ta Jou Lahatala bo nkawasa dolo Kolano po ni kyaté né, nase rfawómo po kyaté-kyat ta po dunia nje ni wlólo nte, bo férimé suku rduk yéféné bo rdélé Habar ta Nfié njé. Rewóré ta néi, ga tagare dunia njé nkiamaté."

15 Yesusé nécegé nóté, "Pote se néli, mewé nase fémnawé kyat léo isó ta ni lé Jou Lahatala njé bo nwómé. I nase nosél po géwgów kudus ta Jou Lahatala nénwómo ni kyat po Um Sambayang ta npélóyé njé ni wlólo né, ta dolo Jou Lahatala re néceg po nabi Daniel ni né.*24:15 Fwaca nubuate njé po buk Daniel 9:27; 11:31; 12:11. (Pai ta nwaca nte, ntarukira fafié bo ncae ni ngale né). 16 Iga fémnawé kyat ta nmakotale njé re nosél pocé, kyaté-kyat ta mew po bótén Yudea né, fémlale fówés néya po métété lo bo fépiné mew pocé. 17 Ta mew po um papo lo né ma, ftebé bo fyó nimi gina po umé wlólo né na. 18 Fajé nóté re kyat ta si po bété lo né, ma réléo riri kabaya ta po umé lo né na. 19 Ta lebe rkangelangé né, mépin ta rpe lapori, re ta rfasusé nturi galólé né, nase ta délé rkangelangé! 20 Se féror po Jou Lahatala ni óro, bo waktu ta fówésé né bóténé njé nmaklóngéné, re ma mgó po ngénngan Sabat na. 21 Sababta po ngénngan ta néi, fatuw-fatuw ta kyaté né tadélé rkangelangé, lebe kangelang po férimé kyat ta re rbósémé ntubé né. Po faywóbno ta Jou Lahatala ntulada dunia nje sogado nete né, kangelang ta dolo fajé né tduk pafule. Sogado ngénngan ta kangelangé né rewóré ma, nase reni pana ta dolo fajé né. 22 Se iga ngénngan ta kangelangé né ga Jou Lahatala npe sogado mnuwé, kyaté né réfen pa se nase rmóté ndimé. Mayta Jou Lahatala nmésié ni kyat ta re npili si né, se nfakétobé keé ngénngan ta kangelangé né.

23 Po waktu ta néi, iga reni kyat ta récego mewé, ‘Coba fémnawé! Mesiasé njé I pote!’ Pari récegé mew faje, ‘Mesiasé njé I ntéli!’ Ma fdélé na sói ta récegé né. 24 Sababta nase reni kyat félé ta rwómé né récegé cogo si Mesiasé, bo tisé récegé cogo si nabi ta bo rfawómo Jou Lahatala ni faftóté nesté, momongo rlólé ndimé. Si nase rfaftulo riri kawasa re rpe mujizaté bo kyaté né rdélé si. Si ma nase bo rfalélólé keé Jou ni kyat ta re npili si né bo rdéréré si nóté. 25 Se fatélolmo mew fafié, sababta ta féléo i né ndadi i pafule, Ya kfébingo mewé ntubé óro.

26 Se iga reni kyat ta récego mewé, ‘Coba fémnawé, Mesiasé njé I ntéli po géwgów ta sésé bóto ta nélówé pnuwé njé ni!’ Ma fpe néli na. Pari iga reni ta récegé, ‘Coba fémnawé, Mesiasé njé népiné I ntéli po umé wlólo,’ necé ma fdélé na nóté. 27 Sababta po waktu kyat ta Ya I yama Jou Lahatala ni bo kwómé né, nase férimé kyaté rémnaw Ya tadolo rémnaw lémlém ta ncaité i po ngancóo sogado ngénngané ncepé né. 28 Adeade reni haiwan ta nmót po géwgów faisó ni, férimé kyaté nase runé, sababta rémnaw mané ta rénopé né rfajólo si pocé bo ró ni wóngété né. Ni ngale né, iga Ya kwómé nmulé, nase férimé kyaté rfajólé bo rémnaw Ya."

29 Yesusé nécegé nóté, "Iga ngénngan ta nkangelangé njé re ntélapésé, ngénngané njé nase ndérorémé. Sni njé ma nase ntul pana. Ngó ta po langété lo né ma nfamnapo i nópé, re férimé ta po langété lo né ma, nruae i néli re lima. 30 Se po waktu ta néi óro, nase fémnawé reni faféyal po langété lo, bo funé Kyat ta I Yama Soroga njé bo nwómé nmulé. Iga fémnaw ta néi, férimé suku ta po dunia nje ni wlólo nte nase rémtaté se rtangésé ndimé. Sababta férimé si nase rémnawé Kyat ta Yama Soroga lo njé nwómé ndé mét yama langété lo. Nfauto ni manano re kawasa ta pélóyé né. 31 Bóngo trompeté né nase ni gli né tadélé pélóyé, se Kyat ta I Yama Soroga lo njé bo nané ni nénan-nénan ta si yama soroga né rcópéné bo rfajólo ni kyaté-kyat ta I re npili si po férimé géwgów ta po dunia njé ni wlólo nte, po ta wóm sogado ntit ta wómé."

32 Yesusé néceg adeade isó njé ni glio faje, "Coba fémnaw ay ara né. Iga ni séngsóng ta myaku néga re nétubél i, necé mewé re funé bo népyoné ro. 33 Fajé nóté, iga ngénngan kangelang ta kécegé né re ndadi i ga tagare funé, re mnuw pana Kyaté Ntu ta nwóm yama soroga njé bo nwómé nmulé ro, tadolo kyat ta i po ngówéné gbono se rebo ncungé njé. 34 Se flongé fafié ta Ya kécego mewé nte. Kyat ta rhidup po oras ta ntei né, reni ta nase rmót pafule, sogado férimé ta kécegé né re ndadi i ndimé. 35 Langét re bétbété nase myangésé ndimé, mayta Ya nik méiténé né nase myangés pa sogado fajé néli le."

36 Yesusé nécegé nóté, "Reni kyat isó pa ta nuné, ngané fisé ga Kyaté Ntu ta I yama soroga njé bo nwómé nmulé. Ni nénan ta po soroga lo né ma runé pa. Kyaté Ntu ta I yama soroga njé le ma nuné pa. Maduga Moke ta I po soroga njé le ta nuné. 37 Sababta iga Kyaté Ntu ta I yama soroga njé ga nwómé nmulé, kyaté né nase rtélélé, necé tfatailo dolo tatubé lima ta nabi Nuh se kipésé né, kyaté né ma rtélélé. 38 Po waktu ta néi, si runé pa kipésé bo nfadiré keé bóténé njé né. Se maduga rémnóm re rinémé róri le, réfsów re rfafsóo né ma nfatuti fajé óro, sogado ngénngan ta Nuh ncung i némin po kapalé njé ni wlólo né. 39 Se kyaté-kyaté né runé pa ta bo kipés ta pélóyé né, sogado wóé njé re nbaké se rémdiré né, ga taga runé ta bo rbolito né. Necé nase ta dolo fajé nóté, iga Kyaté Ntu ta bo nwómé nmulé yama soroga né, kyaté-kyaté né rfasadia si pa. 40 Po waktu ta néi nóté, iga reni món séluwé rpe yabé po bété lo, isó njé Kyaté Ntu ta I yama soroga njé nase nyó keé i, ta isó njé ga nase nfatoléné keé i. 41 Se po waktu ta néi nóté, iga reni mépin séluwé rtok gandumé, isó njé Kyaté Ntu ta I yama soroga njé nase nyó keé i, ta isó njé ga kfatoléné keé i.

42 Se tamulo Ya kécego mewé bo fpe mew fafié, sababta nase funé pa ngané fisé ga nimi Jou njé bo nwómé né. 43 Mayta mewé ma mare ffatélolmo mew fafié, reni ade-ade isó nje: Iga kyat ta ni umé njé nuné ni ngénngan ta reni kyat ta bo rwómé rfalewés po ni umé wlólo, nase nyénéf pa se nfaménawé bo ta nfalewésé njé ma ncung na. 44 Fajé nóté re mewé, mewé mare ffasadia mew fafié, sababta Kyaté Ntu njé bo nwóm yama soroga né nase funé ni ngénngan pa."

45 Yesusé nécegé nóté, "Iga reni kyat yabé isó ta npande re lénglongo fié, se npe ni yabé né ma fié ndimé, nase ni tuangé njé nélóngé i bo nfaménawé ni tuangé njé ni kyat yabé ta iglé né bo ndo si mnómé. 46 Pocé kyat ta npe yabé njé nase tadélé séngséngé bóto i, iga ni tuangé njé nfané néléyé ga némnaw yabé ta nané i npe né fié ndimé né. 47 Se fatélolmo mew fafié ta Ya kécego mewé nte, tuangé njé nase npo kawasa po ni kyat yabé njé ni bo nfaménawé ni gina sói le ta pocé né. 48 Mayta bo kyat yabé njé ga kyat léo i, nase nanuta po wlo wlólo né, 49 ‘Nik tuangé njé nase némnuwé lesu ga néléyé.’ Pocé bóngo nfaspésé keé ni dél kyat yabé ta iglé né, ga némnóm re ninémé ndé kyat ta rmaféinémé né. 50 Mayta ni tuangé nje nase télél be néléy po ngénngan ta i nuné pa né. Se iga re néléyé ga nfadótlo i npe yabé pa. 51 Bóngo kyat ta njéi nase ni tuangé njé nhukum i né tadélé météwé, tadolo kyat ta rmalólé nesté rbósémé né. Po géwgów ta néi, nase reni téngtangésé né raréntébné pa sogado rfakékikto ngangori né, sababta rbósémé né ta délé rkangelangé."