Qayeeng yeip yaing 19

Tambiy wei mi la lek vuteiv laxuv o

11 A xei tyoung gheyapu eno tax me a xei vuteiv laxuv ti toungale wou a manghalus me tambiy wei mindei lek vuteiv on eno lei "Tambiy wei mi betiwou e xe qayeeng" me "Zonghek". Moxo mi zeim qayeeng ela teyei lek me wo vevek la bombek. 12 Moxo manghalus nei nambei nenyex tumeing dom lek e lu eno qelumking ngenong toundei lek. E lei ti eno xel byex lek e wei xelti se woulek qe e venaxow woulek lei ne. 13 E vunek en teimb ding tiwei pelei eivek gyand me e lei eno nambei nye, Xoulek wei Anutu yo. 14 Xel vevek wei tyoung gheyapu yo di betiwou e, me di la lek xel vuteiv laxuv me vunek en qaeing teleing nimza me vako. 15 Ngeyeing vevek manewou ti lam lox e mya wei embei semaleeng xomaxoneing wei tembuing sapa sapa ne nangya yo. Tyek e gyeiteyei xel bo nikanzek is aen patongeeng. Me moxo qei wain neing eivek beyeeng wei qeing wain wei Anutu Nikanzekta xe myavanei ngandoung o. 16 Lek e xe teimb ding me lek e vaxa sepomb eno xel byex lei tine:

"King wei xel king o me Tambiy Ngandoung wei xel tambiy ngandoung o."

17 Me a xei angela ti toungale eivek sayeiv me taxe niseikeing la wou menek menek wei di zeivek eivek senghoing bandaing o bei, "Xam lam qekuma en mata ngandoung wei Anutu xe yo. 18 En kandek xam ghe gwa xel king leyeis me leyeis wei xel beyeiv wei xel vevek o. Neing wei xel moux wei nikanzek o me leyeis wei xel vuteiv o me xel wei mindei lek vuteiv o, me leyeis wei xel xomaxoneing dalusateiv o me xel wei tul e la yo me xel xukxe bandaing o, me xel wei lei maeing o me xel wei lei laeing o."

19 Woyom a xei leliy bemeeng me xel king wei tembuing o me xel xe vevekyeiw qekuma lekti, bei bo vevek wou tambiy tiwei toundei lek vuteiv me e xe xel vevek. 20 Ekom zeimaxoun leliy bemeeng is poropet tyonyeing wei mi qou e manghalus me mi wo dee wei lulvako yo. Me lek dee tine eno e mi tyoxe xel wei qou telumek wei leliy bemeeng o me wo lalo wou e tenu. Xel nex luw xouing la mapieing eivek leiveeng manghembi wei nenyex mi tum lek qakous wei wo gyand o. 21 Xel bamba eno leis xel nangya ngeyeing vevek wei lam lox moux wei toundei lek vuteiv on mya me menek dalusateiv ya xel leyeis me enden xel.