16 De ngoi 'asa toga’asoko 'ai Deaka, la winikula 'o Ro-riwo moioli, gee dua 'imanoa nginioka kaisi’ado-'adonika. 17 'Ena ge’ena 'o Ngomasa 'Itebi-tebini gee dua nisidumutu 'iti-tiai ma ngale ma Jo’oungu Dutu. 'O nyawa 'o duniaka gee koyongaku-ngakuwa, 'ona koyadawonguwa 'o Ngomasa 'Itebi-tebini sababu 'ona koyamakewa bolo koyanakowa. Ma ngini nianako, sababu ge’ena 'ena naga de de ngini, de dua 'ena 'imanoa 'ania singinaka.

18 Ngoi 'asa kotinisidamadakawa ka nginioka 'isoka 'o go’osisi. Ngoi 'asa tolioli nginino. 19 Ka 'o 'orasi moiou de 'o nyawa 'o duniaka dua koimakewau. Ma ngini 'asa nimakeli ngoi. De sababu ngoi to’ahu, so ngini mita 'asa nio’ahu kaisi’ado-'adonika. 20 Nako ma wange ya’adono to’ahuoli, ngini 'asa nianako 'ato ngoi ka moi de 'ai Dea, de ngoi de de ngini pomarimoi.

21 'O nyawa gee yadawongo de yoduaka yadiai 'okia naga gee tosulo-suloko, 'ona ge’ena 'isibosono ngoi. 'Ai Dea 'asa wakisibosono 'o nyawa gee 'isiboso-bosono ngoi, ngoi mita 'asa takisibosono 'o nyawa go’ona, de tomasidumutu 'onaka.>>

22 'O Yudas gee ko 'o Yudas Iskariotuwa wosano 'o Yesusika wongose 'ato, <<Jou, 'ido’oa so konomasidumutuwa 'o nyawa 'ireguka 'o duniaka ne’ena so ka ngomino?>>

23 'O Yesus wosango, << 'O nyawa gee ma gou-goungu 'isibosono ngoi, 'asa yamoteke 'ai do-dotoko. 'Ai Dea 'asa wakisibosono 'ona, de 'una de de ngoi 'asa mioboa 'onaka de miomanoa de de 'ona. 24 'O nyawa gee koisibosonuwa ngoi, 'ona koyamotekuwa 'ai do-dotoko. 'O do-dotoko gee ngini nio’ise-'isene, ge’ena ko ngoinowa, ma 'ena 'ai Deano gee woisulo-suloko.

25 'Iodumu ge’ena tosidemo nginika, ma 'orasi ngoi ka de de nginiosi. 26 Ma 'o Ngomasa 'Itebi-tebini, 'o Ro-riwo gee dua 'ai Dea wosidingoto ma ngale 'ai dagali, 'ena 'asa nisidotoko 'o sagala moi-moi, de nisinganono 'okia naga tosidemokau nginika.