Mateus 2

Yoca-cawaro manga daeraa dina 'o wange ma siwarisa 'idadu

1 'O Yesus wosupu 'o Betlehemuoka, 'o Yudea ma tonaoka, ma 'orasi ge’ena 'o Herodes wokoana. De yamuruo naga yoba-barija 'o ngoma 'o diwangoka yolega ma diai dinaoko 'o wange ma siwaroko, yaoko 'o Yerusalemuoko. 2 'Ona yokakasano-sano, <<Kiaka 'o ngowaka gee wosupuokau 'o duniano la wodadi 'o Yahudioka manga Koana? Ngomi miamakekau to 'una wi no-nako, 'o ngoma dina 'o wange ma siwaroka, so ngomi mioboa miosuba 'unaka.>>

3 Ma Koana 'o Herodes wo’isenoka ma habari ge’ena, de witodokana, koge’enali mita 'awi kawasa yoodumu 'o Yerusalemuoka. 4 So ge’enaka de wakisuloko 'o 'imam ma saeke de 'o Yahudioka manga 'agamaka yodoto-dotoko yomalomuno. Yomalomuno de wosano, <<Kiaka dua 'o Koana wimoi ma Jo’oungu ma Dutu Wiiri-irikokau wosupu?>>

5 'Ona yosango, << 'O Betlehem ma kotaka 'o Yudea ma tonaoka. Sababu 'isoka gee 'o nabii wimoi wosilefokau,

6 <Ngona Betlehem, 'o Yehuda ma tonaoka!

'Igou-goungu ngona konotingoonuwa naga 'o Yehuda ma kota 'ila-laagomo ma sigoronaka.

Sababu ngonano dua 'asa wosupu wimoi wodadi balusu

gee dua wakipareta de wakipaliara 'awi kawasa 'o Israeloka.> >>

7 'O Herodes wo’isenoka koge’ena, de kawomasibongonino waki’asoko yoba-barija 'o ngoma yolega ma diai dinaoko 'o wange ma siwaroko. 'Asa de wosano, <<Kauruosi niamake 'o ngoma ge’ena 'ibaorino?>> 8 Ge’enaka de wakisuloko 'o Betlehemuka yotagi de wakisibesesongo 'ato, <<Niotagi, la nianonu niosidi-diai 'o ngowaka ge’ena. De nako winimakekau, niaino niositotara ngoino la ngoi mita taika towisuba.>>

9,10 Ge’enaka de 'ona yotagi de yamakekauoli ma ngoma gee 'o wange ma siwarie 'ibao-baorino. 'Ona yomorene gee yamakeka ma ngoma ge’ena 'itagi 'isira-sira de 'imaogoro ge’ena ma ngowaka ma dekude daku. 11 'Ona yowosama ma woaka ge’ena de wimake 'o ngowaka gu’una de ma 'esa ngo Maria, ge’enaka de yobukuku yasuba 'o ngowaka ge’ena, de yapelenga manga harataa ma ngiioka de yokula manga su-suba ge’ena la 'o guraci, de 'o manyanyi, de 'o gota ma tigono ma bounu yaowa-owa posironga 'o mur. 12 Ma Jo’oungu ma Dutu wakisitiari manga naneroka, la 'uwa yolioli 'o Herodesika. So 'ona yolio manga tonakisa yaboa 'o ngekomo 'iregu.