João 9

'O nyawa worau-rau womasimake sababu 'o Yesus wiriwo

1 Ma moi ge’ena gee 'o Yesus wotagi-tagi, de wimake 'o nyawa worau-rau kawosidoboanosi. 2 'O Yesus 'awi do-domoteke yosano 'o Yesusika, << 'Aba Guru, 'ido’oa so 'o nyawa nu’una worau kawosidoboanosi? Poilia 'una ma sirete wosowono bolo 'awi 'esa de wi dea?>>

3 'O Yesus wosango, << 'Una worau ge’ena ko to 'unawa 'awi sowono de ko wi balusuwa manga sowono, ma 'ena la 'isidumutu ma Jo’oungu ma Dutu 'awi kuasa 'imanarama 'unaka. 4 Ka 'o wangesi ge’ena salingou padiai gee woisulo-suloko 'awi manarama. Sababu nako 'iobirokau ge’ena komoiwau 'idadi yomanarama. 5 Kokia naga ma do’ingo ngoi 'o duniaka, ngoiou tokula-kula 'o darangi 'o nyawaka 'o duniaka.>>

6 'O Yesus koge’ena wongoseka de wakibituku 'o tonaoka, de wosikaruahe 'awi kibiti ge’ena de 'o tonaka deika wosiesaka worau-rau gu’una 'awi akoka, 7 de kawongosekau 'unaka, <<Tagi 'ani biono na’isoko 'o Siloam ma 'akere 'ilupa-lupanginoka.>> 'O Siloam ngone tanu <<Wisulo-suloko>>. So 'o nyawa gu’una wotagi 'awi biono wa’isokoka de wolio 'ena womasimakekau.