16 Nako naga 'o warisi ma surati, ge’ena salingou de ma 'ena mita ma nyo-nyata 'ato 'o nyawa gee yodi-diai 'o warisi ma surati ge’ena yosongenokau. 17 Sababu 'o warisi ma surati koipakewasi nako gee yodi-diai koyosongenuawasi. 'O surati ge’ena 'ipake duga ka gee 'o nyawa gu’una wosongenokau. 18 Sababu ge’ena 'o jaji ma di-disiraka mita salingou 'isitatapu de 'o haewani yatoa-toaka ma 'aunu. 19 Sababu gee 'o Musa wositotaroka 'o Israel ma nyawa yoodumika 'iso de ma Jo’oungu ma Dutuou 'awi besesongo, de 'o Musa wa’ese 'o sapi ma ngowaka ma 'aunu de 'o kabingi ma nauru ma 'aunu, de wosikaganu de 'o 'akere, ge’enaka de wosibilaroto ma Jo’oungu ma Dutu wi besesongo ma bukuoka de 'o Israel ma nyawaka yoodumu, wopake 'o hisop*9:19: 'O hisop ge’ena la 'o gota koila-laagomiewa ma gurutie poilia ka 'o meteri moide. 'O hisop 'ijaga yapake ma ngale 'o haewani ma 'aunuku yawaruoka de yakisibilaroto 'o nyawaka bolo 'okia sonaa 'ita-tantuuka ma ngale yositebini. de 'o domba ma gogo gee 'isiluja-luja. 20 'O Musa gee wadiai ge’ena de kawongosekau, <<Ne’ena 'o 'aunu gee 'isitatapu 'o jaji ma Jo’oungu ma Dutuno gee salingou niamoteke.>>*9:20: Palega Sisu. 24:6-8.