1 Kobedi dong utmegona, an amïtö poono wiwu ï kom köp më Emuth na Bër na yam atïtö bothwu, na un dong ïgamö ökö, ëka thon icung unu ïë. 2 Pï köp më Emuth na Bër ni ënë ömïö ïlarë unu, ka dong ïmakö unu na tëk köp na yam atïtö bothwu, kono onwongo ba iyee unu nono.

3 Pï köp na an amïöwu na pïrë dit më acël, na an thon agamö kobo nï—Kiricito yam öthöö pï bal onu, nakun lübö Cöc na Leng na yam ëcöö. 4 Eiko ën, ëka ecero ën ökö ï nïnö më adek, nakun lübö Cöc na Leng na yam ëcöö. 5 Ën onen both Kepa, cë onen both ëkwëna apar arïö. 6 Kinge manön onen both utmego na löö mia abic wang acël, pol jö mökö kï kom jö nön pod tye gïnï na kwö, kadï bed nï jö mökö öthöö gïnï dong ökö. 7 Cë ën onen dökï both Yakobo, ëka both ëkwëna kïbëc, 8 cë ï ajiki mërë kïbëc onen botha thon, kadï bed nï an abedo calö ngat mörö n’ënywölö ï karë na ba opore. 9 Pïën an atïdï rwök kï kin ëkwëna kïbëc, n’onwongo ba apora nï ëk ecwoda nï akwëna, pïën yam ayelo jö k’Obanga n’oye Kiricito. 10 Ëntö pï kïca k’Obanga n’ömïa, ënë ömïö an atye kite na an aute ködë, ëka kïca mërë na ën ömïa onwongo ba obedo më nono. An atio tic na tëk rwök na löö jö nön kïbëc, kadï bed nï pathï an, ëntö kïca k’Obanga ënë otio köda. 11 Adyer kadï bed onwongo nï an onyo gïn, köp na wan dong ëtïtö, ënë köp na un iyee.

12 Kobedi dong ka ëtïtö nï ecero Kiricito kï kin jö n’öthöö, pïngö jö mökö kï kinwu kobo nï cer ka jö n’öthöö ope? 13 Ëntö ka cer ka jö n’öthöö ope, cë Kiricito thon ba ecero. 14 Ëka ka Kiricito ba ecero, cë tïtö köpwa bedo na köny mërë ope, naka thon yeewu köny mërë ope. 15 Mëd ï kom manön, onu thon ebedo ecaden më twodo ï kom Obanga, pïën onu ëtwakö köp ï kom Obanga nï ënë ömïö Kiricito ocer kï ï thöö. Ëntö ka tye adyer nï jö n’öthöö ba ecerogï, cë Obanga ba ocero Kiricito. 16 Ka cero jö n’öthöö ope, cë nwongo Kiricito thon yam ba ecero. 17 Ka Kiricito yam ba ecero, cë yeewu köny mërë ope thon, nwongo pod itye unu ï thë bal. 18 Cë jö na dong öthöö gïnï na yee ï Kiricito nwongo orwenyo gïnï ökö. 19 Ka genwa ï Kiricito könyöwa ï kwö më karë ni këkën, cë nwongo ënënö onu kï kïca rwök na löö jö kïbëc.

20 Ëntö ï adyer mërë, Kiricito ecero dong ökö kï ï kin jö n’öthöö, ën tye na calö wi kac ka jö n’öthöö. 21 Pïën dhanö ënë okelo thöö, dök thon cer ka jö n’öthöö dhanö ënë okelo. 22 Kite na jö kïbëc thöö ködë ï Adam, kömanön thon jö kïbëc ebino mïögï kwö ï Kiricito. 23 Ëntö ngat acëlacël kï kakarë, më acël Kiricito, na ënë wi kac, ëka kinge jö ka Kiricito ï karë më dwogo mërë. 24 Cë ajiki pïny dong bino thuno, na Kiricito bino mïö ker ï cïng Obanga Apap, na nwongo dong otyeko türö kit löc kïbëc, twërö kïbëc ëka tëkö. 25 Pïën Kiricito myero obed ï löc naka wang n’Obanga oketho lang mërë kïbëc ï thë tyënë. 26 Langö n’ebino tyeko më ajiki ënë thöö. 27 Pïën yam ëcöö nï, "Obanga oketho jami kïbëc ï thë tyënë."✝ Ëntö ka ekobo nï oketho "jami kïbëc" ï thë löc mërë, cë nen kanyalër nï ba ëkwanö ën Obanga kikome n’oketho jami kïbëc ï thë löc ka Kiricito. 28 Ka dong etyeko ketho jami kïbëc ï thë löc mërë, ën Wod kikome thon ebino ketho ï thë löc k’Obanga ëk Obanga öcök jami kïbëc ï thë löc mërë.

29 Kobedi dong, ka cer ka jö n’öthöö ope, jö na dong ebaticagï pï jö n’öthöö bino gïnï tïmö ngö? Ka cer ka jö n’öthöö ope kadï thon kïcël, pïngö dong ebatica dhanö na kakargï? 30 Pïngö onu dong ebedo kanya rac caa kïbëc? 31 An athöö nïnö kïbëc, utmegona, manön akobo bothwu atïr, pï wakërë na an atye ködë ï Kiricito Yecu Rwoth onu. 32 Kadï bed yam alwënyö kï leeni na ger ï Epeco, kite na dhanö kobo nï, kit köny mënë n’anwongo ïë? Dong ka cer ka jö n’öthöö ope,

"Eru ecemu ëka emedhu,

pïën diki onu ebino thöö ökö."✝

33 Kür ïmïï ëbwölwu: "Woth kï jö na reco balö kite na bëcö." 34 Dwog unu cen ï tham n’atïr ëka ïkwër unu bal ökö. Pïën jö mökö ba tye gïnï kï ngec nön ï kom Obanga. Akobo man ëk lewic ömakwu.

35 Gwök onyo ngat mörö bino penyo nï, "Jö n’öthöö ebino cerogï nïngö? Kit kom mënë na gïn bino bedo ködë?" 36 In ïmïng! Kodhi na in ïcwö ï ngöm, ba twërö nwongo kwö wang n’öthöö kono. 37 Ëka gin na in ïcwö ënë kodhi nono, onyo kodhi kal onyo koth kodhi na path na ba obedo kom gin na donyo. 38 Ëntö Obanga mïö kom ï kodhi nön kite na yam ën öyërö ködë, kodhi acëlacël kï kit kothe. 39 Ringo kom gin na kwö kïbëc ba röm: Ringo dhanö path, ringo leeni path, ringo wïny path ëka më rëc thon path. 40 Dök thon kom më polo ëka më lobo tye, ëntö kom më polo tye kï dheo mërë na path, ëka kom më lobo thon tye kï dheo mërë na path. 41 Ceng tye kï koth dheo mërë acël, dwe thon tye kï dheo mërë na path, cër thon tye gïnï kï dheogï na path, ëka cër thon kitegï papath kï dheo na gïn mïö.

42 Obedo thon nï kömanön ï kom cer ka jö n’öthöö. Gin ëcwö obedo gin na thöö, ëntö ka ecero ba dök thöö. 43 Ëcwö na nwongo ope kï dheo mërë, ëntö ecero na nwongo dheo mërë dong tye, ëcwö na nwongo pod görü, ëntö ecero na nwongo tye kï tëkö. 44 Ëcwö na nwongo obedo kom më lobo ni, ëka ecero ën na nwongo obedo kom më cwiny.

Ka kom më lobo ni ute, cë nyutho nï kom më cwiny thon ute. 45 Cöc na Leng kobo nï onu nï, "Dhanö më acël obedo Adam n’ödökö dhanö na kwö."✝ Ëntö Adam më ajiki ödökö tipo na mïö kwö. 46 Ëntö kom më tipo ba öcakö bino ëntö kom më lobo ni ënë öcakö bino, cë dong kom më tipo bino kï körë. 47 Dhanö më acël ecweo kï kom apua më lobo, ëntö dhanö më arïö na ënë Kiricito öya kï ï polo. 48 Jö më lobo cal gïnï kï dhanö n’ecweo kï kom ngöm më lobo, ëka jö më polo cal gïnï kï dhanö n’öya kï ï polo. 49 Dong kite na yam onu eruko cal ka dhanö n’ecweo kï ngöm më lobo ni, kömanön thon onu ebino ruko cal ka dhanö n’öya kï ï polo.

50 Man ënë ngö na an akobo bothwu, utmegona, nï gin na tye kï ringo kom ëka remo ba twërö leeno ker k’Obanga. Ëka gin na töp ökö thon ba twërö leeno gin mörö na ba töp. 51 Winy unu müng nï: Pathï nï onu kïbëc ebino thöö, ëntö ebino lökö onu kïbëc ökö— 52 pïöpïö pï karë na nönök mörö këkën, na calö wang na ryapi ëka ka buruji më ajiki bino kok, pïën buruji bino kok, ëka dong ebino cero jö n’öthöö ökö na ba dök bino gïnï thöö, cë ebino lökö onu thon. 53 Pï kom na töp myero orukere kï gin na ba töp, ëka gin na thöö myero orukere kï gin na ba thöö. 54 Dong ka gin na töp orukere kï gin na ba töp, ëka gin na thöö thon orukere kï gin na ba thöö, cë bino nyutho köp na yam ëcöö nï bino cobere kakarë nï,

"Thöö dong ëmwönyö ökö ï löc."✝

55 "In, thöö, löcni tye kwene?

In, thöö, kwirni tye kwene?"✝

56 Kwir ka thöö ënë bal, ëka tëkö më bal ënë cïk. 57 Ëntö pwöc myero obed both Obanga na mïö onu löc pï Rwoth onu Yecu Kiricito.

58 Pï manön, utmegona më amara, cung unu na tëk abonge gin mörö na yengowu, mëdërë unu thon kï tic ka Rwoth nïnö kïbëc, nakun ïnïang unu nï ï Rwoth onu, yelerewu pathï më nono.