Lucas 16

'O nyawa wokaya-kaya de 'o Lazarus wosa-saigalere

19 <<Naga wimoi wokaya-kaya, 'awi pakeangi 'iodumu ka gee 'ihali-hali, de 'o wange 'isinoi-noimi kowomarame sababu 'awi 'ahu ma sigoronaka kokiawa moi 'ikurangi. 20 'Awi woa ma ngorana ma bionoka winoaku wimoi wosa-saigalere wi ronga 'o Lazarus. 'Awi roesie ge’ena ka 'o dabo 'ijaja-jaja 'imasi’omangie. 21 'Una wodamaa 'o 'inomo ma dotaka womau wa’odomo wokaya-kaya 'awi meja ma timioka. De 'o kaso 'iboa yaaemoli 'awi dabo ge’ena.

22 Ma do-dogumuku 'o Lazarus wosongene, de 'o mala’ekati wi’asa 'o ngii 'isure-sureka 'o Abraham 'awi dateoka 'o sorogaaka. Wokaya-kaya gu’una wosongene mita de wipo’osuku. 23 Yosonge-songene manga ngiioka, 'una wosangisara ma sala. De ge’enaka naga 'una womalega dakuie, wimakede 'o Abraham daku 'o ngii ma gurutieka de 'awi dateoka 'o Lazarus. 24 Ge’enaka de wokaya-kaya gu’una womasigasoko 'o Abrahamuka wongose 'ato, <Ee 'Aba, noidoranosi. Nosuloko 'o Lazarus 'awi raraga wawaruoka 'o 'akeruku de wauku 'ai nga-ngaeme wosipesakosi. Ngoi tosangisara ma sala 'o 'ukuoka ne’ena!>

25 Ma 'o Abraham wosango, < 'Ai ngowaka, nongano-nganono: Ngona sigado nosongenoka nomadamakekau 'iodumu gee yaowa-owa, ma 'o Lazarus 'una womadamake ka gee 'ito-torou. Ne’ena 'una wosanangi ne’enaka dau, ngona nosangisara. 26 De ngona de ngomi nanga sigoronano de ma 'enau 'o luwutasa ma amoko moi, la 'o nyawa nongoka de yaika ma koidadiwau, de ge’enaka de yaino ningino ma koidadiwau!>

27 Ge’enaka de wokaya-kaya gu’una kawongosekauoli, <Nako koge’ena de toga’asoko tosidemogaroku, tanu 'Aba, nosuloko la 'o Lazarus waika 'ai dea wi woaka, 28 sababu ge’enaka 'ai dodoto yamotoakasi. Toga’asoko tanu nosuloko 'o Lazarus wakisingano-nganonika la 'uwa sigado 'ona mita gee dua yosongenoka de yowosama 'o ngii 'isa-sangisaraku ne’ena.>

29 'O Abraham wosango, <To 'ona manga Buku 'Itebi-tebini de ma 'enau gee 'o Musa de 'o nabii 'iregu-regu yositota-totara! So 'ona salingou yamoteke 'okia naga 'isilefo-lefoku ma bukuoka ge’ena!>

30 Ma wokaya-kaya gu’una wosango, <Nako kage’ena duga ge’ena koyosingounuwa ee 'Aba. Ma nako yosonge-songenokau yowangodeli de yaika yobicara 'onaka, 'ona 'asa yamada manga so-sowono.>

31 Ma 'o Abraham wongose, <Nako 'ona koyosingounuwa 'okia naga 'ingose 'o Musa de 'o nabii 'iregu-regu manga bukuoka, ma raiokau ngaro naga 'o nyawa yosonge-songenokau yowangodeli ma koyongakuwa mita.> >>