1 Kobedi dong utmegona, köp ï kom mïc na Tipo Naleng mïö, amïtö nï inge unu na bër. 2 Ingeo unu nï, ï karë na un onwongo pod ibedo unu jö na ba ngeo Obanga, onwongo irwenyo unu ökö më wörö cal jwogi na ba twak. 3 Pï manön an amïtö ïnïang unu nï ngat mörö ope na Tipo k’Obanga mïö ën kobo nï, "Yecu ëlamö," ëka ngat mörö ope na twërö kobo nï, "Yecu ënë Rwoth," na path ka Tipo Naleng ënë mïö ën kobo.

4 Mïc tye na kothgï papath, ëntö Tipo acël nön ënë poko. 5 Tic tye na kothgï papath n’etio pï Rwoth, ëntö etio pï Rwoth acël nön. 6 Yodhi më tic tye na papath, ëntö Obanga acël nön ënë tio kï jïï ï yodhi kïbëc.

7 Dhanö acëlacël ëmïö mïc më Tipo më könyö jö nökënë. 8 Tipo Naleng mïö dhanö acël köp më ryëkö, Tipo Naleng nön mïö dhanö nökënë köp më ngec. 9 Tipo Naleng nön mïö yee both dhanö nökënë, both dhanö nökënë, Tipo Naleng nön mïö mïc më cangö jïï, 10 both dhanö nökënë ën mïö mïc më tio tango, both dhanö nökënë më twakö köp na calö adwarpïny, both dhanö nökënë poko kin cwiny na papath, both dhanö nökënë dhümö lëb na papath, ëka both dhanö nökënë më gönyö lëb na papath. 11 Ëntö Tipo Naleng nön ënë tio tic kï mïc ni kïbëc, ën poko mïc na papath both dhanö acëlacël kite na ën mïtö ködë.

12 Kom dhanö tye kï dul na pol na papath, ëntö dul na papath nön bedo dul kom acël. Ënë kom Kiricito. 13 Pïën onu kïbëc, Eyuda ëka jö Grecia, opii ëka jö na löörë kën-gï, onu ebatica ëka ëdökö kom acël ï Tipo acël nön, onu kïbëc ënywakö Tipo acël nön.

14 Pïën kom dhanö ba tye ïë dul acël këkën, ëntö tye ïë dul na pol. 15 Ka onwongo tyën jö kob nï, "An ba abedo dul kom pïën an ba abedo cïng," manön ba mïö ën kwërö më bedo dul kom. 16 Ka onwongo ith kob nï, "An ba abedo dul kom pïën an ba abedo wang," manön ba mïö ën kwërö më bedo dul kom. 17 Ka onwongo kom kïbëc obedo wang jö, onwongo ëtwërö winyo köp nïngö? Ka onwongo kom kïbëc obedo ith jö, onwongo ëtwërö ngweno pïny nïngö? 18 Ëntö kite na tye ködë, Obanga oketho dul na papath ï kom, dul acëlacël kite na ën mïtö ködë. 19 Ka onwongo gïn kïbëc obedo dul kom acël këkën, kom onwongo ba twërö bedo tye. 20 Na calö tye ködë, dul kom tye na papath, ëntö kom tye acël.

21 Wang jö ba twërö kobo nï cïng jö nï, "An ba amiti!" Wic thon ba twërö kobo nï tyën jö nï, "An ba amiti!" 22 Nakaka manön, dul më kom mökö n’ëthamö nï görü ënë dökï nwongo mïtërë rwök, 23 ëka dul kom mökö n’ëthamö nï dheogï ope ënë onu ëmïö wörö na pïrë tëk, ëka dul kom na ba nen na bër ënë eruko kï ruk na bër, 24 nakun dul kom onu na nen na bër ba dök mïtö gin mörö. Obanga örïbö dul më kom nakun mïö dheo na thwönë na löö both dul na dheogï nök, 25 ëk apokapoka kür obed tye ï kom, ëntö ëk dul acëlacël öpar pï dul kom awodhe. 26 Ka dul kom mörö acël tye ka rem, dul kom nökënë thon rem kanya acël ködë. Ka ëwörö dul kom acël, dul kom na papath kïbëc bedo kï yom cwiny ködë.

27 Dong un kïbëc ibedo unu kom Kiricito, ëka dhanö acëlacël kï kinwu obedo dul kom Kiricito. 28 Obanga oketho jö ni ï kin lwak jö n’oye Kiricito, më acël ëkwëna, më arïö edwarpïny, më adek epwonye, ëka jö na tio tango, ëka thon jö na tye kï mïc më cangö jïï, jö na twërö könyö jö nökënë, jö na tye kï mïc më tëla ëka jö na dhümö gïnï lëb na papath. 29 Jö kïbëc obedo gïnï ëkwëna? Jö kïbëc obedo gïnï edwarpïny? Jö kïbëc obedo epwonye? Jö kïbëc tio tango? 30 Jö kïbëc tye kï mïc më cangö jïï? Jö kïbëc dhüm kï lëb na papath? Jö kïbëc gönyö gïnï lëb? 31 Keth unu cwinywu më nwongo mïc na pïrgï tëk.

Ëka dong an abino nyutho niwu yoo na bër na löö.