12 'Uwau niosidabi 'o sowono yaparetano 'ania roese gee koika-kakaliwa la 'uwa niamoteke nia nyafisuu 'ito-torou. 13 Mita 'ania roese ma kia sonaa 'uwa niodukula 'o sowono ma paretaka ma ngale yapake ma dumutu 'ito-torou. Ma niosisarakani nia roese ma Jo’oungu ma Dutuka 'isoka 'o nyawa gee yosongenokau ma yakisiwangokau. Niokula nia roese 'iodumu ma Jo’oungu ma Dutuka la 'una 'asa winipake ma ngale niadiai to 'una 'awi mau. 14 'O sowono 'uwa nipareta nginika, sababu ngini konio’ahuwau 'o besesongoka gee 'o Musa wositota-totara ma 'ena nio’ahu ma Jo’oungu ma Dutu 'awi co-catuoka.

15 So kokia ne’ena? Ngone koinaparetanowau 'o besesongo gee 'o Musa wositota-totara, ma 'ena ma Jo’oungu ma Dutu 'awi co-catu 'inaparetano. Nako koge’ena de kaidadiosi posowono? Ma gou-goungu 'uwau! 16 Ngini ma rai nianakokau, nako ngini niomasisarakani wimoika la niamoteke 'awi mau, ge’ena ngini niodadi to 'una 'awi yongosi. Nako ngini niosingounu 'o sowono, ngini niodadi 'o sowono ma yongosi, ma duanguku ngini niosongene. Ma nako ngini winisingounu ma Jo’oungu ma Dutu, ngini niodadi ma Jo’oungu ma Dutu 'awi yongosi, ma duanguku ngini niomarimoi de de 'una. 17 Ma po’amalaha ma Jo’oungu ma Dutuka! Sababu ma sira ngini niodadi 'o sowono ma gilaongo, ma ne’ena ngini de nia singina ma gou-goungu niamoteke 'o Habari ma Owa gee nikulakau nginika. 18 Ngini nisipidilokau 'o sowonoka, de ma 'orasi ne’ena niogilaongokau ma Jo’oungu ma Dutu 'awi mauoka.