1 Pï manön, wan na dong ëmïöwa tic ni pï kïca k’Obanga, cwinywa ba bino dök cen. 2 Ëntö wan dong ëkwërö kit na reco kïbëc n’ëkanö ëka më lewic. Ëka dökï ëkwërö tic më bwöl ökö ëka kï dwanyö köp k’Obanga, ëntö wan ëtwakö köp adyer ï nyim Obanga, ëka jö kïbëc na genere ngeo. 3 Ka cë köp më Emuth na Bër na wan ekelo oumere ökö, nwongo oumere kï both jö na tye ka rwenyo këkën. 4 Gïn jö na ba yee nonu, obanga më lobo ni dong oumo thamagï ökö ëk kür önën gïnï tar më köp më Emuth na Bër ï kom dheo ka Kiricito, na ënë cal k’Obanga kikome. 5 Wan ba ëtïtö köp ï komwa kënwa, ëntö ï kom Yecu Kiricito n’obedo Rwoth, ëka wan kikomwa ebedo eticwu pï Yecu. 6 Pïën Obanga yam okobo nï, "Wëk tar öryëny nakun yaa kï ï cöl pïny,"✝ man ënë Obanga acël nön n’ömïö tar mërë öryëny ï cwinywa më mïöwa tar më ngec ï kom dheo k’Obanga na ryëny ï wang Kiricito.

7 Ëntö wan etye kï lönyö ni na tye ï tabö n’ecweo kï lobo, më nyutho nï tëkö na thwönë yaa kï both Obanga, ëntö ba yaa kï bothwa. 8 Ëdïöwa ï yodhi kïbëc, ëntö ba ërïdöwa rwök. Thamawa ocung ökö, ëntö genwa ba öbal. 9 Eyelowa, ëntö Obanga ba öwëköwa ata, ëtëöwa pïny, ëntö ba ëthöö. 10 Karë kïbëc wan ëyëö thöö ka Yecu ï komwa, ëk kwö ka Yecu thon onen ï komwa. 11 Pïën karë kïbëc wan n’ëkwö ëmïrë më thöö pï Yecu, ëk kwö mërë onen ï komwa na thöö ökö. 12 Man dong nyutho nï thöö tye ka tic ï komwa, ëntö kwö tye ka tic ï komwu.

13 Wan etye kï koth tipo nön ëk yee na yam ëcöö nï, "An ayee, ënë ömïö atwak."✝ Wan thon eyee, ënë ömïö wan ëtwak. 14 Wan engeo nï ngat n’ocero Rwoth Yecu bino cerowa thon kite n’ocero kï Yecu, ëka ën bino kelowa ï nyime kanya acël kodwu. 15 Jami ni kïbëc ötïmërë pïrwu, ëk kïca k’Obanga ömëdërë both jö na pol, ëk gïn thon ömëdërë kï pwöc rwök më mïö Obanga dheo.

16 Pï manön, cwinywa ba tye ka dök cen, kadï del komwa ni tye ka bal, ëntö kwö më ïwa tye ka röc nïnö kï nïnö. 17 Pïën can n’eyelowa ködë yot, tye pï karë mörö na nönök, ëka tye ka yübö nïwa dheo na thwönë na ba thum ëka thwönë na löö. 18 Wan ba ëcïkö wangwa më nënö gin na nen, ëntö më nënö gin na ba nen. Gin na nen bedo pï karë na nönök këkën, ëntö gin na ba nen bedo naka naka.