Luk 2

Bɨ Simiyon ayɨp bin Ana ayɨp Jisas nop nɨgɨlek

22,23 ✝ 2.22-23 Kis 13.2, 13.12-15, Wkp 12.1-8, Nam 3.13, 8.17 Pen bɨlel God takaw kɨles anɨb ak Mosis nɨŋɨd ñu kɨl tɨkak. Tɨkɨl agak, Ñɨ ned tɨkɨnɨgabal okok, God nop ñɨnɨgabal agak. Ak nɨm Maliya ñapay ak tɨkɨl, Juda binɨb gelɨgɨpal tek asɨkɨl, kal ke okok nep yek mɨdtep gɨl, Josep ayɨp God ñapay nop ak ñɨnɨg dad Jelusalem amnɨlek. 24 Pen God takaw kɨles olap agek Mosis ñu kɨl tɨkak. Tɨkɨl agak, Bin ñapay tɨkɨnɨgabal okok mɨdtep gek, yawl malɨg akaŋ, peleb omɨŋal God agnɨgep kal awl ak dad amnɨgabal agak. Damɨl kɨlop ñel, God nop sɨbog ñɨnɨgabal agak. Gos anɨb ak abe nɨŋɨd, yawl omɨŋal sek dad amnɨlek.

25,26 ✝ 2.25-26 Sng 89.48, Ais 40.1, 49.13, Mak 15.43, Luk 2.38, Hib 11.5 Anɨb ñɨn ak bɨ suŋtep yɨbɨl gɨl, God nop nɨŋɨd kɨdek golɨgup olap yek. Yɨb ne ak Simiyon, ne Jelusalem yolɨgup. Bɨ olap Yislel binɨb kɨlop gɨtep gɨnɨgab ak nop kod yolɨgup. God Kawnan ak ayɨp mɨdolɨgup ak nɨm, nop ned agak, Bɨ God nop aglup ak, binɨb okok kɨlop dɨl kod yenɨgab ak apek nɨŋɨd, kɨdek kumnɨgaban agak. Agek nɨŋɨd, nɨg yolɨgup. 27 Pen ñɨn anɨb ak God Kawnan ak Simiyon nop gos ñek, God agnɨgep kal awl kab wali kus gɨl yek ak amɨl nɨgak, nonɨm nap Jisas nop dad apɨl, Mosis agak tek gɨnɨg owlek. 28 Kɨlop nɨŋɨd, Jisas nop dɨ kay gɨl, God yɨb nop ak dad aplanɨlɨg agak,

29 ✝ 2.29 Stt 46.30, Plp 1.23 Bɨawl, yad wog nep gɨñelɨgɨpin agak. Mɨñɨl yɨp tep gup, mɨdtep gɨpin agak. Anɨb ak yɨp agɨnak tek, mɨñɨl yɨp kelɨge yad kumnɨgayn agak.

30 ✝ 2.30 Ais 52.10, Luk 3.6, Tat 2.11 Ñɨ anɨb ak bɨ kasɨn gep chɨn yenɨgab ak, tep agyoke mɨseŋ apek wɨdɨn yad ke nɨgebin agak.

31,32 ✝ 2.31-32 Ais 9.2, 42.6, 49.6, 52.10, 60.1-3, Mat 4.16, Apo 13.47, 28.28 Ñɨ anɨb awl binɨb nad Yislel binɨb kɨlop nep daŋ agɨl ma agyokɨpan, binɨb yokɨp okok kɨlop abe daŋ agɨl agyokɨpan agak.

Ne mɨlek nad ak kɨli nɨgel tep gek, chɨnop Yislel binɨb yɨb ak dad aplanɨgabal agak.

33 Takaw anɨb ak agaknɨŋ, nonɨm nap gos pal yɨbɨl lɨlek. 34 ✝2.34 Ais 8.14, Hos 14.9, Mat 21.42, Apo 28.22, Lom 9.32-33, 1 Ko 1.23, 1 Pi 2.7-8Pen ne God nad ge mɨdtep gɨlaŋ agɨl, ñɨ nonɨm Maliya nop agak, Ñɨ nad anɨb ak mɨdaknɨŋ, Yislel binɨb kuŋay nep nab ak pal jakɨl, ogɨnap apyap pakɨnɨgabal, ogɨnap adek alaŋ amnɨgabal agak. God ne Bɨ God nop aglup ak nɨgɨlaŋ agɨl nop agyokak ak pen, nop ma dɨl takaw tɨmel agɨnɨgabal agak. 35 ✝2.35 Sng 42.10, Jon 19.25Anɨgɨl, binɨb kuŋay gos tɨmel nab ayaŋ mɨdeb ak, bɨawl ne ownɨgab ñɨn ak, gos kɨli mɨseŋ lɨl yenɨgab agak. Pen mapen nep ak kumnɨgab, baynat tek tɨbɨnɨgab agak.

36,37 ✝ 2.36-37 Apo 26.7, 1 Ti 5.5 Pen ñɨn anɨb ak bin God gos ñek agñeb olap abe ap yek. Yɨb ne ak Ana. Nap yɨb ak Panuwel. Binɨb Asel agelɨgɨpal jɨj ak tɨk dad apɨl nɨm, Ana nop tɨkɨlak. Pen Ana bin mɨlep yɨbɨl yolɨgup, sub ne ak 84 yɨnak. Ned bɨ dɨl, nɨgɨmɨl ayɨp mɨdel sub anep kugul ak pen, nɨgɨmɨl kumak. God nop gos anep lek, ñɨn kuŋay nep tap ñɨbɨl mel, God agnɨgep kal awl kab wali kus gɨl yek ak mɨgan ayaŋ am mɨdɨl, subnab abe maynab abe God ayɨp agɨlɨg yolɨgup. 38 ✝2.38 Ais 52.9, Mak 15.43, Luk 2.25, 24.21Pen ne Jisas nop dɨ mɨdelak wulep sɨŋak owak. Apɨl, God nop tep agɨl, binɨb kɨli God chɨnop Jelusalem binɨb gɨñub anɨgɨl dɨnɨgab agɨl nɨgɨlak okok kɨlop agɨlɨg agak, Ñɨ anɨb ak chɨnop dɨnɨgab agak.