Tiago 4

Niobicara 'uwa kaniosiso-somoa

13 Nio’isenika ngini gee niongose 'ato, <<Ne’ena ma wange bolo wangede dua miotagi nee ma kotaka de miogogere ge’enaka miomanarama 'o taunu moi miomawukunu la 'o pipi miomadamake.>> 14 Momongo ngini koniosidongoowa 'okia dua 'idadi wangede 'ania 'ahu ma sigoronaka. Ngini ge’ena 'isoka 'o 'uku ma dowo so ka 'o 'orasi moioka 'ena 'iisangokau. 15 'Ena salingou ngini niongose konee, <<Nako ma Jo’oungu ma Dutu wosimoteke, ngomi 'asa mio’ahu de miodiai koneda de konee.>> 16 Ma gee ngini niadi-diai ma 'orasi ne’ena, ge’ena kanimadaduie ngano nimaie. Nimadaduie koge’ena ge’ena ka 'o dorou.

17 So 'o nyawa gee yanakokau 'okia naga yaowa-owa gee salingou yadiai ma koyadiaiwa, ge’ena yosowono.