Iga bo fgali kyat ta reriri reróri pa né, ma féyówé ngósnomi na
1 Yesusé nécegé nóté, "Fatélolmo mew fafié! Iga bo fpe ta métegél po Jou Lahatala ni né, ndél pa bo maduga féyówé ngósnomi be po kyaté. Sababta iga fpe ta dolo fajé né, necé maduga kyaté le ta riri fié mewé, mayta féyfié ta lima nimi Moke Jou Lahatala ni né nase fduk pa.
2 Se iga bo fpo nómi sói néli bo fgali kyat ta reriri reróri pa né, ma fféfétén na ta re fgali si né tadolo kyat ta récegé cogo rdéréré Jou né, mayta rlólé. Sababta iga re rgali kyat ta reriri reróri pa né, réféténé néli re lima sogado po um sambayangé lo re po yéféné lo né, bóngo rufé riri trompeté né bo kyaté né rtail si. Ya kécego mewé, si rduk féyfié be po kyaté, mayta po Jou ni né, nase rduk gélesó pa. 3 Mayta iga mewé bo fpo nómi sói néli bo fgali kyat ta reriri reróri pa né, ta fié né kyat nésé runé pa. Necé tadolo faomi ta wónéyé né npo, ta balété né ma nuné na. 4 Sababta masike isó ta nuné pa, mayta nimi Moke ta I po soroga lo njé re nuné. I ga némnawé ta mewé fgali si né, se nase npo ni féyfié né pélóy po mew ni."
6 Mayta mewé, iga bo fméiténé fdé Jou né, fpe tadolo faje: fsung némin po nimi kamaré lo, fakété keé ngówéné njé bo fkumélé ga tagare fméiténé fdé nimi Moke Jou Lahatala ta masike fémnaw I pa, mayta I pocé. Iga fpe ta dolo fajé, masike kyaté né runé mew pa, mayta I nuné sói le ta mewé bo fécegé né, se nase ni féyfié né npo mewé.