Hebreus 12

Ma Jo’oungu ma Dutu to ngone nanga Dea

1 Sababu ngone ne’ena naga 'o sakisii posironga manga gudai 'inasigilolitino 'inalega-lega, ge’enau so nou ngone pamada 'iodumu gee 'inasitu-tubuso, de 'o sowono gee naga koinamadawa. De nou ngone de nanga singina 'ikua-kuata pomariwo pomakarebese 'isoka gee 'inasitatapuokau. 2 Ma 'orasi ngone pomariwo nanga ngo-ngakuoka, ngone salingou tatapu potaari 'o Yesusika, sababu 'unau wosibaoro nanga ngo-ngaku de wapaliara ma ngale wositotomo ka ma guruenosi sigado ma do-dogumu. 'O Yesus wotahani wosangisara. 'Una wosongene 'o salipoka ma kowokalesanguwa 'ato ge’ena 'o mahe. 'Una duga wongano-nganono dua ma du’uruoka de kawomore-morene. De ma 'orasi ne’ena 'una wopareta de ma Jo’oungu ma Dutu 'o ngii 'isure-sureka.

3 Bika niongano-nganono kokia 'o Yesus wotahani wakidaari 'o nyawa yosowo-sowono gee posironga yomalawanioka 'unaka! Sababu ge’ena 'uwa nia singina 'itingoono de 'i’ogu.