1 Reni kyat isó ngósno Yohanesé, i ta nénbaptisé kyaté né. Nuéncó, Yohanesé nfan po bótén Yudea, po géwgów esó ta sésé bóto i bóngo re nalówé pnuwé njé. Pocé ta i nanénfawómo Jou Lahatala ni méitén po kyaté-kyaté né, nécegé si faje, 2 "Fngali mewé bo fdéréré Jou Lahatala óro, sababta re mnuw pana Jou Lahatala bo nkawasa dolo Kolano I po ni kyaté-kyat ta rdélé I né."

3 Yohanesé njé kyat ta tatubé lima lesu Jou Lahatala re nécegé bo nwómé njé. Se tatubé nabi Yesaya re nlefo po ni kitabé wlólo né, ni glio faje,

"Nase reni kyat isó ta bo nfébingo kyaté-kyat ta si po géwgów isó ta sésé bóto i, bóngo nalówé pnuwé.

I nase nécegé né nfakwat i tadolo faje,

‘Re mnuw pana, Jou bo nwómé ro!

Se ffamówé re ffamétegél yéfén ta I bo ndélo I njé.’ "*3:3 Nabi Yesaya ta nlefo nubuate njé po buk Yesaya 40:3. Nete ta ga ndadi i.

4 Yohanesé ni kabaya njé unta ni liko i, sno ni pétpiténé njé haiwan liko i. I nó mnómé né, kakaso re madu. 5 Po waktu ta néi, reni kyat félé ta rwóm po Yohanes ni. Kyaté-kyat ta rwómé né si yama kota Yerusalemé, re po férimé géwgów nésé nóté ta po bótén Yudea re po bótén ta nérakén wóé Yordané né. 6 Si rwóm po Yohanes ni se rfébingé róri sélsólé né, tabóngo Yohanesé nbaptisé keé si po wóé Yordané.

7 Reni kyat Yahudi félé nóté ta rdéréré dodoto Farisi re dodoto Saduki ta rwóm po Yohanes ni bo rané i nbaptis si né. Mayta po waktu ta Yohanesé némnaw si rpe lima né, tabóngo nécegé si faje, "Ee, mew ta ntéi kyat léo mewé. Mewé flé dolo guw ta nbisa i né. Mewé facogoma fwóm lima nte kbaptisé mewé bo Jou Lahatala ma nfasólé mewé le na. 8 Iga fatuw-fatuw ta re fngali mewé, mare fdéréré be sói le ta Jou Lahatala nané mewé fpe né, bo runé ta re fngali mewé né fatuwé. Iga fpe fajé, kfatailo mewé né tadolo téntóném ta fié se ni pyono né ma fié ndimé. 9 Mewé nte Abrahamé ni ntu re gbu mewé se masike fsólé ma fécegé cogo Jou Lahatala nase nfasólé mew pa. Fajé pa! Ya kécego mewé, bo Jou Lahatala wlo, lóyé nte ma bisa niwéné keé bo rdadi Abrahamé ni ntu re gbu*3:9 Kyat Yahudi né riri gae, Abrahamé. I ta Jou Lahatala néjaji bo npo barakat tatubé. Se kyat Yahudi né récogoma nase rduk salamaté né, sababta si Abrahamé nturi re gburi. Mayta Yohanesé nécegé rcólé, mare rngali si re rpe ta métegél po Jou ni, pocé ga rduk salamat.. 10 Jou Lahatala re nfasadia I bo nfasólé keé kyaté-kyat ta rdéréré I wlo njé pa né. Necé tadolo kyat isó ta re nfasadia nó kmóné bo ncélépé keé ay isó ta ni pyono lé njé, se nwóté keé i némin po lutén njé ni wlólo.

11 Ya kbaptisé mew re wóé, necé ndadi faféyal isó ta re fngali mewé se fdéréré Jou Lahatala. Mayta ya rewóré, nase reni Kyat isó nóté ta bo nwómé, Kyat ta njéi ya re I né, I ni kawasa lebe pélóyé. Se bo nané ya kgali kuté ni sandalé né ma pantas pa. I ta njéi ta nase nbaptisé mew re Jou Lahatala ni Roh re luténé*3:11 ‘Ta kbaptisé mew re Jou Lahatala ni Roh re luténé’, reni tafsiran abén luwé. Esó, Jou Lahatala ni Roh ta nfaberési kyat ta rdélé I né róri sélsólé, tadolo lutén ta nfaberési guraci né. Esó nóté, Yesusé npo ni Rohé njé po kyat ta rdélé I né mayta kyat ta rdélé I pa né nase nfasól si né tadélé météwé tadolo lutén ta nbablobé se nanénmot pa njé.. 12 I bo nfarfara keé kyaté-kyat ta rdéréré I, re ta rdéréré I pa né. Necé tadolo kyat isó ta ntófé gandumé se rfara keé ni liko né. Ni wóngto ta fié né ga niséné keé po ni gudangé wlólo, ni liko né ga ntapéné keé po lutén ta nbablobé se nanénmót pa njé ni wlólo."

13 Po waktu ta néi, Yesusé nwóm lima bótén Galilea se nfan néli po wóé Yordané bo nané Yohanesé nbaptis I. 14 Mayta Yohanesé dolo bo wlo pa Yesusé ni réroré né, sababta Yohanesé nbósémé né dolo pantas pa bo i ta nbaptis Yesusé né, se néceg faje, "Moke, mare Awé ta mbaptis ya. Mpe sói se mwóm lima bo ya ta kbaptis Awé?"

15 Mayta Yesusé nécegé i faje, "Gélesó pa, awé ta mbaptis Ya ro, sababta iga awé mbaptis Ya, necé ni ngalé ité re tpe ndimé ta métegél po Jou Lahatala ni." Yohanesé nlongé ta Yesusé néceg fajé né, tabóngo nbaptisé keé Yesusé.

16 Pocé Yohanesé nbaptis Yesusé rewóré, tabóngo Yesusé npusél po wóé lo se néya. Po waktu ta néi óro, langété njé ntépilé, tabóngo Yesusé némnaw Jou Lahatala ni Rohé njé ntebé nóp dolo mané pombo isó se nétingo I. 17 Néga télél be rlongé méitén isó yama soroga ta ni glio né tadolo faje, "Neje, Ya ntig ta kgogoru re kdodara I. I ta npe sogado wlegé nje tadélé séngséngé bóto i."