1 Rewóré ta néi, Yesusé I re ni motemote nesté ncapél si po yelé lo se rpólén si nmulé po talaga njé ni féspalé, po kota ta I ntolno i njé ni.*9:1 kota ta I ntolno i njé ni ngale né kota Kapernaum. Méflingén po Mat. 4:12-13; Mrk. 2:1. 2 Néga télél be reni kyat séfis néli rfawlewté kyat isó néli po Yesus ni. Kyaté njé nkafé, se nénbóy i po ni musala papo lo. Pocé Yesusé némnawé kyaté nesté rwóm po I ni né, I re nuné ta rdélé I né. Tabóngo nécegé kyat ta nkafé njé faje, "Téno, wlemé njé ma némya le na. Sababta nte óro, nam sélsólé né re kfayangésé keé."

3 Pocé fajé ma reni guru agama séfis néli ta runé fié Musa ni kitab abén limé nesté. Rlongé ta Yesusé néceg fajé né, tabóngo ranuta po wlori wlólo, "Ce, ga kyat ta njé npe ni diri dolo Jou Lahatala I né."

4 Mayta Yesusé re nuné keé wlori wlólo né, se nécegé si faje, "Fpe sói se fanuta be ta lé né? 5 Po waktu ta Ya kécegé kyat ta nkafé nje faje, ‘Anam sélsólé né Ya re kféyangésé keé,’ mewé fdélé pa, ta nó sélsólé né re kféyangésé keé né. Mayta iga Ya kécegé, ‘Mpangéné bo mfané ro’, pocé mewé bisa funé ta Ya renik kawasa, sababta fémnaw po ta re nfané lo né. 6 Se nte Ya bo kfafié keé i bo funé, ta po dunia wlólo nte, Kyaté Ntu ta Ya I yama soroga wlólo njé ma, renik kawasa ta bo kféyangésé keé kyaté-kyaté róri sélsólé né."

Tabóngo Yesusé nécegé kyat ta nkafé njé faje, "Faftén ta awé, mpangén óro. Malilé keé nim musala njé, bo méléy po nim umé lo!"

7 Tabóngo kyat ta nkafé njé npangéné, se néléy i po ni umé lo. 8 Pocé kyat ta félé né rémnaw fajé, tabóngo rémtaté se rtail re rcuba Jou Lahatala, sababta re nfaftulo ni kawasa ta pélóyé né po kyat ta po dunia nje ni wlólo nte né.

9 Rewóré ta néi, Yesusé nfatoléné keé géwgów ta néi, se nfané nóté. Néli faje, némnawé kyat ta rénfalutno pajaké né isó néntolén i po ni yabé góo lo né. Kyaté njé ngósno Matiusé. Pocé tabóngo Yesusé nécegé i faje, "Lima bo mdéréré Ya." Nlongé ta néi, tabóngo nosélé se ndéréré Yesusé.

10 Rewóré ta néi, Yesusé I re ni motemote nesté rfané se rémnóm po Matiusé ni umé lo. Pocé ma, reni kyat ta rénfalutno pajaké né rfélé nóté, re kyat iglé ta récegé cogo reróri sélsól félé né. Si ma rtoléné se rémnómé rdé Yesusé I re ni motemote nesté. 11 Pocé ma reni kyat Yahudi ta rdéréré dodoto Farisi né. Po waktu ta rémnaw Yesusé némnómé ndé kyaté nesté né, tabóngo récegé ni motemote nesté faje, "Cekede, pe sói se nimi guru njé ga némnómé ndé keé re kyat ta rénfalutno pajak re kyat iglé nóté ta reróri sélsólé félé nesté?"

12 Pocé Yesusé nlongé ta réceg fajé né, tabóngo nécegé si faje, "Iga kyat ta rpisé pa né, nase réyówé sousou pa, mare ta rpisé né ta réyówé sousou. 13 Tatubé lima né, Jou Lahatala néceg po ni Buké wlólo né, ni glio faje, ‘Ta Ya wlegé né, mewé mare ffaftulo nimi mésié né po férimé kyaté, sababta reni ngalé gélesó pa féwetés haiwané fpeé nimi sadéka mayta fmésié kyat pa.’ Se ta fié, ffané féyówé ta fatuw-fatuwé ro ta Jou Lahatala nécegé né ni ngale sói. Sababta Ya kwómé né, bo kakém kyat ta rpe riri diri cogo re rmétegélé né pa, mayta Ya kwómé né bo kakémé kyat ta runé reróri sélsól félé né."

14 Rewóré ta néi, Yohanes ta nénbaptisé kyaté njé ni motemote nesté rwómo Yesusé, bóngo rutné I, "Am re kyaté-kyat ta rdéréré dodoto Farisi né kanpuasa, mayta pe sói se Anim motemote nesté rpuasa pa?"

15 Bóngo Yesusé ncónglo si né npe adeade né ni glio faje, "Ya nte tadolo manóyé njé. Se iga manóyé njé ga néntolén I lesu, kyaté né rpe riri rameangé se mlif re lagé bóto si, pocé ni délé né bisa rpuasa pafule. Mayta nase reni waktu nóté ta bo ryó keé I po ni délé né riri fapéluné, necé ga tagaré si rpuasa.

16 Fajé nóté reni kyat isó pa ta bo néring kabaya léo ta re némgawésé njé re ngalép ta nóbéné njé. Sababta iga ntótéf kabaya léo ta re némgawésé njé, ngalep ta nóbén ta téringo i néli njé nase nkolét i se kabaya léo njé némgawésé né nbóng ta lebe pélóyé nóté.

17 Fajé nóté re haiwan liko ta rpeé anggur góo né. Iga re néboné, reni kyat isó pa ta bo nwóso keé anggur ta nóbéné né pocé, sababta re néboné se ni liko né re nmatué. Se iga rwóso keé re anggur ta nóbéné né pocé, nase nawété se nfataporésé keé i se ni angguré né tapówésé ndimé. Se mare tpake anggur góo ta nóbéné, ga twóso anggur ta nóbéné né, bo abén luwé né fié ndimé*9:17 Yesusé npe adeade ta né, bo si runé ni dodoto né ndel pa rfambóngo re riri hukum agama ta kyaté rérénpe né.."

18 Waktu ta Yesusé nméiténé lesu re Yohanes ta nénbaptisé kyaté njé ni motemote nesté, néga télél be reni légaé isó nwómé, ngósno Yairusé. Légaé ta njéi, ndadi kyat tut pocé po agama Yahudi né riri um sambayangé lo né. Néli bóngo ncuba Yesusé se néceg faje, "Alli, Guru ta Awé, ntig mépiné njé tagare nmóté. Se kéror po Aw ni mpe néli po nik umé lo su? Bo métewlé faomé né néya po i ni, bo npangéné nmulé."

19 Yesusé nlongé ta néi, tabóngo nosélé se I re ni motemote nesté rdéréré Yairusé néli po ni umé lo.

20 Pocé rénfané se po yéféné lo lesu, télél be reni mépin isó njé re taun nuén yófésó re nuénluwé né tadélé nkangelangé sababta nuén taptipéné ni léló nfané, se nférakni i néli po Yesus too lo se nétit Yesusé ni juba wómo né. 21 I npe fajé né, sababta nénuta, "Masike kétit be ni juba njé facuci le, ya nase kfié."

22 Po waktu ta néi, Yesusé négiwé I némin tó lo se némnaw mépiné njé, bóngo nécegé i faje, "Neke ta awé, mfakwaté wlemé njé! Sababta awé mdélé Ya se re mfié." Po waktu ta néi óro, mépiné njé nfié i.

23 Rewóré ta néi, Yesusé nfané nfalów sogado nwóm po légaé Yairusé ni umé lo. Pocé ncung néminé ga némnawé reni kyaté-kyat ta rénufé riri sulingé, reni ta rtangésé se tadélé gégliné. 24 Mayta Yesusé nécegé kyat ta pocé né, "Fsópéné ndimé, sababta yomya mépiné njé nmót pa, maduga nyénéfé le." Rlongé ta Yesusé néceg fajé né, si ga rémlifo keé I, sababta runé yomya njé re nmóté.

25 Se ta kyaté-kyaté né rcópéné ndimé, tabóngo Yesusé ncung némin po yomya njé ni kamaré lo. Pocé nétané yomya njé ni fao né, tabóngo npangén i nmulé. 26 Se rémnaw férimé ta re ndadi i né, tabóngo réfétén keé néli re lima po férimé bótén ta pocé né.

27 Rewóré ta néi, Yesusé nfané nóté. Pocé télél be reni kyat séluwé nesté rébyafé, rfajalé I bóngo rgélayé, "Moke, Kolano Daudé ni ntu re gbu ta Awé*9:27 Ta mulo rkakém i "Kolano Daudé ntu re gbu ta Awé" né sababta tatubé Jou Lahatala néjaji bo ntebo kyat isó ta bo nfasalamaté kyaté né, néjaji ta I nase lima kolano Daud ni. Se kyat ta rébyafé nesté rfayal ta nfafié si njé, I ro, Jou Lahatala ni jaji njé., mmasié am facuci pa!"

28 Po waktu ta Yesusé ncung némin po um isó ni, télél be kyat séluw ta rébyafé nesté rwómo I nóté. Pocé bóngo Yesusé nutné si, "Mewé fdélé ta Ya bisa kfafié mewé?"

Bóngo si rcónglo, "Iya Moke, amé kdélé."

29 Tabóngo Yesusé nétané mtóri né ga néceg faje, "Mewé re fdélé Ya, se nte re ndadi i ro ta féyówé né." 30 Po waktu ta néi óro, si dórén luwé né re bisa rémnawé. Tabóngo Yesusé nécegé si faje, "Ndél pa bo fafétén po kyat pai le, fanfawa sogado mewé re bisa fémnawé né." 31 Mayta po waktu ta rcópén tóma umé njé ni né, tabóngo raféténé keé néli re lima po férimé kyat ta si po bótén ta pocé né.

32 Waktu kyat ta rébyafé se re rémnawé nesté rcópéné né, télél be reni kyat isó nóté setané ntolno i sogado nmémewé se rut i po Yesus ni. 33 Bóngo Yesusé nfaungé setan ta ntolén po kyat ta nmamewé njé ni, se po waktu ta néi óro, kyaté njé re bisa nméiténé nmulé. Pocé bóngo kyaté-kyat ta rfajól pocé né, tadélé rherané se rfalécego faje, "Beé, ta mnuo re lóo po bótén Israelé nte témnaw pafule ta dolo kyaté njé npe né!"

34 Mayta pocé reni kyat Yahudi ta rdéréré dodoto Farisi nesté, réceg faje, "Ta I nfaungé setané né, npake setané né riri kolano njé ni kawasa."

35 Rewóré ta néi, Yesusé nfan po kota-kota re po pnuwé-pnuwé, se nfasodoto kyat po agama Yahudi né riri um sambayangé lo. I nfawómo kyaté né Habar ta Fié yama Jou Lahatala ni ta ni ngale nópé né, Jou Lahatala bo nkawasa dolo Kolano I po ni kyaté-kyat ta rdélé I né. Re po géwgów pua le ta I nfano lo né, se nfafié keé kyat ta reriri paspisé sói le sogado rfié si ndimé. 36 Yesusé némnawé kyat ta félé né, nmasié si se néceg po wlo wlólo, "Sen ci, kyaté nte riri kangelang félé se rfakduko si pa. Pai ta bo n’gali si? Kfatailo si né tadolo domba ta reriri wlón pa se nai ta rfan si né." 37 Pocé bóngo nécegé ni motemote nesté faje, "Kyat ta wlori ncuka bo rlongé Habar ta Fié lima Jou Lahatala ni né, tadélé rfélé. Kyat ta néi kfatailo si né tadolo bét isó ta reni téntónémé gandumé né tadélé félé. Sogado re ncimo i, mayta kyat ta bo rfalingété né maduga cuci le. 38 Se féror néya po Jou Lahatala ta I nó bété njé ni, bo nbóngé ni kyat ta bo rfalingété né nóté."