Mateus 4

Sandang wo axeing wou Yesu

1 Woyom Laweeng Vambuing qou Yesu me la tembuing bandaing nei bei tambiy mapetok bo axeing wou e. 2 Yesu vambu yaeing teyei lek bendiyeing mepyeiyuw me boukeing mepyeiyuw is om maxepya e. 3 Tambiy mapetok wei mi wo axeing eno lam wou e me neil, "Wangwei wa Anutu Neu Moux, ond neil me qakous ti beimambei ne pekwi nambei belet."

4 Yesu neil elox, "Xel byex eivek xoulek eno nambei nye: ‘Xomaxoneing se mindei mapieing en belet venaxow, qe xel mi dei mapieing en qayeeng tambak wei mi lam eivek Anutu mya yo.’ "

5 Woyom tambiy mapetok qou e me la beyeeng vambuing Yerusalem me wong e nale lek xomek vambuing on pundanghou. 6 Moxo neil, "Wangwei wang on Anutu Neu Moux ond vyeip me la tembuing. En xel byex eivek xoulek eno nambei nye,

"‘Moxo tyek bong qayeeng nikanzek wou e xe angela en xel gyeiteyei wang,

me tyek xel a zeim wang zekna eivek memend,

en kandek qakous ti se byex wa vaxam.’ "

7 Yesu neil elox wou e, "Inyon xel byex eivek xoulek is bei: ‘Wa se toung wa xe Tambiy Ngandoung Anutu eivek axeing.’"

8 Kalekom tambiy mapetok qou e me la lek lukendu vaxading. De talex tete lalei wei tembuing sapa me lulul nimzamza dalus eno wou e. 9 E neil, "Wangwei wang dev vaxam qatu eivek me ghe bong lalo wou a nei on tyek am bong lul dalus tine wou wang."

10 Ekom Yesu neil wou e, "Sandang, la dingta veil ay! En xel byex eivek xoulek eno nambei nye, ‘Wang bong lalo wou Tambiy Ngandoung wa xe Anutu me ghe bong xuk wou e venaxow.’ "

11 Woyom tambiy mapetok la veil e, dom angela lam me vind e.