1 Tipo Naleng kobo atïr nï karë mörö ï anyim jö mökö bino lökërë gïnï ökö kï kom yeegï, cë cakö gïnï lübö tipo na reco më bwöl ëka kï pwony na yaa kï both cene. 2 Pwony n’obedo köman yaa kï both jö n’obedo etwodo, na thama na tye ï ïgï na nyutho nïgï balgï odhil ökö na calö gin n’ëwangö kï nywenyo na lyeth. 3 Gïn jükö jïï nï kür onyom gïnï ëka cïkögï nï kür öcam gïnï cem mökö n’Obanga oketho ëk jö na yee ën ëka kï jö na ngeo köp adyer ögam gïnï kï pwöc. 4 Jami kïbëc n’Obanga oketho bëcö, ëka ba tye mörö na myero ëkwër ökö ka ëgamö kï pwöc, 5 pïën nwongo ëlönyö kï köp k’Obanga ëka kï lëga.

6 Ka in ibino mïö pwony ni both utmego, in ibino bedo atic ka Kiricito Yecu na bër, n’ëpïdhö kï köp më yee ëka kï pwony na bëcö na in ïlübö. 7 Kwër köp mökö më mingo na thërë ope na ba obedo më lworo Obanga. Pwonyiri keni më lworo Obanga. 8 Pïën pwony më ryëö ler kom tye kï köny mökö, ëntö lworo Obanga tye kï köny ï yodhi kïbëc, pïën twërö kelo kwö më karë ni ëka kï karë na tye ka bino anyim.

9 Man ënë köp më adyer na myero jö kïbëc oye. 10 Manön ënë ömïö onu etio rwök ëka eyelere pïën eketho gen onu ï kom Obanga na kwö, na ënë obedo Alar ka jö kïbëc, ëka rwök mërë pï jö n’oye.

11 Pwony cïk ni gïnï ëka ikob nï jö kïbëc më tïmö gin na in ikobo. 12 Kür iye ngat mörö ocai nï in pod ïtïdï, ëntö bed apor both jö n’oye ï twak, ï kwö, ï mar, ï yee ëka bedo abonge gin mörö na rac. 13 Mïï karëni më kwanö Cöc na Leng ï nyim lwak, ï tïtö köp mërë ëka më pwonyogï naka ka an adwogo. 14 Tii kï mïc n’emii ï karë n’edwarpïny ötwak ëka edite ka jö n’oye Kiricito omii gum kï ketho cïng-gï ï wii.

15 Keth köp ni ï tic, keth cwinyi ïë, ëk jö kïbëc önën kite na in itye ka woth ködë anyim. 16 Gwokiri keni ëka ïgwök pwonyni thon. Makgï na tëk, pïën ka ïtïmö kömanön, in kikomi ibino lari kanya acël kï jö na winyo köpni.