Mateus 28

Yesusé nmóté mayta re npangéné nmulé

1 Ngénngan Sabaté re télapésé, ngénngan ta kyat agama Yahudi né bisa rpe yabé pa, se mgo po ngénngan Minggu, ta dérorém i lesu né, Maria kyat Magdala njé, i re Maria ta isó nóté, rfané bo réflengén Yesusé ni kuburé njé. 2 Néga télél be rbósém suy ta pélóyé. Ga réngóto, Jou Lahatala ni nénan isó ntebé yama soroga, nfalilésé keé lóy ta i po kubur legé ni gbono lo njé, se néntolén i po lóyé njé ni pépo lo. 3 Usno né ménano dolo lémlémé né. Ni kabaya njé ma tadélé némfusé ndimé. 4 Tentara ta réjaga pocé né, rémtaté rémnaw i né, se rwéwewé, sogado terfabóy si nóp bétbété lo né, rméyawén pa tadolo kyat ta rmóté né.

5 Pocé Jou Lahatala ni nénané njé nécegé mépiné nesté faje, "Ma fémtat na. Ya kuné, mewé féyówé Yesus ta rcalib I njé. 6 Mayta tiso I pote, I re npangéné nmulé, ta dolo tatubé lima ta re nécego mewé né. Se lima fsung néminé bo fémnaw góo ta rfabóy I lo né. 7 Nte, famlale fpóléné mewé ro, bo ffébingo ni motemote nesté faje, ‘Yesus ta nmóté njé re npangéné nmulé. Se nase ntubé néli po bótén Galilea. Ntéli mewé nase fémnaw I.’ Se fatélolmo é, férimé ta ya kécegé nte!"

8 Pocé, tabóngo mépiné nesté rfatoléné keé kuburé njé. Rémtaté, mayta tadélé séngséngé bóto si. Se rcéreré né rbablé bo rfébingé férimé né po Yesusé ni motemote nesté ni.

9 Po yéfén fapéluno né, télél be Yesusé nwómo si, bóngo nécegé si faje, "Nimi tabea." Tabóngo rférakné si néli po Yesus ni, se régbi sóo né bóngo rcuba I. 10 Pocé, Yesusé nécegé si faje, "Ma fémtat na. Ffan néli bo ffébingo ftenog ta rdéréré Ya né, bo fécegé Ya re kpangéné nmulé. Se fané si rfan néli po bótén Galilea, bo Ya re si kfapdipéné ntéli."

Tentara né récegé cogo Yesusé ni motemote nesté rlewésé keé Yesusé ni mayaté njé

11 Waktu ta mépiné nesté si po yéféné lo lesu né, tentara-tentara ta réjaga Yesusé ni kuburé njé rfan néli po kota Yerusalemé. Se rfébingé po agama Yahudi né riri imam-imam ta rpélóyé né férimé ta re ndadi i né. 12 Tabóngo imam ta rpélóyé né, re kyat tut-kyat tut po agama Yahudi né rfajólo si se rfalécego ta bo rpólso tentara nesté bo ma réfétén néli re lima na. 13 Se récegé si faje, "Iga reni kyat ta rutné mewé, féceg faje, ‘Dorémé lo ta amé re kyénéfé né, Yesusé ni motemote né rlewésé keé ni mayaté njé.’ 14 Bóngo, iga gubernur Pilatusé nlongé ta néi, ma fémtat na, nómésta amé kécego i, bo ma npe mew gélesó na."

15 Rewóré ta néi, tentara nesté ryó pipisé né, bóngo rfané réfétén ta dolo rfaftóto si né. Necé ta mulo ga habar ta njéi kyat Yahudi né re réfétén néli re lima sogado ngénngan pésénte né.

Yesusé nané ni motemote nesté bo rféfané ni yabé né

16 Yesusé ni motemote yófésó re isó nesté, rfan po bótén Galilea, po métét isó ta Yesusé nané si rfano i njé. 17 Se re rwómé ntéli, néga rémnaw Yesusé, tabóngo rcuba I. Mayta po si dórén yófésó re isó né, reni séfis néli dolo bo rdélé pafule ta fatuw-fatuwé nejé Yesusé.

18 Pocé Yesusé nérakén si néli, bóngo nécegé si faje, "Férimé kawasa ta po soroga re po dunia njé ni wlólo né, re po Ya ni ndimé. 19 Se nte ffan po kyaté-kyat ta po férimé suku, bo féfétno si Habar ta Fié bo rdéréré Ya bo rdadi Ya nik motemote si. Bóngo fbaptisé keé si re Moke Jou Lahatala ni ngósno, ni Ntu njé, re ni Rohé njé. 20 Bóngo ffasodoto si bo rpe férimé ta Ya re kané mewé fpe né. Ffatélolmo mewé fafié, Ya nase kdéréré mew sogado ga fajé néli le."