Mateus 7

Ma fpe dolo hakimé mew na

1 Yesusé nécegé nóté, "Ndél pa bo ffasólo kyaté, bo Jou Lahatala ma nfasólo mew pa.*7:1 Nete ni ngale, ma técegé kyat na. Mayta bo pai ta nmétegél po Jou ga némnawé ni délé npe sélsól po Jou ni, mare ndéréré ta Jou nané po buk Matius 18:15-17 po nfamétegél ni dél ta ncólé njé. 2 Sababta iga wlomi ncuka ffasólo kyaté, mewé ma Jou Lahatala nase nfasólo mewé nóté. Se iga bo fasuté kyaté róri sélsólé, Jou Lahatala ma nase nasut menómi sélsólé né tadolo fajé nóté.

3 Mewé wlomi ncuka bo ftarukira be kyaté róri sélsól ta cuci le né, mayta menómi sélsól ta pélóyé né ga ffaténgné keé! Necé kfatailo dolo reni ayé ni wómo cuci ta i po kyat iglé mtó lo né bisa fémnaw i, mayta balak wóm ta nféketé keé mtómi njé ga fémnaw i pa. 4 Se necé tadolo ay wómo cuci ta i po nimi délé njé ni mtó lo né fécegé bo mewé ta fésólé i, momongo reni balak ponlóy ta i po mtómi lo njé ga ffaténgné keé i. 5 Ee, mewé nte fmalólé! Sababta ay ponlóy ta i po mtómi lo njé mare fésólé keé i su bo fémnawé né re fié, ga tagare fésólé ay wómo cuci ta i po nimi délé njé ni mtó wlólo né.