1 Yesusé nécegé nóté, "Iga Kyaté Ntu ta bo nwóm yama soroga njé bo nkawasa dolo Kolano I, necé tfatailo dolo kyaté-kyat ta po dunia nje ni wlólo nte, ta dolo mépiné mya si dórén yófésó ta ruté riri loga-loga se rtón manóy ta bo nwómé njé né. 2 Po si dórén yófésó né, sélimé né rpande pa, sélimé né rpande. 3 Sélim ta rpande pa né, ruté riri logaloga mayta rut yégét pa. 4 Sélim ta rpande né ga, ruté riri logaloga, bóngo ruté riri yégété nóté.

5 Nópé ga ménóyé njé mamla ta nwóm pa, se férimé rmamélelé bóngo ryénéf si ndimé.

6 Re dorém fapéluno né, ga rlongé be kyaté né rgagélayé, ‘Ménóyé njé re nwómé! Se mew lima ro bo tcéngé I!’

7 Mépin yófésó nesté rlongé ta néi, tabóngo rpangén néya rfakéwelo riri logaloga né bo réstingé. 8 Mayta mépin sélim ta rpande pa né ga re riri yégét pa, se récegé mépin sélim ta rpande nesté faje, ‘Fdo mam yégét facuci, mam logaloga nte bo nmóté se.’

9 Mayta mépiné mya ta rpande nesté rcónglo, ‘Alli bisa kdo mew pa, sababta nase nbung pa. Se ta fié né ffan po kyat ta rwagé yégété né bo fgoné.’

10 Tabóngo mépiné nesté rfané bo rgoné riri yégété. Si rtélapés néli, télél be ménóyé njé nwómé. Pocé ga mépiné mya sélim ta re rfasadia si né, rcungé rfadéréré re ménóyé njé némin po um ta rpe rameangé njé ni wlólo, tabóngo ngówéné njé ma rakété keé i.

11 Rewóré ta néi, ga mépin sélim ta rfané rgon yégété nesté rpólén si lima se rémnaw ngówén ta re rakété keé i njé. Pocé ga si rkakémé, ‘Moke! Moke! Mépil ngówéné nje su pa? Amé bo ksungé se.’

12 Mayta ménóyé njé ncónglo si nétó, ‘Flongé fafié é, Ya kféyalé mew pa.’ "

13 Yesusé néfétén adeade njé rewóré, tabóngo néceg faje, "Ta mulo né, mare ffasadia mewé, sababta mewé nase funé pa, ngané fisé ta Ya bo kwómé nmulé né."

14 Yesusé nécegé nóté, "Iga Kyaté Ntu ta Ya I yama soroga njé kwómé nmulé ga bo kawasa ta dolo Kolano né, kfatailo tadolo adeade isó nje: reni kyat isó ta bo nfan po pnuw ta lówé. Se waktu ta bo nfané né, nkakém férimé ni kyat yabé né, bo nané si rfafané ni pipis guraci né. 15 Pocé bóngo ta isó njé npo i pipis guraci calén limé, isó njé calén luwé, ta isó njé ga caléncó. Ndéréré isó-isó ni ta néfené nfaréné. Rewóré ta néi, tabóngo nfané. 16 Pocé, kyat yabé ta nduk pipis guraci calén limé njé, nyó lima tabóngo nfané nfalwagé, se ni pipis guraci né nbóng i, calén limé nóté. 17 Fajé nóté, kyat ta nduk pipis guraci calén luwé njé, i ma nfané nfalwagé se i ni né ma nbóng i calén luwé nóté. 18 Mayta kyat ta nduk pipis guraci caléncó njé ga, nyó lima ta nfané nóléy lopé se népiné keé pipisé né.

19 Pocé mnuwé ga ni tuang njé néléyé, bóngo nutné si, ‘Fawa, pipis ta kané mewé ffafané né?’ 20 Kyat ta nduk pipis guraci calén limé njé nyóg nétó ga ncónglo, ‘Moke, nim pipis guraci calén limé né, ya re kfafané se férimé re calén yófésó.’ 21 Bóngo ni tuangé njé nécegé i faje, ‘Fié ta awé mpe né. Awé ya niké kyat ta mpe yabé fié, re lénglongomé ma fié. Sababta masike ta ya kpo awé né maduga cuci le, mayta mfafané né fié. Se pote se néli, nase kpo aw yabé ta lebe félé nóté bo mfafané. Se msung tóma bo ya re awé tfasanang ité.’

22 Rewóré ta néi, kyat ta nduk pipis guraci calén luwé njé nfano ni tuangé njé, bóngo nécegé i faje, ‘Moke, nim pipis guraci calén luw ta mpo ya né, méngóto, ya re kfafané se kbóng calén luwé nóté.’

23 Tabóngo ni tuangé njé nécegé i faje, ‘Ta awé mfafané né fié, awé niké kyat yabé tadélé mdélé ya fié, lénglongomé ma fié. Sababta masike ta ya kpo awé né maduga cuci le, mayta mfafané né fié. Se ta félé né ma nase kpo awé bo mfafané nóté. Se awé ma msung tóma, bo tfasanang ité!’

24 Rewóré ta néi, kyat ta nduk pipis guraci caléncó njé nfan néli ga néceg faje, ‘Moke, ya kuné awé kyat isó ta iga méceg fajé, né mare kpe. Iga mané kyaté rfatónémé, mare anam téné né lebe félé. Re iga mané kyaté rfalingété, mare anam téné né ma lebe félé nóté. 25 Se pipis ta mpo ya njé kémtaté maga myangso ya, ta mulo kfafan i pa se képiné keé i bétbété wlólo. Se nje nim pipisé ta kfamulo awé nje, se myó i nmulé.’

26 Pocé bóngo ni tuangé njé nécegé i faje, ‘Awé, kyat léo awé, anim busu né! Fatuwé ta mécegé né: iga kané kyaté rfatónémé, kngongano si ta bo rfalingét fafélé. Kané kyaté rfatónémé pari rfalingété, necé re kuné nase rfamul po ya ni né lebe félé. 27 Ta mulo né, iga pipisé né ga mfafan pa, ta fié miséné keé po bangé lo. Bo iga ya kwómé, pipisé né mfamulé keé po ya ni né, reni bémbóngo nóté.’

28 Pocé, tabóngo tuangé njé nécegé ni kyat yabé ta iglé né, ‘Fyó keé pipis ta po i ni né, bo fpo keé kyat ta reni pipis guraci calén yófésó njé. 29 Sababta kyat ta lénglongori fié se réfen félé né, nase kpo si lébé félé nóté sogado nbung si. Mayta kyat ta lénglongori pa né, masike ta po si ni né masike cuci le ma, nase kyó keé nmulé. 30 Bóngo kyat ta reni féflabé gélesó pa njé, ftéo keé i nétó po dérorémé wlólo né. Po géwgów ta kangelangé se reni téngtangés re rfakékikté ngangori né.’ "

31 Yesusé nécegé nóté, "Kyaté Ntu ta I yama soroga njé, iga bo nwómé nmulé, ni nénan yama soroga né ma nase rdéréré I nóté, bóngo ntolén po ni karapesa kolano bo nfafané ni kawasa óro. 32 Pocé férimé suku nase rfajólo si po I ni. Bóngo bo nfara si nénase npe géwgów dirén luwé, dolo kyat ta nfara ni domba re kabéné né. 33 Se kyaté-kyat ta rpe be ta Jou mgo wlo né, si ta néi tadolo domba-domba né, se nase bo nfajólo si po ni féspal wónéyé né. Mayta kyaté-kyat ta rpe be ta Jou mgo wlo pa né ga, si ta néi tadolo kabén si, se nase nfajólo keé si po ni féspal balété.

34 Waktu ta néi óro, Kyaté Ntu ta re nkawasa dolo Kolano njé nase nécegé kyaté-kyat ta si po ni féspal wónéyé nesté faje, ‘Mew ta nik Moke re nbarakaté mewé né, fwóm lima óro po géwgów ta kawasa dolo Kolano Ya né, sababta faiwóbno ta dunia nje re ndadi i né, Ya re kfasadia góomi bo mew pocé óro. 35 Sababta, waktu ta ktélóté né, mewé fdo Ya mnómé, Ya gligé mangé né ma, mewé fdo Ya wóé. Ta dolo kyat wamwóm Ya né ma, mewé fkakém Ya se ktolno mewé. 36 Ya renik kabaya pa né, mewé fdo Ya kabaya. Ta Ya kpisé né, mewé fwóm lima se féflengén Ya. Ta Ya I po bui wlólo né ma mewé ta fwóm lima se féflengén Ya.’

37 Bóngo re kyat ta wlori métegél po Jou ni né, bo récegé I faje, ‘Jou, ngané fisé ta mtélóté se kdo Awé mnómé né, pari glimé mangé se kdo Aw wóé né? 38 Ngané fisé ta dolo kyat wamwóm Aw po mam bóténé lo se mtolén po mam umé lo né? Pari ngané fisé ta kémnawé re nim kabaya pa se kdo Aw kabaya né? 39 Bóngo ngané fisé ta amé kémnawé mpisé se kwómé kéflengén Awé né? Re ngané fisé ta msung bui se amé kwómé kéflengén Awé né?’

40 Bóngo Kolano njé nase nécegé si faje, ‘Fatélolmo mew fafié ta Ya kécego mewé nte, férimé ta fpe se fgali kyat isó Ya niké fténog re rémag ta kyaté réngóto si dolo re riri ngale gélesó pa né, necé tadolo re fpe ta fié po Ya ni.’

41 Rewóré ga bo nécego kyat ta po ni féspal balété né faje, ‘Fówés pocé, mew ta Jou Lahatala re nbobeto mewé né. Mewé fsung némin po lutén ta nbéblob ta nénmót pa dorém re ngénngané njé. Lutén ta njéi, re rfasadia setan-setané né re riri kolano né góori, se mewé ma fsung pocé óro. 42 Sababta waktu Ya ktélóté né, mewé fdo Ya mnóm pa. Waktu Ya gligé mangé né ma mewé fdo Ya wóé pa. 43 Fajé nóté, waktu tadolo kyat wamwóm Ya po nimi bóténé lo né, mewé fkakém Ya pa bo ktolno mewé né. Ya re nik kabaya pa né, mewé fdo Ya kabaya pa, re ta kpisé né fwómé bo féflengén Ya pa. Ta Ya I po bui wlólo né ma, mewé féflengén Ya pa nóté.’

44 Se kyaté-kyat ta néi, nase bo réceg faje, ‘Jou, ngané fisé ta amé kémnaw Awé mtélót pari glimé mangé ga kdo Awé mnóm re wóé pa né? Ngané fisé ta dolo kyat wamwóm Awé, pari re nim kabaya pa se kgali Aw pa né? Ngané fisé ta Awé mpisé pari Aw po bui wlólo ga amé kwómé kéflengén Aw pa né?’

45 Bóngo I nase ncónglo si faje, ‘Fatélolmo mew fafié, iga kyat ta re riri ngale gélesó pa ga mewé fgali si pa, necé fatuw-fatuw ta dolo fgali Ya pa nóté.’ "

46 Bóngo Yesusé nécego si nóté, "Kyaté-kyat ta wlori rgali I pa né, Jou Lahatala nase nané si rcung po lutén ta nbéblobé se nénmót pa njé ni wlólo sogado fajé néli le. Mayta kyat ta rpe ta métegél po Jou ni né ga, nase rduk ta fié, se si re Jou Lahatala sogado fajé néli le."