Mateus 4

Setané né riri kolano njé néyówé yéféné bo ntofén Yesusé

1 Rewóré ta néi, Jou Lahatala ni Rohé njé nut Yesusé néli po géwgów esó ta sésé bóto i bóngo nélówé pnuwé njé. Pocé setané né riri kolano njé néyówé yéféné bo ntofén Yesusé. 2 Po géwgów ta néi, Yesusé npuasa se némnóm re niném pa né *4:2 Puasa ni ngale né, ngénngan ta né témnóm pa. Ta mulo kyaté rpuasa né, bo ngénngan ta né, wlori be po Jou Lahatala ni se rméiténé rdé be Jou ngénngan ta né.re ngané yóféfót re dorém yóféfóté, se re ntélóté. 3 Tabóngo setané né riri kolano ta nanéntoféné kyaté bo rpe sélsólé njé nwómo Yesusé se nécegé I faje, "Awé nte Jou Lahatala ni Ntu Awé to? Pana fajé, mané lóy-lóyé nte ndadi roti óro."

4 Mayta Yesusé wlo pa se nécegé i faje, "Po Jou Lahatala ni Buké wlólo né rlefo faje,

‘Kyat ité nte mare témnómé, mayta necé le pa ta nfahidup ité né,

mare tdéréré farimé ta Jou Lahatala nané ité né*4:4 Nabi Musa nlefo ta né po buk Ulangan 8:3..’ "

5 Rewóré ta néi, ga setané njé nuté keé Yesus po kota Yerusalemé, ta kyaté né rkakmé i Jou Lahatala ni kota i. Pocé tabóngo nuté keé Yesus néya po agama Yahudi né riri Um Sambayang ta npélóyé njé ni papo lo. 6 Bóngo nécegé I faje, "Iga Awé nte fatuw ta Jou Lahatala ni Ntu Awé, mpawél Aw pote bo nóp bétbété lo ma, nase mpe gélesó pa, sababta po Jou Lahatala ni Buké wlólo né, rlefo faje,

‘Jou Lahatala nase nané ni nénan ta si yama soroga lo né rtóno faori po Aw ni bo ralóngé Aw néya,

bo sóomé né ma nétit nóp po bétbét lo na*4:6 Kolano Daudé nlefo ta né po buk Mazmur 91:11, 12..’ "

7 Mayta Yesusé wlo pa se nécegé i faje, "Po Jou Lahatala ni Buké lo ma rlefo faje,

‘Jou Lahatala ta mewé fsuba I njé, ndél pa bo ftofén I*4:7 Nabi Musa nlefo ta né po buk Ulangan 6:16..’ "

8 Rewóré ta néi, setané njé nuté keé Yesus néya nóté, po métét isó tadélé namógé njé ni pépo lo. Pocé nfaftulo Yesus farimé kolano né riri kawasa ta po dunia wlólo né, re sói néli ta fié re birahi po riri kawasa né wlólo. 9 Pocé tabóngo nécego I nóté, "Férimé ta mémnawé né nase kdo nimé ndimé, mayta mare msuba ya."

10 Mayta Yesusé nécegé i faje, "Ee setané ta awé, mówés pocé! Po Jou Lahatala ni Buké wlólo né re rlefo faje,

‘Mewé mare ftail be Jou Lahatala le, sababta maduga I le ta mare ftail I né,

se maduga fpe be ta I nané mewé né.*4:10 Nabi Musa nlefo ta né po buk Ulangan 6:1:’ "

11 Rewóré ta néi, tabóngo setané njé nfan i se nfatoléné keé Yesusé, tabóngo Jou ni nénan ta yama soroga né rwómé se rleleyan I.

Yesusé nfamdié ni yabé né po bótén Galilea

12 Pocé Yesusé nlongé rgó Yohanes ta nénbaptisé kyaté njé se rfasungé keé i po bui wlólo né, tabóngo nfatoléné keé bótén ta njéi se néléy I po pnuw Nazaret ta po bótén Galilea né. 13 Po pnuw Nazareté, tabóngo nfané nóté se ntolén I po kota Kapernaum ta po talaga Galilea ni lapo lo né, po suku Zebulon re suku Naftali né riri bóténé lo. 14 Sogado Yesusé ntolén I po Kapernaumé né, sababta po tatubé lima lesu sói ta Jou Lahatala re néceg po nabi Yesaya ni né re ndadi i, tadolo faje,

15 "Kyaté-kyat ta rtolén po bótén Zebulon re po bótén Naftali,

re ta si po talaga Galilea lapo re po bótén wóé Yordané ni féspalé né,

nesté kyaté-kyat Yahudi si pa.

16 Kyat ta nesté rtolén po dérorémé wlólo, mayta si re rémnaw Manano isó njé tadélé npélóyé.

Kyat ta rtolén si po dérorémé wlólo né, iga rmóté né nase ralówé re Jou Lahatala sogado fajé néli le, mayta Manano ta njéi re nfaftulo I néli po si ni se nase bisa rduk yéfén ta bo rsalamaté*4:16 Nabi Yesaya ta nlefo po buk Yesaya 9:1-2.."

17 Waktu po Kapernaumé né, Yesusé nfamdié ni yabé né, se nfawómo Jou Lahatala ni faftóté po kyaté-kyaté né, se néceg faje, "Fngali mewé bo fdéréré Jou Lahatala óro, sababta re mnuw pana, I bo nkawasa dolo Kolano po ni kyaté-kyat ta rdélé I né!"

Yesusé nkakémé ni motemote ta po faiwóbno né

18 Nuéncó, Yesusé nfané né ndé I po talaga Galilea lapo, pocé ga némnaw món faftén séluwé. Ta isó njé ngósno Simoné, (ta kyaté né rkakmé i Petrusé njé), re isó nóté ngósno Andreasé. Si dórén luwé né rénpawlo riri lóbén po talaga njé ni, sababta si riri yabé né maduga réyówé be iné. 19 Pocé Yesusé nkakém si dórén luwé né, "Mew lima fdéréré Ya! Nimi yabé né maduga féyówé be iné le. Mayta bo fdéréré Ya, nase kfasodoto mewé bo féyówé kyat ta bo rdéréré Ya." 20 Rlongé ta néi, tabóngo si dórén luwé né rfatoléné keé riri lóbéné né se rdéréré Yesusé.

21 Rewóré ta néi, Yesusé nfan néli cuci, némnaw món faftén si dórén luwé nóté. Ta isó njé ngósno Yakobusé, ta isó njé ngósno Yohanesé. Si re riri moke légaé Zebedeusé, rénfakéwelo riri lóbén po yelé wlólo. Pocé tabóngo Yesusé nkakém si dórén luwé nóté bo rdéréré I. 22 Rlongé ta néi, tabóngo rfatoléné keé riri moke njé re yelé né se rdéréré Yesusé nóté.

Yesusé nfasodoto re nfafié kyat félé

23 Rewóré ta néi, Yesusé nfan po pnuw re pnuw ta po bótén Galilea né, bo nfasodoto kyaté-kyat po agama Yahudi né riri um-um sambayangé lo bo nfawómo Habar ta Fié po kyaté-kyat ta Jou Lahatala bo nkawasa dolo Kolano po ni kyaté-kyat ta rdélé I né. Re nfafié keé kyaté-kyat félé ta reriri péspisé sói le. 24 Pocé tabóngo kyaté-kyaté né réféténé keé néli re lima sói ta Yesusé re npe né po férimé géwgów ta po bótén Siria né. Se si ma rwómé, ruté kyaté-kyat ta reriri péspisé sói le: reni ta sogado rbósémé né tadélé rkangelangé sababta rpisé, reni ta setané ncung si, ta rmati-mati ayamé, reni ta rlugu, se Yesusé nfafié keé si ndimé. 25 Pocé se néli, tabóngo kyaté né tadélé félé ta rdéréré Yesusé né, reni kyaté-kyat ta si lima bótén Galilea, Dekapolis*4:25 Dekapolisé ni ngale pnuw yófésó., Yerusalemé, lima bótén Yudea re ta si lima po wóé Yordané ni faspalé né.