19 << 'Uwa nimadolomu 'o harataa 'o duniaka, dua kayabo-boruoka de kaimookoka, de yotosi-tosiki yoboa yatosioka. 20 Duga nimadolomu 'o harataa 'o sorogaaka gee koyabo-boruwau de koimookuawau, de yotosi-tosiki koyatosikuawau. 21 Sababu kiaka naga nia harataa, nia singina mita ge’enaka.>>
'O roese ma silo
(Luk. 11:34-36)
22,23 <<Nanga ako ge’ena kaimatero de nanga roese ma silo. Nako nia ako 'idoto ge’ena dua nimasimake 'itiai 'okia sonaa niodi-diaioka. Ma nako nia ako koidodonuwa ge’ena ngini dua 'isoka 'o darusoka. So nako nia silo koiletonguwa, ge’ena dua posironga 'itarusoka.>>
Ma Jo’oungu ma Dutu 'awi mau de 'o harataa
(Luk. 16:13, 12:22-31)
24 <<Komoiwa yomanarama manga balusu yamididioka; sababu dua wimoika 'ifoloi widora de gee wimoikali, bolo dua wimoika 'ifoloi wisingounu de gee wimoikali. Koge’enali mita ngini. Ngini koidadiwa niamanarama to ma Jo’oungu ma Dutu 'awi mau, ma de nio’ahu kanimadolomu 'o duniaka ma harataa.