1 Ï karë na an abino bothwu, utmegona, an ba abino kï ryëkö onyo twak mörö na malö më kobo niwu müng* ï kom Obanga. 2 Pïën an onwongo ba amïtö ngeeno gin mörö ï karë na an atye ï kinwu, na path kï Yecu Kiricito këkën ëka thöö mërë ï kor yath arïa. 3 An abino bothwu na an atye kï görü, kï lworo ëka kï myël kom rwök. 4 Twakna ëka tïtö köpna onwongo ba obedo më ryëkö ëka köp na ywaö thama, ëntö më nyutho tëkö më Tipo, 5 ëk yeewu kür ocung ï kom ryëkö ka dhanö, ëntö ï kom tëkö k’Obanga.

6 Wan ëtwakö köp më ryëkö ï kin jö n’otengo ï cwinygï, ëntö pathï ryëkö më karë ni onyo ryëkö k’ëlöc më karë ni, na gïn kikomgï dong tye ka rwenyo ökö. 7 Ëntö wan ëtwakö ryëkö k’Obanga më müng, ryëkö n’onwongo ëkanö ökö ëka ryëkö n’Obanga öyübö më kelo nï onu dheo na bara wi lobo öcakërë. 8 Ba tye ëlöc mörö më karë ni n’önïang ïë, kono yam gïn önïang, kono ba oguro gïnï Rwoth won dheo ï kor yath arïa. 9 Ëntö kite n’ëcöö ködë nï,

"Gin na wang ba önënö,

ith ba owinyo,

thama ka dhanö ba ögamö

gin n’Obanga öyübö pï jö na marö ën."✝

10 Ëntö Obanga ömïö Tipo Naleng otuco both onu.

Tipo Naleng rangö jami kïbëc, naka thon müng k’Obanga na thuth. 11 Nga na ngeo thama ka dhanö nökënë, na path kï cwiny na tye ï dhanö nön këkën? Ï yoo acël nön, dhanö mörö ope na ngeo thama k’Obanga, na path kï Tipo k’Obanga këkën. 12 Onu ba ëgamö cwiny më lobo, ëntö ëgamö Tipo Naleng n’öya kï both Obanga, ëk ënïang ï kom mïc n’Obanga ömïö onu nono. 13 Man ënë ngö na wan ëtwakö, wan ba ëtwakö köp n’epwonyo kï ryëkö ka dhanö, ëntö köp na Tipo Naleng opwonyowa ködë, nakun pwonyo köp më Tipo n’atïr both jö na tye kï Tipo. 14 Dhanö na ba oye Kiricito, ba twërö gamö ngö na Tipo k’Obanga mïö, pïën kï bothe obedo gin mörö më mingo, ëka ën ba twërö nïang ïë pïën koth gin nön ënïang ïë kï Tipo. 15 Dhanö na tye kï Tipo nïang jami kïbëc, ëntö ën kikome, ngat mörö ope na twërö nïang ï kome.

16 Kite na Cöc na Leng kobo nï,

"Nga n’ongeo thama ka Rwoth

ëk opwony ën?"✝

Ëntö onu etye kï thama ka Kiricito.