1 Yesusé nécegé nóté, "Fatélolmo mew fafié! Iga bo fpe ta métegél po Jou Lahatala ni né, ndél pa bo maduga féyówé ngósnomi be po kyaté. Sababta iga fpe ta dolo fajé né, necé maduga kyaté le ta riri fié mewé, mayta féyfié ta lima nimi Moke Jou Lahatala ni né nase fduk pa.

2 Se iga bo fpo nómi sói néli bo fgali kyat ta reriri reróri pa né, ma fféfétén na ta re fgali si né tadolo kyat ta récegé cogo rdéréré Jou né, mayta rlólé. Sababta iga re rgali kyat ta reriri reróri pa né, réféténé néli re lima sogado po um sambayangé lo re po yéféné lo né, bóngo rufé riri trompeté né bo kyaté né rtail si. Ya kécego mewé, si rduk féyfié be po kyaté, mayta po Jou ni né, nase rduk gélesó pa. 3 Mayta iga mewé bo fpo nómi sói néli bo fgali kyat ta reriri reróri pa né, ta fié né kyat nésé runé pa. Necé tadolo faomi ta wónéyé né npo, ta balété né ma nuné na. 4 Sababta masike isó ta nuné pa, mayta nimi Moke ta I po soroga lo njé re nuné. I ga némnawé ta mewé fgali si né, se nase npo ni féyfié né pélóy po mew ni."

5 Yesusé nécegé nóté, "Iga bo fméiténé fdé Jou Lahatala, ma ftalko na kyat ta récegé cogo rdéréré Jou mayta rlólé. Sababta si ta néi, iga rméitén rdé Jou, rwosél po agama Yahudi né riri um sambayangé lo re po yéfén lapo lo né, rpe fajé bo kyaté rémnawé bo rtail si. Flongé fafié é, si rpe fajé né nase rduk féyfié maduga po kyaté le, mayta po Jou ni né nase rduk gélesó pa. 6 Mayta mewé, iga bo fméiténé fdé Jou né, fpe tadolo faje: fsung némin po nimi kamaré lo, fakété keé ngówéné njé bo fkumélé ga tagare fméiténé fdé nimi Moke Jou Lahatala ta masike fémnaw I pa, mayta I pocé. Iga fpe ta dolo fajé, masike kyaté né runé mew pa, mayta I nuné sói le ta mewé bo fécegé né, se nase ni féyfié né npo mewé. 7 Se iga bo fméiténé fdé Jou, ma famlóngé na tadolo kyat ta rféyal Jou Lahatala pa né. Si rfailéo méitén ta néi né, sababta racogo ma Jou nase bo npo sói ta si réroré né. 8 Mayta mewé ma ftalko si na. Sababta masike féror pafule ma, nimi Moke Jou Lahatala re nuné sói néli ta mewé bo féroré né.

9 Se iga bo fméiténé fdé Jou Lahatala né, féceg faje,

‘Jou Lahatala, amam Moke ta mtolén po soroga,

amé farimé kcuba re ktail Awé.

10 Kéroré mwómé mdadi Kolano re mkawasa po mam hidupé wlólo, mdéréré Awé wlemé njé,

bo férimé ta ndadi i po dunia wlólo nte,

tadolo re ndadi i po soroga wlólo né nóté.

11 Kéroré bo mdo amé mnóm ta bo kó po ngénngan pésénte sogado nbung amé.

12 Re mfayangésé keé mam sélsólé né,

tadolo amé ma re kféyangésé keé kyaté né róri sélsól ta rpe po am ni né.

13 Mfaménawé amé bo ma rtófén am na,

re mgali amé bo ma kdéréré ta sólé né na.

[Sababta amé kuné, Awé ta mdadi Kolano,

Awé ta nim kawasa né tadélé fié re birahi,

se ksuba re ktail Aw sogado fajé néli le. Amin.’]

14 Se iga mewé ma re ffayfio fdé kyaté se ffaisno si wlo né pana, nimi Moke Jou Lahatala ta I po soroga lo njé ma nase nfayangésé keé nómi sélsólé né nóté. 15 Mayta iga mewé ffaisno wlo né lesu, nimi Moke Jou Lahatala ma nase nfayangés pa nómi sélsólé né."

16 Yesusé nécegé nóté, "Iga fpuasa, ma ffalélé usnomi ta dolo kyat iglé né na. Si maduga rpe fajé bo kyaté né runé ta rpuasa bo rtail si. Kyat ta néi masike récegé rdéréré Jou, mayta rlólé le. Ya kécego mewé, kyat ta rpe fajé né si maduga rduk téltail be po kyaté, mayta po Jou ni né nase rduk gélesó pa. 17 Mayta iga mewé fpuasa, mare ffalulo nimi uté né re yégété bo ffaseé mew fafié, re ffaléefé mewé bo usnomi né berési. 18 Iga fpe fajé, nase kyat iglé né ma runé mew pa ta fpuasa né. Maduga nimi Moke Jou Lahatala le ta nuné mewé né. Iga fpe fajé ga nimi Moke Jou Lahatala nuné mewé, I nase npo ni féyfié né po mew ni."

19 Yesusé nécegé nóté, "Ma ffajólo be haréta po dunia wlólo nte na, sababta nase gófésé né rfatététlé keé re nase ncécéné sogado nlé i. Bóngo pote ma reni kyat ta rmélewésé né nase rwóm lima se ryó riri. 20 Se ma féyówé ta necé na, mayta fpe be sói ta Jou Lahatala wlo ncuka né. Iga fpe fajé, necé tadolo ffajólo haréta po soroga. Sababta iga po soroga, reni gófés pa, reni ta cécéné pa, kyat ta rmélewésé ma reni pa. 21 Ya kécego mew fajé né, sababta iga ffajólo be haréta, nase wlomi né be néli haréta lo. Mayta iga fpe be ta Jou Lahatala wlo ncuka né, wlomi né be néli po Jou Lahatala ni le."

22 Yesusé nécegé nóté, "Mtómi né kfatailo dolo lampu ta nfamanano wlomi wlólo né, se ni manano né n’gali mewé sogado sói néli ta fpe né ma fié ndimé, dolo manano ta po nimi wlomi wlólo né. 23 Mayta iga mtómi né ga paspósé, nase po wlomi wlólo né ma dérorémé ndimé, sogado sói néli ta fpe né ma lé ndimé. Se iga manano ta i po wlomi wlólo né ma re ndérorémé ndimé, nase dérorém ta npélóyé njé ma néyémé keé mewé.

24 Adeade kyat isó po nganesó wlólo né, bisa pa bo npe yabé po tuang séluwé. Sababta nase nmasié be ta isó njé, ta isó njé ga ni lé keé i. Fajé nóté nase npe yabé fié po ta isó nje ni, ta isó njé ga npe ni yabé né pa na. Ni ngale né, ndél pa bo re fdéréré Jou Lahatala ga wlomi né néli be po pipisé lo."

25 Yesusé nécegé nóté, "Ya kécego mewé, fatélolmo mew fafié, ma fanuta be sói néli ta bo fó re finémé le na, re ma fanuta be kabaya ta bo fpaké né sogado wlomi né kangelang na. Sababta ta penting po nimi hidupé wlólo né mnóm re finémé pa, re kabaya ta mewé bo fpaké né pa. 26 Coba ftarukira mané ta rénopé né! Si rfatóném pa, rfalingét gélesó pa, rfajólo re riséné róri mnóm pa. Mayta nimi Moke Jou Lahatala ta I po soroga njé néfay si. Ga bo mewé! Mewé mulomi né lébé pélóy po mané nesté ni, se Jou nase tadélé nfaménawé mewé. 27 Se iga fanuta be maduga nimi hidup ta étné be ngénngané mewé bo fó re finémé re kabaya ta bo fpaké né, masike cuci le ma bisa famlóngé nimi umuré né? Bisa pa to?

28 Se ma fanuta be nimi kabaya né na. Coba ftarukira bunga-bunga ta rtub po bété lo né, tadélé birahi. Bunga-bunga ta néi rpe yabé pa, bóngo runé réringé riri kabaya né re lawe pa. 29 Mayta flongé fafié ta Ya kécego mewé nte, tatubé lima kolano Salomo njé reni renó félé, mayta bo tfatailo i ni kabaya re bunga né, bunga né lebe fié. 30 Bunga ta po bété lo né, maduga ngénngan pésénte le, móné re mlayé se rtapéné keé. Jou Lahatala npalihara bunga né fafié, néga bo mewé. I nase npalihara mewé né lebe fié nóté! Néga fpe sói se fdélé I né maduga cuci le! 31 Se mewé, ma fémtat na sogado féceg faje, ‘Bo tó rór sói?’ Pari, ‘Bo tinémé rór sói?’ Re, ‘Kabaya sói ta ité bo tpaké?’ 32 Sababta, maduga kyaté-kyat ta rdélé Jou Lahatala pa né ta nase rfawater be tadolo fajé né. Mayta mewé, ma ftalko si na, sababta nimi Moke Jou Lahatala ta I po soroga lo njé re nuné sói ta mewé fperlu né. 33 Se ta fié né, féyówé be Jou Lahatala óro bo nkawasa dolo Kolano I po nimi hidupé wlólo, re fpe be ta métegél po I ni. Iga fpe fajé, sói le ta mewé fperlu né, nase ndo mewé ndimé. 34 Se ma fénuta be nimi hidup ta bo ndadi i po ngénngan móné sogado wlomi né kangelang na. Sababta po ngénngan móné mewé nase bo fduk kangelang ta nésé nóté. Kangelang ta fbósém po ngénngan pésénte né fié ro, ndél pa bo fanuta po ngénngan móné nóté."