Ñɨ ak nap nop kelɨg amnak agɨl takaw paladaŋ lɨl agak
11 Jisas anɨb agɨl agak, Bɨ olap ñɨ omɨŋal tɨkɨnɨgab agak. 12 Ñɨne kɨdek ak, apɨl nap nop agɨnɨgab, Bapi. Tap chɨlopmɨŋal apan okok pak asɨk, yɨp okok ke ñan agɨnɨgab agak. Agek, nap tap kɨlopmɨŋal okok pak asɨk keke ñɨnɨgab agak. 13 15.13 Snd 29.3Ñek, ñɨne kɨdek ak pel mɨdɨl mel, nap tap pak asɨk ñɨnɨgab okok yokɨnɨgab ak dɨl, dad man palawl okok amnɨgab agak. Am anɨb okok mɨdɨl, binɨb tap si tap tɨmel okok gɨlɨg, mani dad amnɨgab okok mɨdupsek gɨ ñɨbdɨnɨgab agak. 14 Anɨgɨl gɨ ñɨbdek, yuwan awl yɨbɨl ak man anɨb ak ownɨgab agak. Apek, mani dɨl tap taw ñɨŋɨnɨmuŋ tek olap ma yɨbɨl nep yenɨgab agak. 15 Anɨgek, ne amɨl bɨ man nap nɨb anɨb ak nɨb olap agnɨgek, nop chag wog ak aglɨnɨgab agak. 16 15.16 Snd 23.21Pen nop yuwan awl yɨbɨl gek, chag ñɨŋɨnɨgabal tap dayday okok ogɨnap ñɨŋɨnɨmuŋ tek lɨnɨgab agak. Pen binɨb ogɨnap nop tap mɨdup ma nep ñɨnɨgabal agak.
17 Pen kɨdek gos ne ak asɨk lek agɨnɨgab, Bapi bɨ wog gɨñeb okok tap mɨdup kuŋay mɨdeb agɨnɨgab agak. Yad awl mɨden, yuwan awl yɨbɨl yɨp gup agɨnɨgab agak. 18 15.18 Sng 51.4, Jer 3.12-13Anɨb ak yad man awl kelɨgɨl, bapi mɨdeb tep ak adɨkɨd amɨl, bapi nop agɨnɨgayn, God wɨdɨn mɨdup nop adek ak gɨ tɨmel gɨl, wɨdɨn mɨdup nep adek ak gɨ tɨmel gɨl gɨpin agɨnɨgayn agɨnɨgab agak. 19 Gɨ tɨmel gɨpin tek, yɨp ñɨ yad ma agɨnɨmɨn agɨnɨgayn agɨnɨgab agak. Yokɨp bɨ wog gɨñeb nad tek olap agle mɨdenɨm agɨnɨgayn agɨnɨgab agak. 20 15.20 Apo 2.39, Epe 2.13, 2.17Anɨb agɨl saŋɨdɨnɨgab agak.
Am am nap yenɨgab sɨŋak wulep wulep gaknɨŋ, nap ñɨne nop palchɨm nɨgɨnɨgab. Nɨgek, chɨb tɨmel yɨbɨl gek, kasek am nop dɨ kaykol gaknɨŋ 21 15.21 Sng 51.4ñɨne agɨnɨgab, Bapi. God wɨdɨn mɨdup nop adek ak gɨ tɨmel gɨl, wɨdɨn mɨdup nep adek ak gɨ tɨmel gɨl gɨpin tek, yɨp ñɨ yad ma agɨnɨmɨn agɨnɨgab agak. 22-24 15.22-24 Luk 15.32, Epe 2.1, 2.5, 5.14, Lep 3.1Nap pen bɨ wog gɨñeb ne okok kɨlop agɨnɨgab, Ñɨ yad ak pɨsnep kul gɨl kumak tek lak ak pen, mɨñɨl koŋɨm mɨdeb nɨgebin agɨnɨgab agak. Nɨbi chech palawl yɨp ak am dad apɨl nop lɨñɨl, ñɨn mɨdup nop ak liŋ lɨñɨl, tob tɨlup ak lɨñɨl gɨnɨmɨb agɨnɨgab agak. Anɨgɨl am chag bulmakaw ñɨluk tep yɨbɨl olap pak dad apem, dagɨl ñɨbɨlɨg mɨñmɨñ gɨnɨgun agɨnɨgab agak. Agek, agɨnɨgab tek gɨl, tap mɨdup dagɨl ñɨbɨlɨg mɨñmɨñ gɨnɨgabal agak.