Marcos 11

Yesu la eivek Yerusalem nambei King

1 Ka xel la paviy Yerusalem me la tyip Betpage me Betani lek lukendu Oliv nei, Yesu wong e xe xel betiyeing yayuw la, 2 de neil wou luw, "La wou beyeeng wei di yeip atax wou muw mamim on, de lutika gyeik muw ambeing na eivek, on tyek muw ghe gwei dongi lingheing ti xel tup anghei inyon, dongi lingheing tiyon xelti se ghei dei lek. Muw wa tul yis veil dom na qou me nam inye. 3 Wangwei xelti teling muw, ‘Muw ghe di wong ambei nyon enva?’ Yond muw a neil wou e, ‘Tambiy Ngandoung embei bong xuk en dom tyek bong enoum daing.’ "

4 Luw la me yei dongi lingheing ti toungale myayaing eivek sakwaing mema nayak, me xel tup lek xomek mya om luw tul. 5 De xomaxoneing valu toungale inyon eno teling, "Inyon muw ghe di wong vati, me ghe di tul dongi lingheing on?" 6 Luw neil elox ambei kawei Yesu neil wou luw o, me xel xomaxoneing on wong luw qou me la. 7 Woyom luw qou dongi me la wou Yesu me nex xel xe teimb lek demi, de moxo dei lek. 8 Xomaxoneing ngenong vax xel xe teimb wei samyekeing o lek sakwaing de xel valu vax xax mema is lis wei xel qateiv eivek xuk yaeing o. 9 Xel wei la mamunghexeing me xel wei di betiy eno taxe bei,

"Hosana!

Xeilala wei xa yo ena wou tiwei lam eivek Tambiy Ngandoung lei yo!

10 Xeilala wei xa yo ena lek tete lalei wei xa bumi Dawit wei di lam o!

Hosana ena gheyapu nei!"

11 Yesu la eivek Yerusalem me la eivek tete lalei wei xomek vambuing o. Moxo yei e vivekwou lulul sapa, ekom inye embei bouk eivek om la myayaing me lox me la Betani is xel betiyeing xoumeeng yuw.