1 Yesusé nécegé nóté, "Ndél pa bo ffasólo kyaté, bo Jou Lahatala ma nfasólo mew pa.* 2 Sababta iga wlomi ncuka ffasólo kyaté, mewé ma Jou Lahatala nase nfasólo mewé nóté. Se iga bo fasuté kyaté róri sélsólé, Jou Lahatala ma nase nasut menómi sélsólé né tadolo fajé nóté.

3 Mewé wlomi ncuka bo ftarukira be kyaté róri sélsól ta cuci le né, mayta menómi sélsól ta pélóyé né ga ffaténgné keé! Necé kfatailo dolo reni ayé ni wómo cuci ta i po kyat iglé mtó lo né bisa fémnaw i, mayta balak wóm ta nféketé keé mtómi njé ga fémnaw i pa. 4 Se necé tadolo ay wómo cuci ta i po nimi délé njé ni mtó lo né fécegé bo mewé ta fésólé i, momongo reni balak ponlóy ta i po mtómi lo njé ga ffaténgné keé i. 5 Ee, mewé nte fmalólé! Sababta ay ponlóy ta i po mtómi lo njé mare fésólé keé i su bo fémnawé né re fié, ga tagare fésólé ay wómo cuci ta i po nimi délé njé ni mtó wlólo né.

6 Jou ni méiténé né tadélé fié re birahi, mayta bo kyaté riri lé i, ma féfétno si na. Necé kfatailo tadolo wódól ta fié né ma fdo yawé né róri na, re mutiara ta mulo pélóyé né, ndél pa bo fwóté keé néli po bowé lo né na. Bo sogado fpo si, nase réteglo keé, ga rarolto mewé bóngo réngangésé keé mewé."

7 Yesusé nécegé nóté, "Féror sói néli po Jou Lahatala ni ro, I nase ndo mewé. Féyówé sói néli po Jou ni, nase fduké. Ftoké ni ngówéné njé, nase népilé se n’gali mewé. 8 Sababta kyat pai le ta néroré nase ndo i, kyat pai le ta néyówé nase nduké, kyat pai le ta ntoké ni ngówéné, nase népilé se n’gali i.

9 Mewé re funé, iga ntumi faisó néroro mewé mnómé, nuén fisé bo fdo i lóyé? 10 Pari bo néror iné, nase fdo i guw pa. 11 Se masike wlomi né lé, mayta funé fpo ta fié po ntumi né ni. Néga bo nimi Moke Jou Lahatala ta I po soroga lo njé! I tadélé nuné fié npo ta fié po kyaté-kyat ta réroro I né.

12 Se, sói le ta fié se wlomi ncuka bo kyaté né rpe po mew ni, mewé ma mare fpe ta fié po kyaté nóté. Re iga fpe ta fié po kyaté, necé tadolo re fdéréré ta rlefo po Musa ni kitab abén limé né, re po nabi-nabi ta iglé né riri kitabé wlólo né."

13 Yesusé nécegé nóté, "Fsungé ro, fdélo ngówén ta némsóy pa njé! Sababta, iga fsungé ga fdélo ngówén ta némsóyé njé, nejé bo tfan po naraka lo, ni yéféné njé nkangelang pa, bóngo kyat félé ta rdé pocé. 14 Mayta iga fsungé ga fdélo ngówén ta némsóy pa njé, pocé nase fhidup re Jou Lahatala sogado fajé néli le. Sababta iga bo tdé pocé, ni yéféné njé tadélé nkangelangé, bóngo kyat ta bo rdé pocé né maduga cuci le."

15 Yesusé nécegé nóté, "Mewé mare fpe mew fafié, sababta nase reni kyat ta rwómé né récegé cogo Jou Lahatala ni nabi si se bo rfawómo I ni faftóté né, momongo bo rlólé mewé. Tangóto si né wlori fié, tadolo domba ta rmamufé né, momongo po wlori wlólo né lé ndimé, dolo yaw banga né se ma fdélé si na. 16 Iga fémnaw ta si rpe né, bóngo nase funé si. Necé tadolo gamuné ta gémgaméné, nuén fisé ga pyono angguré, pari pyono ara né? 17 Férimé ay ta békboké né, nase ni pyono né ma fié ndimé. Mayta iga ay ta békboké pa, ni pyono né ma nase lé ndimé. 18 Nuén fisé bo ay ta békboké ga tduké ni pyono ta lé né, pari ay ta békboké pa ga bo tduké ni pyono ta fié né? 19 Se iga ay faisó ga népyon lé, kyaté né nase rcélép i se rtapéné keé i. 20 Se ité bisa tuné, iga reni kyat faisó ga ta npe né fié ndimé, nejé fatuw-fatuwé nabi i."

21 Yesusé nécegé nóté, "Nase férimé kyat pa ta rkakmé Ya, ‘Jou, Jou’ ta bo rdadi Ya niké kyat si se Jou Lahatala bo nkawasa dolo Kolano po riri hidupé wlólo né, mayta maduga kyat ta rpe be sói néli ta nik Moke Jou Lahatala mgo wlo né le. 22 Nase po ngénngan ta dunia nje nkiamaté né, reni kyat félé ta bo récegé Ya faje, ‘Jou! Jou! Amé nte re kfawómo Jou Lahatala ni faftóté po kyaté-kyaté né kpake Awé ngósnomé. Amé ma re kfaungé keé setan ta rtolén si po kyaté-kyaté né, bóngo re kpe mujizat ta félé né, férimé kpake Awé ngósnomé nóté.’

23 Mayta po waktu ta néi óro, Ya nase bo kécegé si faje, ‘Ya kféyalé mew pa. Se fówés pocé óro, sababta mew ta néi fpe be ta lé ndimé.’ "

24 Yesusé nécegé nóté, "Kyat pai le ta nlongé Ya kécegé nte ga npe, kfatailo i né tadolo kyat isó ta npande se nfawoslé ni umé njé po fandasi lóy papo lo se nkuaté né. 25 Se masike moré re félé se kipésé njé néslo umé njé ma nase némop pa, sababta nosél po fandasi lóy papo lo. 26 Mayta kyat pai le ta nlongé Ya kécegé né ga npe pa, kfatailo i tadolo kyat ta nuné ni gélesó pa se nfawoslé ni umé njé po sésé papo lo. 27 Se po waktu félé, kipés re moré néslo umé njé tabóngo némop i, se tadélé ntasluké i ndimé."

28 Waktu ta Yesusé nméiténé rewóré né, kyat félé ta si pocé né rherané rlongé ni dodoto né, 29 sababta nfasodoto si né reni kawasa, nfalcól re riri guru-guru agama Yahudi ta runé fié Musa ni kitab abén limé nesté.