1 Utmegona, amïtö nï inge unu nï kwere onu kïbëc yam obedo gïnï ï thë pöl, ëka gïn kïbëc yam owok ï dye nam. 2 Gïn kïbëc yam ebaticagï ï pöl ëka ï nam, ëk obed gïnï jö ka Muca. 3 Gïn kïbëc yam öcamö cem acël nön më tipo, 4 gïn kïbëc omodho pii acël nön n’öya kï ï lëla më tipo n’owotho ködgï, ëka lëla nön onwongo obedo Kiricito. 5 Kadï bed nï kömanön, Obanga onwongo cwinye ba yom ï kom jö mökö ëka dong komgï n’öthöö onwongo ökëth ata ï thim.

6 Jami ni ötïmërë na calö apor both onu, cïkö onu nï kür dök ebed parö gin na reco, na calö yam gïn öparö. 7 Kür ibed unu jö na wörö cal jwogi kite na jö mökö kï kin-gï ötïmö ködë. Kite n’ëcöö ködë ï Cöc na Leng nï, "Lwak obedo pïny ï cem kï math, cë öya gïnï malö më myël."✝ 8 Onu myero kür ëdöny ï tïmö tïm më ölyang, na calö jö mökö kï kin-gï yam ötïmö ködë, ëka jö elip pyer arïö wie adek öthöö gïnï ökö ï nïnö acël. 9 Onu kür ëtëm Kiricito, na calö jö mökö yam ötïmö ëka thwone onekogï. 10 Ëka kür ïngüngüta unu na calö jö mökö kï kin-gï yam öngüngüta gïnï ködë, ëka malaika më thöö otyekogï ökö.

11 Jami ni ötïmërë bothgï na calö apor both onu. Ëcöö jami ni kïbëc ï Cöc na Leng më pwonyo onu jö n’ëkwö ï karë ni më ajiki. 12 Pï manön ëk ngat mörö na thamö nï ecung na tëk, ögwökërë ëk kür opodhi. 13 Atëmatëma mörö ope na maköwu na ba makö jö kïbëc. Obanga genere, ëka ën ba bino yeo nï ëtëmwu rwök na löö ngö na un ïtwërö dangö. Ka ëtëmöwu, Obanga bino mïöwu yoo më bwöth ökö, ëk ibed unu kï tëkö më dangö.

14 Pï manön, ewodha më amara, wëk unu wörö cal jwogi ökö. 15 An atwak kodwu na calö jö na ryëk, tham unu kenwu ï köp na an atwakö. 16 Ekopo më gum na onu ëlëgö gum ïë, ba obedo më gürë më rïbërë ï remo ka Kiricito? Ogati na onu epoko ïë, ba obedo rïbërë ï kom Kiricito? 17 Pïën ogati tye acël, onu n’epol ebedo kom acël, pïën onu kïbëc ënywakö camö ogati acël nön.

18 Tham unu pï jö Icarael, jö na camö gin n’ëtyërö both Obanga ba rïbërë gïnï më tic ï keno tyër? 19 Ngö na an atye ka kobo? An atye ka kobo nï cem n’ëtyërö both cal jwogi obedo gin mörö, onyo nï cal jwök obedo gin mörö? 20 Pe, ngö na an atye ka kobo ënë nï gin aryëda na jö na ba ngeo Obanga ryëdö gïnï, gïn tyërö both cene, ëntö ba tyërö gïnï both Obanga. An ba amïtö nï ïrïbërë unu kï cene. 21 Ba ïtwërö unu madhö ekopo ka Rwoth ëka më cene. Ba ïtwërö unu cem ï mëja ka Rwoth ëka dökï ï mëja ka cene. 22 Onu ëmïtö nï nyeko ömak cwiny Rwoth? Un ïthamö nï onu ëtëk ëlöö ën?

23 "An atwërö tïmö jami kïbëc," ëntö manön ba nyutho nï jami kïbëc könyö. "An atwërö tïmö jami kïbëc," ëntö manön ba nyutho nï jami kïbëc döngö yee ka dhanö. 24 Ngat mörö kür örang gin na könyö ën këkën, ëntö myero ölüb gin na könyö awodhe.

25 Cam unu gin mörö këkën n’ëcadhö ï cuk më ringo, abonge penyo gin mörö pï lworo thama më cwinywu. 26 Pïën "lobo ëka jami kïbëc na tye ïë obedo më ka Rwoth."✝

27 Ka cë dhanö mörö na ba oye Kiricito ocwodowu icem, ëka ïmïtö unu cïdhö cem, cam unu gin mörö këkën n’eketho ï nyimwu abonge penyo gin mörö pï lworo thama më cwinywu. 28 Ëntö ka ngat mörö okobo niwu nï, "Man ngö na dong ëtyërö ökö both cal jwök," cë kür ïcam unu, pï parö ngat na dong okobo köp nön më po wiwu, ëka pï thama më cwinye na nyutho bal. 29 Manön an akobo pï thama na tye ï cwiny dhanö nökënë ca, pathï pï thama na ute ï cwinyi. Pïngö ëgëngö twëröna na an atye ködë më tïmö gin mörö ni ökö, pï thama na tye ï cwiny dhanö nökënë? 30 Ka an acemo nakun apwöyö Obanga, pïngö ëyanya pï gin na dong atyeko pwöyö Obanga ökö pïrë?

31 Dong ka ïcamö unu cem onyo ïmadhö unu math, onyo jami kïbëc na un itio, tïm unu kïbëc më mïö dheo both Obanga. 32 Kür ïbal unu cwiny Eyuda, kadï thon jö Grecia, onyo jö k’Obanga n’oye Kiricito, 33 kit na calö an atëmö yomo cwiny ngat acëlacël ï gin na an atio kïbëc. An ba arangö ngö na könya këna, ëntö arangö gin na könyö jö na pol, ëk ölarë gïnï.