9 Sababu ngone panakokau ma Kristus wosongenokau de wisiwangodeli, 'una 'asa kowosongenuawau, 'o songene kowiparetawau 'unaka. 10 Sababu 'una wosongene ge’ena ma ngale waisanga 'o sowono ma pareta, ge’ena 'idadi ka ma moi duga ma ngale kaisi’ado-'adonika. De ne’ena 'una wo’ahu ma ngale wisitedene ma Jo’oungu ma Dutu. 11 Ngini mita salingou niosi-singina, ngini koniamotekuawau nia 'ahu ma sira gee 'ito-torou, ma 'ania 'ahu 'imarimoiokau de ma Jo’oungu ma Dutu ma ngekomo ma Kristus Yesus.
Publicidade